أوباما وسكة الندامة

**طلعت الحداد** · 06-28-2009, 08:57 AM

بين نتنياهو وأوباما
سكة الشوم والندامة
يوعدونا بالسلام
والسلام عند الحمامة
****************
والحمام له ألف لون
كله ضحك على الدقون
أى شىء فى الكون يهون
إلا بهدلة الكرامة
****************
التاريخ مليان شهود
إسألوا حمر الهنود
أمريكان زى اليهود
والعرب عاملين نعامة
****************
إللى بيألوظ عقال
وإللى يشبه للبغال
وإللى بيلمع فى سيفه
آل هيعمل بيه حجامة
****************
ألف وكسه وإنتكاسه
ع الملوك ويا الرئاسة
الشعوب لو مش هتنفض
ذلها يالله السلامة
****************
الحياة والموت سوا
فيهم الداء والدوا
لو نموت موتة رجال
نحصده يوم القيامة
(تحياتى)