خُرمْ الأُزون 00!!
كفَّارة يا بن البلد
السجن للجدعان
مفيش جدع اتولد
فيها خيخه ولاَّ جبان
*****
الخوف لجمنا بدرِّي
اللي قال وأنا مالي
واللي بجاحة يقول
سبني أربي عيالي
****
واللي ركب الموجة
أسمه راح عن بالي
واللي كتب ع الورق
حبة أشعار يا خالي
*****
قلبي اتعلق بالسما
من غيره يرأف بحالي
لمَّا شافني المفتري
عيني ع الفضا طوالي
قال وكتب ف الصحف
أحلامي وكل أمالي
*****
قال يداري الجرايم
خرم الأزون إتخرق
قربت تقوم القيامة
هو شعاعه لو برق
يبقي سبب وعلامة
يخللِّي البلاد تتحرق
*****
باكس وعينه جامده
وعليه نعرة و قيامه
ويقول ويلوي بوزه
ع الدنيا يالله السلامة
****
بيقولي دمك هايندلق
ميَّة علي أرضها
أو راسك بكره تتفلق
م التفكير ف أمرها
و اللي جري و صابك
الحق قبل خراب مالطة
وخد نصيبك و منابك
كل حاجة بتتسرق
وان عملت بقي شاطر
جوه السجون متحضر
حبة كرابيج وفلقْ ( 1 )
ـــــــــــــــــــــــــــــــــــــ
( 1 ) فلقْ = أدوات تعذيب
