أمـيــن و بـهـيَّــة_حـكــايــة مـصــريــة_في حـلـقــات

الحلقة الأولى

أمين اسمي
والمحروسة أمي
والأب حلواني
وجدي النيل
عظيم وأصيل
وألوانه في ألواني:
أسمر بلون الأرض والفيضان
وأبيض يوم القطن ما يْفَتَّح
وأخضر كما الزرع فِ الغيطان
ووردي كما الزهر
طول الدهر
على الأغصان بيتمرجح.

حبيت صبية
بهيَّـة
جمالها رباني
وطلعتها ندية
اسم جدتها بهيَّـة
والأم طبعاً كمان بهيَّـة.

كان قلبي دايب في هواها
والشمس طالعة في سماها
والحب في لمسة أيديها
تفضحه نظرة عينيها.

كنت اشوفها يوماتي
وكمان ليلاتي
حتى امَّها ناديتها "بحماتي"
والبلد قالت عليَّا
بالمشاورة دا جوز بهيَّـة.

كنا طبعاً لسه عيال
ومغمضين، وحالتنا حال
تلامذة لسه في المدارس
فِ قرية واسمها "الرب حارس"
ماشيين، وعايشين
كده ع السجيّة.

ولفِّت ايامنا وأحلامنا هِيَّا هِيَّا
وبهيَّـة زادت ف الحلاوة مِيَّـة مِيَّـة
واحتشامها زاد من مقامها
وحْلِفْتْ يومها ميتين يمين
لاتْجَوِّزِك، والكل عارف مين أمين.

الحلقة الثـانيـة

ولف الزمان زي القوام كمان لفة
وللبنات الستر والعفة
والخُطَّاب بَدَأُم يطوفوا
ببيت ابوها، واستغلوا كمان ظروفُه
والكل طمعان ف اللي قلبي حبَّها
تقول: "أيوه"، ولو حتى من ورا قلبها.
فرشوا قدامه الفلوس
إكوام كتير من غير عدد
وِاتْزَغْلِلِتْ مِنُّه النفوس
وشاف في نفسه شيخ بلد.

وامُّ البهيّة دماغها لَفِّتْ من كلام
صقر أفندي ابن عم الشيخ إمام
أصله في البندر ومتغندر
ريحته كَالونيا، ومكسبه آخر تمام
ساب بلدنا وربنا فاتح عليه
والتراب يبقى جوهر
وكفاية بَسِّ يلمس إيديه
شُغْلُه في حاجة كده افْرَنْجي
اسمها بنجو، وهو فيها واد بِرِنْجي
وكل أصحابُه وأحبابُه من وزارة الداخلية
يعرفوه بالإسم، ومَالْكُم يا خلق يمين عليا.

الحلقة الثـالثـة

واسماعين شلاطة كان مخبِّي
تحت البلاطة ثروتُه
قال بهيَّـة بهية، وراح معبِّي
اللي عنده في جيوبُه وشنطتُه.
واسماعين أنا عارفه شاطر
كان عنده بيت وفيلا ف القناطر
والناس في بيتُه ياه كتير
واقفين نظام في الطوابير
أصل إيدُه خفيفة، وبيضرب الحقنة بمزاج
وعشان كده ناس دِنيا تيجي له للعلاج.
حتى مأمور القناطر راح له كام مرة زيارة
وخد معاه عسكر، وقالوا كَتْ زفة بحرارة
والجرايد يا ما قالت، ويا ما ناس صوروه
ومرة واحدة واختفى، حتى أهله ما زاروه.

