طار البجع..

طار البَجَع : (زجل)

ياعيون قلبي الـ زحلقوكْ بـْ بير
ياطفل خرمشني بوجهي كتير
ماكنت تِكْبَر ياحبيب القلب
وما عرفت اني مْجَنِّني مْخاتير

خليك دفيان وبحضني سهار
خليك دايب والتلج ينهار
لوِّح بإيدك للعشق لحظات
بتشوف سبع نجوم عالزنار
عم يبرموا داير مَدَار الكون
وسبعين عبد يقَشّروا الصَّبار
عن كل أحلامي اللي شفتا فيك
وعن كل نغمةِ هَزِّت السمار

خليك بيحضني يا فيض العمر
خلي الربيع يشَبِّك الأقمار
تاحطهن أطواق عاصدري
ويحكي الحلا قديش عم بيغار
تارَجِّع طيور السما أسراب
ونايات تدلقني على التذكار

وغني مع العشاق لَيْلِيِّةِ

وإتعلق بْـ حبل الشتي الهدار

ويتسابقوا علينا أهالي الحي
يتنَصَّتوا بـْ قلب العتم والضَّي

ومتل الصَّحَافِي يِكْذبوا عَنَّا

_قال شو؟؟؟!!!

لولانا البَجَع ما طار !
***
دمشق: فردوس النجار