رد على قصيدة "غرقتيني ف بحر جمالك"
لأخينا الشاعر حسني عبد الله جاد:
التي أنهاها بقول "لازم أكتـب والله عليكي"
============
لازم أكتـب والله عليكي
لازم أكـدب والله عليكي
كله محصل بعضـه يا سيدي
دي مراية سودة، كلام تقليدي
خليـك يا بني تملِّي سبـور
قول للحب "ف داهية، وغور"
دي بنات حوا اشكال والوان
وكله يجيب لك يا بني جنـان
ليه تتـذلل؟ ليـه تتمطـوح؟
ف حبال دايبة، ومالك مطرح
قلب الست ده ميّـة حبك
ضـربة شمس تبخّـر إسمك
وانت يا عيني تبـات محتـار
وتلـوم نفسك ليـل ونهـار
اسمـع مني وخـد بكلامـي
ده كلام صح، ومش أوهامي
عيون الست عيـون كدابـة
دقات قلبها صـوت م الغابة
ما تعـوز منك غير مصالحهـا
تمصمص روحك من لغاليغها
وان جيت مرة تقول يا فرامل
تبقى مصيبـة وأوعى تحاول
تنتهي يا بني في كيس، متقطع
وهيّ ف ورْثَك كله تبرطـع
أصل الست مزاجهـا يا سـائل
يوم ف العالي، ويوم ف النـازل
مـرة تحبك ، مـرة يا سـاتر
مـرة تصيبـك رفسة حـافر.
اعمل بقى شـربة ومحاليـل
غيـر دمـك بالتحاليـل
شيل حبهـا م الشـرايين
يكمل عنـدك "كوول" الديـن.
