منتديات فرسان الثقافة - Powered by vBulletin

banner
النتائج 1 إلى 2 من 2
  1. #1
    ميساء حلواني
    Guest

    " يوجد لدينا حلاق سوري "

    " يوجد لدينا حلاق سوري "

    قريت هاي الورقة على واجهة احد صالونات الحلاقة التركية اول ما وصلت لهالبلد
    حسيتا دعاية سيرك !!
    جوا عندو " حلاق سوري !! " و يلي مو مصدق يدخل يتفرج بعينو
    للاسف كل محاولاتي لقص شعري عند " الحلاق السوري " هون بائت بالفشل .. لسببين اساسيين

    الحلاق السوري كل كم يوم بيتقلع من الصالون يلي عمبشتغل فيو .. و بيروح بيشتغل بصالون جديد
    و كل مرة انت لازم تحزر وين صار .. و تفتل صالونات البلد باحثاً عن الورقة ( تشكيلة اوسع في الداخل )

    ثانيا .. الحلاق السوري بحياتو ما بيسألني كيف بدي قص ..
    ميزتو الوحيدة انو بيحكي عربي و ممكن اشرحلو شو بدي
    بس صاحبنا و بدون اي حرف ، اول ما يشوفني بيبلش يقص اوتوماتيكيا حتى قبل ما اسلم عليه
    اول ما يدخل اي شخص عالمحل بيبلش يقصلو .. بجوز حدا ضايع او بدو يعرف شقد الساعة او محصل فاتورة الكهربا
    كلون بيقصلون مباشر
    اذا حدا معدي قدام محلو صدفة .. بينقض علي من جوا و بيبلش يقص
    كأنو قاطع عهد عنفسو ما يسمح للشعر يطول بهالكون

    ما في اي اثبات انو هالحلاق سوري .. و ما اظن هو حلاق اصلا
    هاد شخص معو رجفة او حركة عصبية و بالصدفة بإيدو في مقص
    بينقض متل الجرادة الجوعانة عموسم الخس .. و بيفرم الراس فرم .. و الكل بيطلعو من عندو نفس الموديل
    بدو يوحد اللووك تبع تركيا و يخلي البشر يتساوو في المظهر

    فقررت مبارح روح عند حلاق تركي بصالون فخم بالمول ..
    صحي بياخد غالي .. بس صرلي شهرين مو قاصص ( ضيعت الحلاق السوري ، و ما بعرف وين عمبيمارس طقوسو حاليا ، بس سمعت انو حطو بالمصح ، و مربطينو بأمتن انواع القيود و الجنازير و تحت حراسة مشددة )

    بالصالون الفخم استقبلني فريق سباحة المنتخب التركي ..
    اربع شباب ضخمين لابسين اسود ضيق ، شعرون ممتتد قدامون مترين متل رفاس المسبح الاولومبي
    شلحت جاكيتي .. اشتهيت علقو على مقدمة شعر احد هالشباب

    واحد اخدني عالكرسي ، و عطاني كتاب الموضة ٢٠١٥ مشان نقي الموديل
    قعدت قلب بيناتون ... عجب اختار الشعر الاشقر الطويل المربوط ؟؟ متل "براد بيت" بفلم أساطير الخريف ؟
    ولا موديل الجبسة المضروبة بسكينة.. متل رونالدو و حسن الشافعي ؟
    بس هاد الموديل بخوفني لانو بحس ما بيزبط الا بضربة فأس على طرف الرأس .. و بصراحة مالي قلب اتوجع
    ممم .. ما عرفت لاي مخلوق بدي اتحول .. فقررت حافظ على تسريحتي الحالية الساحرة .. بس يقصرلي ياها

    و بدأت معركة الشرح ..
    مستحيل يفهم علي اي كلمة عربي او انكليزي
    و انا اشرح و اشرح و اشوبر و أشّر بإيدي و اعمل موديلات و اشارات متل المعتوه مشان يفهم
    بعدين فرجيتو صوري القديمة بالموبايل مشان يشوف موديل شعري ..
    حسيت حالي متل ستي وقت بتفرجي صور طفولتي بالحفوض لبنات الجيران الغير مهتمات اطلاقا
    بعد نص ساعة شرح ..
    فجأة بلش يتحرك .. اتجه للخزانة و لبس جاكيتو
    اها .. شو احترافي .. في جاكيت معين لكل قصة ..
    المهم .. شال حالو و راح ..
    فهمت بعدين انو خلص وقت دوامو و انصرف
    هيك بدون اي انذار .. منيح مو بديان يقص .. كنت طلعت بطرف واحد ..

