ربـاعيَّــات ليـثـيّــة

[دكتور أحمد الليثي]

صاحبنا عمره ما اتوضى ولا صلى في يوم من الأيام
جاله رمضان آل أتوب، وراح استحمى قوام
سمع الفجر لفع جلابيته، جت لنص الرجل ع السُّنة
دخل بيت الله ... شافوه ... وراحوا مقدمينه إمام

[دكتور أحمد الليثي]

سايح ف أرض الله من بلاد لبلاد
مشحطط أم العيال، ومعاها كمان الاولاد
نفسي أرجع لبلدي، ويوم ما رجعت
قالوا إخوانجي وكمان من الموساد!

[دكتور أحمد الليثي]

واحد صاحبنا بيتجـوز وراح عازمنـي ع الفرح
وعمل زفة وهُليلـة، ودعا أهل الطرب والمـرح
أدِّن عليـهم كل أدان ما حد قـام ولا اتحـرك
وقالـوا يا عم سيبـك بكـرة في جهنم ننطَرَح.

[دكتور أحمد الليثي]

مفتش الجمرك:

افتح يا باشا الشنط، ورينا أيه اللي جبته معاك
قلت له فتش براحتك، ما حتلاقي حتى سِواك
في ثانية لقيت الشنط بتطير في ألف اتجاه
وادّاني قسيمة متينة ما يدفعها غير ذوي الأملاك

[دكتور أحمد الليثي]

ما احلى يا مصر نيلـك، نابع من الجنـة
ما احلى ترابك وبيه يوم العُرْس باتْحَـنَّى
ما احلى ضفافك وأهرامك وأيامك وأحلامك
ما احلى صـوت الأدان بيعلـى ويتغنَّـى.

[دكتور أحمد الليثي]

حطيت رحالي على اعتابك وقلت خلاص ترحـال
ورميت نفسي في أحضانك وضميت سهول وجبال
وبست الحجر، والشجر، والتراب، والنيل، والناس
دا حضـن الوطـن يا خوانَّـا ما تعوضـوش أمـوال.

[دكتور أحمد الليثي]

يا خليلي في وقت الخل شيء نادر
كان الصفا ف قلبي حقيقي مش عابر
بسطت إيدي بالسلام والنية خالصة
قطع إيدي وقال لي أصل الزمن غادر

[دكتور أحمد الليثي]

فلاح بلدنا وعاجنـة البلهارسيـا جِتِّتُـه
أصل أبوه النيـل وشـرب من مَيِّتُـه
قالوا: ظلمت النيل! طب قولوا مين موِّتُـه؟
هي يعني البلهارسيا من اختراع حضرتُـه؟

[دكتور أحمد الليثي]

بحب الحكومة وحبي شديد
أمِدِّلْها إيدي تمـد في إيـد
وتلطم خدودي وقلبي سعيد
أصل كرامتي كرامة عبيـد

[دكتور أحمد الليثي]

يا سيدي الحكومة دي زي المدام
تتعب وتشقى، وعيشتـك سُخـام
وان جيت ف مرة تقول ده حرام
قول على نفسك لربي الدوام.