مهذّبون

https://fbcdn-sphotos-b-a.akamaihd.n...8a44b4a7550c87

مهذّبون

كان خبر صاعقة .. لما مدرّسة الحضانة قالت لى ابنك عنده مشكلة فى التواصل بالعينين Eye contact
ماكنتش فاهم .. بس لما شرحت لى قالت لى ابنك عنده مظهر من مظاهر التوحد Otism لما قريت عن الموضوع ده ..اكتشفت انه فعلاً بيتصرف تصرفات كتير من اعراض التوحد بالاضافة للتعليمات اللى كان لازم اخد بالى منها
- ماتبقاش اوضته فيها الوان كتير
- لما ييجى يذاكر .. يذاكر على مكتب نوعا ما فاضى
- ويبقى المكتب قدام حيطة لأنه داخلياً بيبقى رافض انه يمشى فى نظام او يستنى دور

طبعاً كنت رافض جداً انى اروح بيه عند اى دكتور للعلاج مش رفض للعلاج .. لكن ماقبلتش فكرة انه عايز علاج اصلاً لأنى مؤمن ان طاقة حب الأب والام
ممكن تخليهم يغيّروا ويعالجوا كمان احسن من الدكاترة حتى لو كلامى ضد نظريات علمية بس دا اللى حصل معايا فعلاً وقررت انى احاول بنفسى انى اخلّيه يركز معايا القصة ماكانتش فى التواصل بس .. كانت فى الاهتمامات كمان وطريقة التعبير عن نفسه .. ودرجة تقبله وتعامله مع اللى حواليه
بقيت ارجع من شغلى .. اخده وانزل بيه الشارع واحطه على رجلى .. واعمل اراجوز عشان يبص لى بعينيه فى الاول كان رافض .. او مش قادر
لكن بعد فترة مش قليلة .. ابتدا يستجيب كنت ارجع من شغلى ..
اول حاجة اعملها اخده فى حضنى واطبطب عليه كان يشاور لى على باب الشقة عشان ننزل
ماكانش بيهمنى انى راجع تعبان ..ولا انى هانزل واطلع 5 ادوار على رجلى وانا شايله من غير اسانسير كل همى .. انه لما يكبر يبقى طبيعى الغريب انى كنت بارجع من شغلى الساعة 4:45 بالظبط فى التوقيت ده كل يوم ..
كان يسيب اللى فى ايده وحتى لو حد شايله كان يفضل يعافر لغاية ما يحبى ويقعد ورا باب الشقة ويثبت عينيه على الأوكرة من جوة .. مستنيها تتحرك
وسط استعجاب الناس كلها .. ازاى بيعرف الوقت ؟؟ ... بعد فترة طويلة .. وقرب دخول المدارس .. قالو لى لازم تروح لدكتور عشان اختبارات دخول المدرسة
روحت لدكتورة معروفة جداً .. وقعدت احكيلها عن كل اللى حصل
قالت لى قبل اى حاجة لازم نعمل له اختبار درجة التوحد .. وفعلاً عملناه
بعد الاختبار .. قالت لى شوف بقى .. الأعراض اللى انت بتحكي انها كانت موجودة .. بتقول ان درجة التوحد مش اقل من 30 نتيجة الاختبار .. بتقول ان ابنك عند درجة 19 ودى درجة طبيعية جداً .. موجودة عند معظم الناس
وقالت لى بالحرف .." أستاذ امير .. انت عملت معجزة مع ابنك وعالجته بحبك وانت ماتعرفش " قالت لى كمّل فى اللى انت بتعمله .. وانا واثقة ان ابنك هيبقى حاجة كبيرة فى المستقبل ..
ورغم انها دكتورة غير مسيحية ..قالت لى .. انا حاسة انه هيبقى حاجة كبيرة فى الكنيسة عندكم ..وقالت لى حضرتك مش محتاج تروح بيه لأى دكتور تانى
انت بحبك ليه هتعمل حاجات كتير
