منتديات فرسان الثقافة - Powered by vBulletin

banner
صفحة 2 من 3 الأولىالأولى 123 الأخيرةالأخيرة
النتائج 11 إلى 20 من 25
  1. #11
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    آه يا شرقاوى يا مصرى(1 )


    الحقيقة و باختصار

    أنت يا صاحبى نهار

    فيه عيون بالحب تدمع

    لما يغويها المزار

    ويراودها عن صباحها ...

    عن غناويها العمار

    عن ألمها ... عن وجعْها

    لما شافت مصر عايشة

    عـ الجراح و يا الدمار

    من سنين نكسة و تاهت

    بس رجعت بالمرار

    إيشى صِفر فـ مونديالنا

    إيشى عبَّارة وقِطار(2 )

    إيشى إنفلونزا جايه

    للطيور ومعاها نار

    عاوزه تهجم يوم علينا

    زى طوفان التتار

    آه يا شرقاوى يا مصرى

    يا للى نيل الخير رواكْ

    يا للى إبداعك فتنَّا

    و الجميع يشهد معاك

    لو جميع الخلق باعت

    و لا ضاعت ف الشِّباك ْ

    عمر مرَّة ما بعت صاحبك

    فى طريق لو كان معاك
    __________
    (1) بعد أن قرأ الشاعر الصديق عاطف الجندى قصيدة الشاعر ( إحكى يا سطور الغناوى ) كتب هذه القصيدة وأهداها إليه .
    (2) العبارة : المقصود عبارة سالم إكسبريس التى غرقت فى عرض البحر ...
    والقطار : المقصود به قطار الصعيد الذى احترقت عرباته بركابها

  2. #12
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    إيه اللى جرى ؟


    إيه اللى جرى للدنيا يا ناس ؟

    رزع وخبط بدون إحساس

    ميكرفونات على طول بتزعق

    ماليه الدنيا صياح وخلاص

    كله بيصرخ جاى ورايح

    يملا شرايطْ ...

    يملا صفايحْ

    والله يا ناس دا حرام وكفاية

    وبلاش غم و كتر فضايح

    إيه اللى جرى للدنيا يا ناس ؟

    رزع وخبط بدون إحساس

    والمحروس بيعبى جرابه

    مش عامل للآخرة حسابه

    دى الأيام بتفوت وبتجرى

    والموت هـــ يخبط على بابه

    ويقول له تعالى يا أستاذ

    إيه اللى جرى فى الدنيا يا ناس ؟

  3. #13
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    هوّ الدرة محمد مات !!



    أنا كنت مرة مع اولادى

    بنقلّب فـ حروف الماضى

    ونفتح بعض الصفحات

    وبـ نسألْ عن معنى حاجات

    سألونى سؤال ببساطة

    هوّ الدرة محمد مات ؟

    قبل مـ أجاوب بالكلمات

    نزلت دموعى تقول حكايات

    جاوبت دموعى عليهم .... لأ

    الدرة ساكن فى النبضات

    الدرة واحد مـ اللى صورهم

    عايشة تنور فى الصفحات

    الدرة طفل وأسمه هـ يفضَلْ

    قيمة ورمز لكل ثبات

    الدرة عايش جوه قلوبنا

    حق وساكن فى النبضات

  4. #14
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    يا نبض الروح


    يا صاحبى ....

    يا حاسس بأحوالى

    يا نبض الروح فى موالى

    احترت انا فيك

    وازى أراضيك ؟

    وانا باقى عليك

    أنت يا غالى

    يا صاحبى ....

    يا رفيق كفاح عالى

    تعالى أفكّرك تانى ...

    اللقمة زمان .... قسمناها

    والفرحة كمان .... حضنّاها

    والدمعة اللى على خدودنا ...

    بإيد واحدة مسحناها

    والغربة اللى على جبينّا

    فى حب بلدنا خُضناها

    وكلمة مصر فـ ضلوعنا

    ما جينا فـ يوم نسيناها

    وكلمة مصر فـ قلوبنا

    فى عز الشدة صُناها

  5. #15
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    تعظيم .. ســلام



    تعظيم.. سلام يا وطن

    يا أعظم الألقاب

    تعظيم .. سلام يا وطن

    للى بيصون التراب

    واللى رمى جزمته

    فـ وش عشاق الخراب

    واللى بيقول كلمته

    من غير سؤال وجواب

    واللى بيعيش ثورته

    رغم أنواع العذاب

    تعظيم .. سلام يا وطن

    للى عمره ما غاب

    واللى دخل جنتك

    من أوسع الأبواب

    تعظيم .. سلام يا وطن

    يا أعظم الألقاب

  6. #16
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    فى الأساس احنا الغلط


    ليه قلوبنا اتفرقت ؟

    ليه نفوسنا اتغيرت ؟

    والملامح والوشوش

    فى غرابة اتبدلّت

    ليه نبيع فينا ...

    الضماير ؟

    ليه نفّرط فى ...