الحلقـة الرابعــة

والحاج زَهران القُماطي
من دولة طالَّة ع الخليج
ركِّب طقمِ سْنانُه الاحتياطي
اللي فصَّلوه لُه فْ أبو تيج
وِجَهْ وعُكَّازُه ف يمينه
والمسك بيعطَّر جبينه
والذِّكر ما يفارق لسانه
أصله في زمانه
كان يِخَدِّم ع الحجيج
وكلامه آخر لطافة
أصله مولود في الرَّصافة
بس اختصاصه - إكْمِنُّه هادي ومستقيم -
تسفير البنات الصبايا والحريم

قال لابوها ليك عندي يا عم فيزا
حلوة ولزيزة
معجونة بسكر واسمها الحاجة عزيزة
خدها يا سيدي مكان بهيَّـة
وفوقيها مني كمان هدية
وِبِصْبَاعُه شاور نَط عنده اتنين عبيد
شايلين صُرة تقيلة وقالوا: إتفضل يا سِيد.
ما عرف حد فيها شوية أو كتير
فيه اللي قالوا شافوا لَمْع الدنانير
وفيه اللي قالوا إنها اتْواب من حرير.
ما فهمش أبوها منه حاجة يومها بالمرة
لكن عينه فَنْجِلِتْ م اللي رآه في الصرة.

الحلقـة الخـامســة

ولما فاض خلاص الوجد بيَّـا
رغم حالي وقُصْر باين في إيديا
رحت لابس هِدمِتي
وسلاحي نفسي وعزتي
ومشيت ورا قلبي وسمعت صرخة مهجتي
ودخلت على أهلي وناسي
بقلب حديد، ومرفوعة راسي
قلت: سلام الله يا خالتي ويا خالي
بهيَّـة حالي ومحتالي
لاجلها باسهر ليالي
في الفرح أملي، وفي الضنا موَّالي ...

وقبل ما يتم الكـلام
قالوا: إسمع يا أمين
بعد ما نرد السلام
بهيَّـة لك، لو إنكم شاريين
قلت: ورب العِزَّة أنا شاري
قالوا: إنتَ عارف في الأصول
وعشان نقول مبروك وينكتب الكتاب على طول
من غير دوران ولا حبكة
يلزمك مهر غالي، وكمان شَبْكة
وعفش مُدْهَب، وقعدة بِرْحَة
في شقة شِرْحَة
حاجة تسر القلب والخاطر.
-وانكسر قلبي وانا حاضـر-
قلت لهم: منين؟ قالوا: خلاص سافر
بلاد الله واسعة ولكل مِجْتِهِدٍ نصيب
وبهيَّـة تستنى عليك واحنا عارفين انت الحبيب.
قلت: طب نقرا الفاتحة في دي القعدة
قالوا: لما ترجع يبقى كله ف ليلة واحدة

قلت: أيه رأيك يا بهيَّـة
ف اللي صاير واللي صابح؟
قالت: كلام ابويا يمشي عليّا،
وهو أدرى بالمصالح.

الحلقـة السـادسـة

وباقي الحكاية كلنا عارفينها
أصلها طايرة بس كلنا فاهمينها
القلب مطعون والقصة حافظينها
ولما الدبيحة بتقع تكتر سكاكينها
والحب عمره قصير، والدنيا وساكنينها
وانا مش لوحدي أمين، والدنيا مين يآمنها!

===

أنا مُبتدا
وآدي الخبر
بالمختصر:

الحلقـة السـابعـة

أنا مُبتدا
وآدي الخبر
بالمختصر:

أنا ابن آدم اللي انقتل على إيد أخوه
أنا اللي عقد عمره انفتل
بعد قربان قدموه
ومشي القتيل، محمول تقيل
مشوار طويل
لاجل لازم يدفنوه.
واتردم على وشه التراب
وهو شباب
غض ونبيل.

وركبت مع نوح سفينة المؤمنين
واللي ورُّونا العذاب غِرْقُم، واحنا كنا الشاهدين
السما هاجت
والأرض ماجت
وموجنا بيتهادى واحنا جُوَّا السفين
سالمين.

ومشيت ورا إدريس من الضلام للنور
يبدد كلامُه الجهل، والعلم يآه بَنُّـور
قالوا عليه أوزوريس
وكله كلام تهليس
ده الرب واحد، والخلق -مرة- عبيد
إيشْ جاب ضلام الوثن لكلمة التوحيد؟
وف السما الرابعة مكانه وكلنا عارفين
يا بخت من نال مراده وحَبُّه رب العالمين.