ماخلصتش الحكاية ..دخل اختبارات دخول المدرسة ..وللأسف المديرة اخدت بالها انه مش مركز معاها اصلاً قالت لى بالحرف .. احتمال كبير ان ابنك ماينفعش فى مدرستنا لأنه مش هيركز مع اى مدرّسة المهم ربنا سهل .. ودخل المدرسة .. ووسط زعيقى وعصبيتى عليه وقت المذاكرة عشان يقدر يحصّل زى زمايله ابتدينا نكتب الحروف "ب" بطة .. ومن كتر زعيقى فيه .. نزلت دموعه قدام دموعه وقفت .. سألت نفسى سؤال هو الغلط عنده ولّا عندى؟
اتفرجت بالصدفة على فيلم قصة حياة المعجزة "هيلن كيلر" The Miracle Worker ساعتها قررت اعترف ان الغلط عندى وشلت الكراسات والورق رميتهم
ورسمت بطة .. ولزقتها على الدولاب وقعدت ارقص وانا عامل ايديا شكل حرف الـ "ب" وشلته وجرينا على صورة البطة سوا .. قام ضحك قلت له "ب" ايه يا حبيبى .. قاللى "ب" بطة قلت لنفسى Yes I did it
لحد هنا .. طبيعى انه يعرف ان "ب" بطة لأنى انا اللى علمتها له المفاجأة كانت تانى يوم لما رجع من المدرسة قاللى كلمة خليتنى اتشليت عن التفكير
قاللى اقولك "ب" ايه تانى؟
قلت له ايه؟
قاللى "ب" .. بابا
مش قادر اوصف سرعة نزول الدموع من عينيا
الطامة الكبرى كانت بعد اقل من شهر لقيت مدرّسة الفصل طالبانى .. حطيت ايدى على قلبى .. وكلمتها قالت لى .. هو انتو بتتعاملوا مع ابنك دا ازاى ابنك عايز طريقة معاملة خاصة انا مش عارفة اتعامل معاه كل الطلبة ليهم طريقة .. وابنك لوحده عايز طريقة تانية قلت لها انا هاتصرف .. وانا مش عارف هاعمل ايه كنت فى العربية .. دموعى نزلت وانا سايق مالقيتش غير الوحيد اللى لما بنطلب منه مابيرجعناش زعلانين
وقلت له .. انت الوحيد اللى عارف كل حاجة وعارف انى مش هاستحمل انه يطلع من المدرسة وربنا هدانى لفكرة .. عيد ميلاده فى 31 اكتوبر 2008 ..
عملت حفلة وعزمت مدرّسة الفصل وقلت لها لو شافك بتتكلمى معايا .. هيطمن لك لأن من بقايا اثار التوحد .. ثقته اللا متناهية فى ابوه وفعلا كانت الحفلة ليها تأثير معجزى من بعدها بقت هى نفسها تقوللى دا بقى اشطر ولد فى الفصل مابقيتش عارف اقول لربنا ايه بس ساعتها عرفت ..ان اللى عنده ولاد .. عنده امتحان من ربنا لازم يذاكر طول الوقت .. عشان ينجح
ويمكن يكونوا ولادك .. هم التصريح اللى هترفعه قدام ربنا عشان يدخلك السما ..
على فكرة بقى ..
انتوا احسن مدرسين ممكن تذاكروا لولادكم واشطر دكاترة ممكن تعالجوهم
انتو اللى عارفين ايه بيضحكهم وايه بيزعلهم
انتو اللى عارفين نظراتهم وهم مش فاهمين
انتو اللى بتحسوا بيهم لو خايفين من اى حاجة غلط عملوها
دوّروا على المتعة فى انكم تربوا ولادكم
وتعيشوا معاهم كل ظروف حياتهم .. هتشوفوا العجب
الكلام اللى فوق ده .. مش مجرد قصة ..
دى حكاية اهم تحدّى عشته فى حياتى
وممكن يعيشه كل اب وام
ولادهم اهم حاجة فى حياتهم
‫#‏إرفع_شعار_راقي_بأخلاقي‬
‫#‏مهذبون‬

Unlike

قصة رائعة والله.
شكرا لمشاركتنا في قراءتها.