    المصاير ؟

    والحقايق فينا تاهت

    والخطاوى اتبرجلت

    ليه نلوم غيرنا بسذاجة

    فى الأساس احنا الغلط

    فى

    الأساس

    احنا

    الغلط

  7. #17
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    وليه نعيش أغراب ؟


    تعالوا نحضن شمسنا

    نفتح لها الأبواب

    ونسيب للفجر طاقة

    و نسيب للشمس باب

    ونخلى الحب ينطق

    ويبدّد فى السحاب

    خلى الشراقى تطرح

    وينّور التراب

    وتضحك السنابل

    وتطرد الخراب

    حبل الفراق ضعيف

    وليه نعيش أغراب ؟

    وليه

    نعيش

    أغراب ؟

  8. #18
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    أيام رمضان

    طهّر قلبك بالإيمان

    واعلن عصيان الشيطان

    دا مواسم للخير مفروضة

    أعظمها أيام رمضان

    اتقوى بالصبر فى صومك

    واتسلح واقرا القرآن

    واتعلم مـ الصوم أحكامه

    واتأمل معنى الرحمن

    واتعلم إيه معنى الجوع

    واتحسس حال الموجوع

    دا ميزان الخير مرفوع

    فى الآخرة ديما كسبان

    طهر قلبك بالإيمان

    واعلن عصيان الشيطان

    دى مواسم للخير مفروضة

    أعظمها أيام رمضان
    ________
    نشرت فى جريدة المساء
    عدد السبت 12 / 9 / 2009
    ومجلة اتصالات المستقبل عدد سبتمبر 2009

  9. #19
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    خلى توب الصبر حِصنك


    يا بن بلدى ... صون بلادك

    أوعى مرة تبيع ضميرك

    خلى يوم وعدك سلاحك

    يجرى ويجيلك نجاحك

    والبشر يشهد بدورك

    خلى توب الصبر حصنك

    والفضيلة فـ حكمتك

    يعلى ويا العدل أسمك

    لما تُصدق كلمتك

    خلى باب الصبر بابك

    وأنت عيش صاحى الضمير

    تلقى كل الناس صحابك

    تحصد الخير الكتير

    يا بن بلدى ... صون بلادك

    أوعى مرة تبيع ضميرك
    _________
    نشرت فى مجلة اتصالات المستقبل
    عدد مارس 2009

  10. #20
    اختصاص تراجم وسير ذاتية من مصر
    تاريخ التسجيل
    Feb 2008
    المشاركات
    1,562

    رد: ديوان الشاعر والصحفى إبراهيم خليل إبراهيم

    الفن فين يا حُلم (1 )


    ضاع النغم مـ الوتر

    والوش جننى

    والفن حاله اتعوج

    وأنا لسة مستنى

    تعالى عيد فننا

    يا عندليب غنى

    يا مسك أهل النغم

    يا كف متحنى

    هاجرت طيور الغنا

    ما اعرفش راحت فين

    كل الأصيل اغترب

    وتاهت العناوين

    كل اللى فاضل نشاز

    قاعد على الصفين

    زى الردئ الهزيل

    عايم على الميا

    أما الأصيل فى النغم

    بيدفنوه فى الطين

    يا عندليب فننا

    شوف الطرب مالُهْ

    دحاله أصبح عدم

    تعالى شوف حاله

    بقى النغم درَبُكهْ

    فى كل أحوالُه

    والكل غاوى غُنا

    فرحان بمواله

    والحظ لو يخدمه

    يبقى النقيب خالُه

    تمشى الأمور والسكك

    تِسلك وتحلى له

    يا عندليب النغم ...

    سيرتك خلود فـ خلود

    فنك برغم السفر

    فوق الجميع موجود

    والغصن مهما دبل

    يفضل عبيره يجود

    والتوبة فيها الشفا

    زى الهوى وموعود

    الفن فين يا حليم ..؟

    عمر اللى راح ميعود ؟!

    ____________
    (1) الفنان الراحل عندليب الأغنية العربية
    نشرت فى مجلة اتصالات المستقبل
    عدد يوليو 2009

صفحة 2 من 3 الأولىالأولى 123 الأخيرةالأخيرة

المواضيع المتشابهه

  1. العلاقات النصية في ديوان ( الورد يحلم بالسفر ) للشاعر / إبراهيم خليل إبراهيم
    بواسطة ابراهيم خليل ابراهيم في المنتدى فرسان الأبحاث والدراسات النقدية
    مشاركات: 4
    آخر مشاركة: 03-01-2012, 12:16 PM
  2. رؤية نقدية حول ديوان ( إحكى وقول يا ورق ) للشاعر إبراهيم خليل إبراهيم
    بواسطة حامد ابراهيم في المنتدى فرسان الأبحاث والدراسات النقدية
    مشاركات: 3
    آخر مشاركة: 03-22-2010, 10:52 PM
  3. ديوان جديد لإبراهيم خليل إبراهيم
    بواسطة حامد ابراهيم في المنتدى فرسان الأدبي العام
    مشاركات: 1
    آخر مشاركة: 01-13-2010, 07:59 AM
  4. سفر الشاعر إبراهيم خليل إبراهيم
    بواسطة حامد ابراهيم في المنتدى الشعر العربي
    مشاركات: 3
    آخر مشاركة: 01-02-2010, 07:59 AM
  5. قلبى على بابك .. ديوان جديد للشاعر إبراهيم خليل إبراهيم
    بواسطة ريمه الخاني في المنتدى فرسان المكتبة
    مشاركات: 1
    آخر مشاركة: 02-10-2009, 07:08 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •