قصيدة"أيام زمان...." هشام فتحي

[هاشم فتحي]

ملف مرفق 1593
قصيدة أيام زمان
للشاعر/ هشام فتحى

أيام زماااااان
كنا بنلعب جنب بتنا
نلف أيدنا
إحنا وولاد الجيرانْ
نعملْ من الهِدمة القديمة
نُصّ كورة
نجِيب قارورة
نُحطّ طوبة
وفْ نهايةِ المرمى بنحدد مكانْ
أيام زمان....
لو غبنا يوم عن بعضنا
الشُوق يزيدْ
ولا كنا نسمع
مهما كان " خلص الرصيدْ"
ترجع وشايل شنطتين
وف كل عيد
الأولى لِيك
والتانية لولاد الجيرانْ
كِيلةْ بَلح..
من فوقها عيش
وكمان قدحْ ..........
كيس برتقانْ
والبرد ييجي يلمنا
على بعضنا
خالتي أم صابر أُمُنا
بتمد أيدها تضمنا
والدار بيوسع والمكانْ
عِشْرة سنين...
مش فارقة لو كنا هِنا
أو كنا يوم متغربينْ
بنغيب ونرجع بالجيران متونسين
صدق اللي قال " الدار أمان"
أيام زمان
كُنّا بنلعب جنب سور المدرسة
شدّ الحبالْ
نضرب صاحبنا باليمين
ونداري عينُه بالشمالْ
والواد حسامْ
وف لمحة واحدة بيختفي
ونقول يا واد "اظهر وبان"
أيام زمانْ
وحاجات كتيرة بتختفي
كلمة "سماح"
درس التلات
يوعظنا فيه الشيخ صلاح
زغرودة في بلاد الملاحْ
ولا طير يغني في الصباحْ
صوت الأدانْ
دلوقت قال ...!!!!
ابن الجيران
بيبات جعان
وأنت اللي قال عمّال بتسمنْ
لو جِه ف يوم رن الجرس
تبعتله قال " كلمني شكراً"
لو جه في يوم
طلب الرغيف
تغضب عليه
وتشيل وتحزنْ
دلوقت بيخبط عليك
أيام كتيرة يشتكي
ويهون عليك
لو مد أيده بالسلام
تسحب أيديك
وتقول كمان " الله يحننْ"
أيام زمان
يا ابن الحيران
دا الطيب أحسنْ

أبو خلاد / هشام فتحي
المنيا- مطاي- الكوادي
عضو رابطة الأدب الإسلامي العالمية

[أديبه نشاوي]

نعم من خساراتنا الكثيرة صرنا نتغنى بأيام زمان...
وقول يازمان ارجع يازمان...
وفقك الله
سررت جدا بالمرور
اديبه

[كاظم الفضلي]

ذاكرتنا تزخر بالصور الجميلة
والحكايا فالمتعة في التصفح
بعد رحلة العمر الطويلة .. شكراً
لك قصيدة جميلة . دمت بخير .

كاظم الفضلي

[ذيبان]

مشكور على نصك الجميل هذا وتصوير البيئة بصدق
سلمك الله
ذيبان