    اتجه لعندي عضو تاني من فريق السباحة التركي .. و ناولني كتاب الموضة ٢٠١٥ مشان نقي !!
    رجعو برزو قدامي براد بيت و رونالدو و حسن الشافعي
    و رجعت اشرح من الاول و طالعت صوري بالحفوض
    اشتقت للحلاق السوري المسعور .. كان جردم اربعين شخص لبين ما يفهمو هدول شو بدي

    المهم .. لبسني الرداء الواقي من الشعر على صدري .. حطلي ورقة ملتفة عرقبتي .. و لصاقة على حواجبي مشان تحميلي عيوني .. و دحشلي قطن بداني !!
    صار شكلي مسخ .. كني فهمان بدي عملية كلاوي هاد ..

    قصلي شعري شي ساعة و نص بكل حنان و تروي
    بعدين حمملي راسي مرتين بنوعين شامبو
    بعدا دهنلي وشي مرهم اخضر .. مشان تفتيح البشرة
    بعدين تدليك لعضلات الرقبة
    بعدين مسحلي المرهم الاخضر من وشي باملس انواع القطن
    بعدين رجع غسلي وشي و شعري

    حسيت حالي السجادة يلي بتنضفا امي اخر الشتوية

    بهالوقت شقد ما طولت عندو .. كان شعري رجع بلش يطول
    و رجع قصلي يا شوي

    صرت ارجف
    اذا بدو يرجع يحممو و يدهنلي وشي و رقبتي ، لازم دق ودّع اهلي .. و قلون انو رح استقر و عيش هون للأبد ..
    بس الحمدالله شكلو عجز و مل
    شلي القطن و الفوارغ من حواجبي و داني و رقبتي و صدري
    و رجعت اقدر اسمع و اشوف
    طلعت عالمراية .. شفت ادولف هتلر شخصيا
    شعري مفروق عاليمين و مطموس و مكبّس تكبيس .. كأني ديك رومي كان قاعد عراسي صرلو سنتين

    و قلي كلمة بالتركي .. معناتا يا نعيما .. يا انقلع .. مستحيل اعرف
    دفعت كل شي معي صاري
    و ركضت عالبيت حممت راسي و رجعت نكشتو متل موديلو القديم يلي كنت بلشت انساه ( استعنت بصوري بالحفوض لاتذكرت )
    و قعدت التقط انفاسي

    اشتقت لحالقين حلب يلي ما بيسكتو
    يلي بيحكو رياضة و فن و سياسة و طبخ و اثار
    يلي ضليت قص عندون من اول ما طلعلي شعر لبين ما بلشو يشيبو اول كم شعرة براسي

    اشتقت للواجهات المحلية متل :
    صالون الامبراطور : احدث الصات العالمية و الايطالية
    عأساس ايطاليا من غير عالم
    او مركز الاناقة لزراعة الشعر بالليزر .. لا صلع بعد اليوم
    و صورة واحد اقرع متل طابة الغولف ( قبل ) .. و جنبو صورة واحد شعرو اغزر من صحن الكنافة ( بعد )

    ايمت ممكن ارجع قص عندون .. و اقرا عواجهاتون ( يوجد لدينا حلاق ايطالي في الداخل ) ؟

    اييه .. المهم ... الله ينعم عليكون .

  2. #2
    ميساء حلواني
    Guest

    رد: " يوجد لدينا حلاق سوري "


المواضيع المتشابهه

  1. "فرنسا 24" و"الحرة" … أو حين تتنكر "الدبابة" في ثوب "الميديا" كتبه شامة درشول‎
    بواسطة محمود المختار الشنقيطي في المنتدى فرسان المقالة
    مشاركات: 1
    آخر مشاركة: 02-18-2015, 10:36 AM
  2. "مخطوطات عربية بحجم 6 ملايين مبعثرة عبر العالم " (باحث سوري)
    بواسطة محمد عيد خربوطلي في المنتدى فرسان الأبحاث التاريخية
    مشاركات: 3
    آخر مشاركة: 05-27-2014, 07:48 AM
  3. مشاركات: 0
    آخر مشاركة: 12-05-2012, 02:59 AM
  4. مشاركات: 0
    آخر مشاركة: 09-13-2012, 08:03 AM
  5. "فيسبوك" أكبر أداة تجسس عالمية.. و"ياهو" و"جوجل" واجهتان لـ"cia"
    بواسطة شذى سعد في المنتدى فرسان التقني العام.
    مشاركات: 1
    آخر مشاركة: 10-21-2011, 07:52 AM

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •