طــــل ...
مامعذور..كل دمعي البجيته اعليك
مامعذور..جي لنك زغير وعالزعل دلوك
مامعذور..
خوفي وكل صلاتي انخاك
يااجمل حلم راودني كل وكتي
يااحله الاسماء من ارد اصيحلك
غاضوك مني..
وغيضهم ماكدرو ايسموك
دللتك عكس ماجرحتني اهواي
حبيتك رغم كل الغرابه البيك
صورتك نهر وأنه العطش للماي
عطشت النهر جي أنه اعله جرفك
عكس ماذبو حجر غايتهم ايسدوك
وصورتك قفل ومضيع المفتاح
مايرهم القفلك غير مفتاحي..
عجيب اشلون فكوك!!
وكتبت اشيائي واشياءك عله الحيطان
صوت
وماذنه
وبيبان
تغفه انت وافز أنه ورق من تاكله النيران
خيط بلون وجهك ينعكد بالطيف
وجنح
واحجايه
وأذان
وارسم اعله اشياءك اجمل لوحه للعشاك
تشبه اصوات العصافير الغروب
وعله اشيائي تلكه دمعه
وتلكه أسف..
وتلكه كل الناس عين
منين ماردتك خذوك
وشفت اكدر اصيرلك ورقة الصفصاف
وأنت الطل..
من ابرد احس بيك النده
والغيره عد الناس من طبع الفضول
وانه شدهة بال تاخذني وخذوك
وأنه كلي انشده من تلكاني وأنه الكاك
وماعدي صبر..
كلي احترك
لوشفت غيري ايحاجوك
وارجوك...
ظل أنت طل
وكل غبشه مر بيه برد اتحملك
ارجوك..
بس مالي صبر اتحمل ايحاجوك
كاظم الفضلي
