مقدمة :


ملحق جريدة الجزيرة يوم الثلاثاء 3 جمادى الأولى 1427هـ
" بين ظلم الرجل وقسوة الأهل الزوجة المعلقة ظاهرة أخذت تداهم المجتمعات العربية بشكل مخيف وهي لا تستند الي عرف أو قانون, انما حالة من حالات الإنتقام والرغبة في تأديب الزوجة بأسلوب قاس لا ينم عن رحمة أو شفقة، بحيث يترك البعض زوجاتهم لا هن مطلقات ولا هن يتمتعن بميزات الحياة الزوجية بمفهومها العام " << هذا جزء من مقدمة نقاش ظاهرة الزوجة المعلقة في الجريدة .. واللي كان فيه أكثر من تعليق من القرأ على اختلاف أجناسهم ومستوياتهم !

الموضوع :

كان يا ماكاان .. كان فيه (قصّاب) متعود على سلخ ضحاياااه من الذباايح .. وتعليقهم في خطّافات محله !!
وفي يوم ماااا .. تهوّر وقرر يسلخ آدميه ويعرس ؟!!


و لانه انسان معقد وصعب يكوّن علاقة مع الأخرين .. اختار ذا القصاّب انه يتزوج من الخارج ؟! ( صورة حريمنا وهن مستانسات على سالفة انه ما يقدر يكوّن علاقة .. ويقولن أشوى ان البنز ما فتح ملف الزين والشين وعلاقته بالزواج من الخارج )!!



تزوج بطلنا من سوريا مع انه دايم يقول لزباين محله ان اللحم الزين هو لحم النعيم المحلي وان السوري مهوب زين ؟!
ومع هذا .. اختار اللحم السوري . . وخذ وحدة تشق الجبهه من زينها .. وأدبها .. وذرابتها .. وسنااعتها .. ومن أول ليلة تعلّق فيها وحبها وسلخها .... ثم علقّها (صورة رجلين مربوطه في ريشة المروحة)!!

كان يعلقها كل ليلة بشكل ( أهم شي الراس مع الذبيحه عشان ما احد يقول انت لاعب علينا ومعلق سلقة وتقول انها خروف ) !!

كان يعلقها ويعلّق عليها ويضحك وهي تضحك .. كما هي عادة كمخ الله في أرضه (صورة رجلين متعلقة في السقف وجنبها لمبة زرقاء عشان الذباب) << طرّاه اذا قالو فلان يجي على الريحه !

ومره كان يعلقها .. وينتظرها تكتب له معروض وتقول:دخليك بن عمي فووت!
ومرااااات واجد يعلقها وهي تنتظر رجعته من السفر ... !
ذا القصّاب الظالم كان مخليها في سوريا .. وكل فترة يزورها ويقضي وطره ( على طاري يقضي وطره .. ما تلاحظون ان لغتنا العربيه حلوة وتوصلك للمعنى بدون لف ودوارن ) << وهـ من الوطر وطاريه ..!!

طبعن أخونا في الله ما قدر يجيب تصريح لزوجته السورية وقصّر من كثر الوطوطه على سوريا وخاف يتوهق في سين وجيم من كثر زرقاااته لسوريا .. خاصة وان سوريا في نظر العالم السياسي تعتبر باب هايبر بنده العراقي ؟!
فقرر انه ياخذ وحده من بنات الديره ( تصبيره ) << صارت كروساان والا كيكه مهيب آدميه @!
وللأسف الشديد خذ وحده تسوى ديره .. وحده فيها من الزين والأدب والدين ما يعجز عن وصفه قلمي المتواضع ..!

كانت في عامها الرابع والعشرين ( طريدة اختها منيره اللي ماتت في عملية تجميل ) << الله يرحمها كانت مسويتن عمليه تجميل في صدرها .. وشكل الدكتور تليقف وطل تحت ضلوعها وشاف قلبها ذا اللي تسنّه فرخ حمامه .. ومصعه وذبّه للتسلاب يحسبه ورمه ! ( ما ودك توحي سالفة خطاء طبي من شخص عاااامي )!!