الحلقـة الثـامنـة

ولما صدع بالحق إبراهيم ورماه
ناسه ف جحيم هايجة، كنت انا ويَّاه
شاهد عَيَان لما قوام وصل القرار
كوني برد وسلام! وأيش تسوِّي النار؟
وراح بنى بيت الله في قلب صحرا خواء
وكنت م الحجاج من غير طعام ولا ماء
عبرت المرافي والفيافي، وصارعت أيش تعابين

وكان ولاد الإنس أعتى من الشياطين
ما بيقتل بني جنسه غَدْر إلا البني آدمين!

ورافقت يوسف في بِيرُه، وقالوا عليَّا الديب
والسجن له مساجينُه، ولا عَدَّاد وحسيب
وِمْرَاتِ العزيز بعد الفضيحة تتوب
ومين يعيد الزمن، وينصر المغلوب؟
وطالني الظلم من تاني والهوان مع بنيامين
والحق لازم ينتصر، والرب جنب المظلومين.

الحلقـة التـاسعـة

وصلبني فرعون زمانه واتسجلت أساطير
تحكي عني وعن إيماني والْجَلْد والتكدير
عبرت البحر مع موسى، نبي الله وكَليم
واتحملت مع عيسى أذى اليهود والضيم
وآمنت بالمصدوق عليه الصلاة وتسليم.

كنت انا المقتول على إيد ابو جهل بالسيف
كنت عمّار وبلال وصهيب وكل ضعيف
في الجسد، لكن إيماني تندك منه عروش
لا يهزه مُلْك وجاه، ولا ينحني لقروش.

على إيدي مات ألافات من مغول وتتار
وخَيْر جُنْد الأرض في الحديث أطهار
لا همني نابليون ولا انجليز ولا عيلة مالكة
وبلسان عرابي صرخت: يا أسرة مايعة وهالكة
متى استعبدتم الناس والأمهات بِيِوْلِدُم أحرار؟

وراح الخديوي والملك والكل فر وغار
بعد ما حفرت القنال وضهري فيها انجلد
ودفنت فيها الأب والأخ والحبيب والولد
وقلبي يا ناااس في القنال مدفون
وبعد الغرق أطلع كمان مديون؟!

الحلقـة العـاشـرة

وهبّيت مع الثورة وبدمِّي ارتوت فدادين
وف مذبحة طرة إخوانجي مع المساجين
ومن غير تهمة أعدموني ف قلعة صلاح الدين!
وبعد العزا ما انفضّ قالوا "زعيم تكفير
وكل من قال كلامه إرهابي عريق وخطير"
وقبري ما له جيوب، ويعَبُّوا بالقناطير!

وغرقت في النوبة مع النخيل والدور
ومفتاح بيتي في إيدي مهما ألَفّ وادور
وعضمي ف جدار السد ودمي يسيل ف بحور
يحيي موات الأرض ويمحي الأراضي البور

ولما ثار الضمير قالوا نمسح إسرائيل
لبيت نداء النفير، وادُّوني سلاح تمثيل
وشلته وقلبي م الحنين لهفان
أتاري إيد الخيانة بتخيَّط الأكفان
وخدني العَدُوّ أسير في نكسة مالها مثيل
وما رِضْيُم يبادلوني؛ أصل الكلام تضليل.

وعبرت بارليف باكبَّر، والعَدُو سابت مفاصله
وكنت الشهيد الحر، والحر معروف بأصله
ودبحتني إيد الخيانة بمعاهدة مليانة إهانة
وكنت من تاني ضحية وقالوا فرَّط في الأمانة
وكيف أفرط في الأمانة وانا اللي إسمي أمين؟
لكنه قضا ومكتوب ولزماً تشوفه العين.