القسوه حرقت دمنا والحلم مات .. ضياء الدين البري

[ضياء الدين البري]

السلام عليكم .. كلام من قلبي

القسوه حرقت دمنا والحلم مات

...

بتلوموني ..؟

وهانت عليكم دمعتي ونبضي العفيف .؟
نسيتوا دنيا عشتها طوبه وخريف .؟
ونبض إبني اللي اتخطف ، من بين ضلوعي
لسّه آهاته وأنـّته ترعي فْ ربوعي
والصوره لسّه بدمّها ساكنه فْ عيوني
حتي الوليد
كانت ملايكة ربنا جايّه تراعيه
فجأه لقينا شمعته داسها الخسيس
اللي مخافشي ربنا وخطف العريس
من حضني ليلة دخلته وقبضوا عليه
شوفتوا الحياه ، دايره تعاديه
ساعتها ليه ، سيبتوا الجناه ، يتحدوا فيه.؟

من رزق نيله جوّعوه..

من بدر ليله جرّدوه

جاروا علي نبت الصبا

والزهره نشفت من الغبا

وبفكر فاسد سرطنوه ..

والنبضه فيه متعذبه

من غير آهات ..
جوّا حيطانهم ضيّـعوه ..
طلقوا غيلانهم حطـّموه ..

رغم السكات..

بلقمه ناشفه سمّموه ..

منعوا الأحبه يودّعوه

والقسوه حرقت دمنا

والحلم مات
في المهد مافـْرحش بميلاد
والحزن جوّانا اتخرس
والقلب م القسوه اندهس
والنبض قدروا يدمـّروه
وبحكم ظالم مرّروه
ودا كله ليه ..؟
دا احنا الحقيقه المثبته فْ كتب الإله
أرض الكنانه القاهره لكل الطغاه
ييجوا النهارده يدفنوا تحت التراب
ولادنا خير جند البشر ، زينة الشباب
ياااااااااااااااااه
ياجرح قلبي اللي نزف في الكون دماه

صبري عليك هوّا دوايا م العذاب

وان زدت قسوه مش هازيد إلا عناد

دا نن عيني شايفه طاير في الفضا
بصيت عليه لقيت عنيه متبسمه
قلبي انشرح نادي بفرح ربي فْ سماه
وسمعت صوت ينده يقول ابنك شهيد
ومن إرادة ربنا كان المزيد

أمـَر الملايكه يغسّـلوه ويكفـّنوه

ويسكـّنوه أعلي الجنان ويكرّموه

جاني فْ منام قاللي خلاص نولت المراد

كرّمني ربي فْ جنـّتي بكل الرضا

وبضحكه عاليه فْ توب جديد
نبضت قلوب كل الولاد
من غير ميعاد
لبّـوا الندا
هبّـوا ونادوا للفدا
نزعوا فتيل الفضفضه

والهمهمه

بقلوب نصاري ومسلمه

جوّا الميدان ، حفروا الأيات

ثوره بريئه منظـّمه

جوّا التاريخ هاتكون منار كل العباد

رمز الإراده والجهاد

وملايكه نزلت م السما

ساعدوا علي صد العدا

وبْـأمر رب العالمين

النصر كان للمظلومين

المقهورين

من غير خطايا معذّبين

نالوا الشهاده بمكـْرمه

وتزيّـنوا بالأوسمه

وعشان كدا ..

أتمني نقضي ع الفساد
وكل أطياف العناد
ونعيش حياتنا مؤمنين
بقلوب محبـّه لكل ملّه وكل دين
يعلا فْ سمانا نجمنا رمز السلام
واللي يحب المصطفي خير الأنام
من جوّا قلبه يحبنا ويقول آمين

........

أشكركم

وللجميع تحياتي

[ريمه الخاني]

السلام عليكم
يارب هدئ الامور واصلحها بين الشعب الواحد شيئ محزن مانسمعه اليوم
وتثبيت

[ضياء الدين البري]

السلام عليكم
يارب هدئ الامور واصلحها بين الشعب الواحد شيئ محزن مانسمعه اليوم
وتثبيت

السلام عليكم .. كلام من قلبي
احترامي وتقديري
وكل الشكر لحضرتك علي المرور الرائع
واكرر الشكر علي التثبيت

وللجميع تحياتي

[محمد الشلقامى]

سلمت وسلم لنا قلمك الثائر شاعرنا الجميل(ضياء الدين البرى)
مع تمنياتى لك بالتوفيق

[راما]

آمين يارب
قصيدة تخرج من قلب متألم وصادق
أصلح الله الأحوال
مع تحيتي

[ظميان غدير]

قصيدة رائعة وجميلة
ونتمنى ان تتحسن الاحوال
تحية

[كاظم الفضلي]

الشاعر ضياء الدين البري .. قصيدة
معبرة رائعة ودعوة للمحبة . حفظ
الله أرض العروبة وشعبها وحفظ
ابنائكم أبنائنا وعم السلام والأمن
والأمان . سلمت ودام أبداعك .

كاظم الفضلي