عندك مكعب ماجي...بقلم آرا سوفاليان
عندك مكعب ماجي...بقلم آرا سوفاليان
ـ مرحبا عندك مكعب ماجي
ـ كم دكانة فيه بهل حارة؟
ـ والله ما عديتهون...وأنا غريب ومو من هل حارة.
ـ شفتك عم تسأل جاري
ـ صحيح بس الاحسن تلتفت على شغلك وتنضف هل دكانة يلي طالعة ريحتها، أحسن مو آعد عامل رائوب علفايت والطالع.
ـ مو رائوب بس شفتك طالع من عند جاري وأكيد كنت عم تسألو علـ ماجي.
ـ سيدي كنت عم أسأل جارك علـ ماجي بس علـ ماشي... وئال ما عندو...يعني هاي الشغلة بيروح فيها قتلى؟
ـ لا سيدي ما بيروح فيها غير الصبر، لأنو ما في، عم نبعت المهرّب على تركيا مشان الماجي، فمهما سألت ما في ولا رح تلائي... بس... أنا عندي...لكن سعرو ما رح يعجبك.
ـ سيدي السوق عرض وطلب...بس اذا كان عم تبعتو المهرب على تركيا مشان مكعب ماجي فهلئ رح تئلي سعرو 1000 دولار.
ـ سعرو 100 ليرة شو رأيك
ـ يا زلمة باين عليك نصّاب دولي بس معليش هاتو
ـ ما سألتني ليش 100بـ ليرة ؟
ـ ما بدي اسألك
ـ سيدي لأنو الشغلة شغلة ذكاء واذا كنت ذكي بتعرف.
ـ سيدي ما بدي أعرف لأنو أنا بالأساس مو ذكي وهاي هيك خلئة، وانا طبعاً ما بوصل لمستواك بالذكاء، ومشان هيك ما ئبلوني بالمدرسة وأنا صغير.
ـ طيب رح ئلك من الآخر ...كيلو اللحمة بئديش؟
ـ ما بعرف لأنو اللحمة بورصة
ـ يا سيدي العجل 1000 ليرة واذا شرحة بيصير بـ 1200 والغنم دوبل بمعنى خلينا نفترض 1000 ليرة أي كيلو لحم ومكعب الماجي هادا اذا فلفلت الرز على مرئتو بيعطي ذكاء للألكلة اكتر من كيلو لحمة الغنم فشو قيمة الـ 100 ليرة قدام الطعم الزاكي؟ بمعنى أدفع 100 ليرة وخلي الـ 900 بجيبتك بيلزموك لشي تاني...شو رأيك؟
ـ قصدك كيلو اللحمة العادية ولا هديك السياحية؟
ـ شو هاي السياحية؟
ـ السياحية هي لحمة الغنم العواس المسوفة او الشقف أو الشرحات أو اللوازق أو المتلة أو السناسل وفيها شرحات ليّة وعصاعيص؟
ـ شو هاي العصاعيص؟
ـ ما بتعرف شو العصاعيص؟
ـ لاء
ـ مانك مجرب تاخد شي عصعوص بالعضل؟
ـ لاء
ـ ما هو مكعب الماجي تبعك بيستخرجوه من العصعوص يلي جنب العضل.
ـ تبع شو؟
ـ تبع الشيء الزاكي المفلفل! نحنا بانشتاين واحد مو خالصين.
ـ وين رايح ما بدك مكعب الماجي؟
ـ خليه عندك مشان اذا صار عندك عزيمة لشخص مهم، اشتري عصاعيص وطبخون مع مكعب الماجي تبعك وفلفل عليهون رز وشوف الطعم شو بيطلع زاكي... يلعن اخت هلزمان يلي حط بطريئي واحد من نمرتك...يخرب بيتك...ولك حتى أزمة نحنا مو لابئلنا من خمسطعشر ليرة لـ 100 ليرة، ئبلانين بس بدون علاك مصدّي ومقارنات وتبريرات...ضربة تخلع رئبتك.
آرا سوفاليان
كاتب انساني وباحث في الشأن الأرمني
دمشق 28 06 2013
arasouvalian@gmail.com