كانت ذا البنت آية من آيات الجمال .. راسها تسنّه حبة شمّام مدور وش ملحه .. وعليها شعر تسنّه شعر واحدن من شباب شارع التحلية ( والله يااهم كسرو سوق البنات بعد .. شعوووور ناااعمه وجل وغرّه ... تتعب وانت تقنع نفسك انهم رجاجيل )!!

كانت متوسطة الطول .. لها رقبة طويله ( تجي لها ذراع ) مستقرّة على صدر عريض يشع بياااضاً ونعومه .. مع زيت زيتون وحبتين من فول الصويا الوردي اللون لعشاّق البروتين النباااتي ( خشة واحدن يرشخ سعابليه ) ! << ما ودك توصف بنت وانت تقرأ "منيو" فطور الفندق ؟!

كانت نحيلة الخصر .... مكتنزة العجز .. ناعسة العينين .. اذا ابتسمت ما ودك انك تصد عنها .. وان صديتا عنها تطقك الحسووفه ..!! ( خشة واحد .. حاق اللغة العربيه ) !

كانت فتاة جميلة .. اي وربي انها لجميلة .. ! تقصّر وانت تقول جميله!(( تحمس اخينا في الله المناضل البنز ))

ولكن حظها .. خانها .. ورمها في يد واحد ما يقدّر ( عليه من الله ما يستحق ) !
كانت تدابتس في البيت تبي تقوم بواجبها مع ذا الكمخه .. وهو كان يدابتس في مراجعة وزراة الداخليه يبي التصريح للسورية المعلقه ( جعله ياخذ تصريح لمقبرة العود ) << ( صورة نجديه انقهرت وهي تدري ان السالفة تسذب !)

كان يطلب منها طلبات غريبة .. ويقول لها ناديني (بن عمي) ؟!
وكانت تقول له : بس انت منتيب ولد عمي .. انت زوجي !
ما كانت تدري انه يبيها استنساخ من زوجته السورية ؟!

وفي يوم من الأياااااااااااااام .. !!
دخل عليها زوجها .. وبكل برود قال لها .. انا طلعت تصريح .. وبسافر لسوريا اجيب زوجتي ؟! ( صورة حرمته وهي طايرتن عيونها .. وما تدري هو صااااتز والا يمزح )!!
وترى منيب مطلقتس عشان ما يحتسون فينا الناس ويقولون عاف حرمته عشان سوريه ؟! ( صورة واحد يسمع بمراعاة شعور الحرمه )!
طلع من عندها .. وراح لسوريا ..!
وهي الروحه !
يوم .. يومين .. اسبووووووووع !
شهر.......... شهرين !
الرجال ابطى !

الحرمه حست انها بتتعلّق مثلها مثل غيرها من الزوجات اللي ما خذن من الزواج الا اسمه ؟! ومثل أي ذبيحه متعلقه في ثلاجة ذا القصاب الخسيس !!

قامت وعقدت جلسة حوار مع نفسها ... وأعلنت خطة الطوارئ .. وهي تهربد على عمرها من االقهر وتحمل شعار ( لا للتعليق .. نعم .. للتواسي على الأرض ) ؟!

فقامت أختنا في الله .. وبلغت عن زوجها ... وقالت انه رايح للعراق عن طريق سوريا ( صورة وحده تقول خل ابن عمي تنفعك يا ابن اللذين )!

جاها الرد من الحكومة يقول : ( ان جائكم فاسق بنبأ فتبينوا ) !!

ثم جاها مندوب من الداخليه وقال : ترى زوجك موجود في سوريا وداااشر تسلاب ولا عنده نيه روحة للعراق ؟! ولا لغيره ؟!!
ثم قال لها افتحي البلوتوث حقك ؟!!
وأرسل لها مقطع "بلوتوث" لزوجها وهو متعضّد له بنت ويرقص معها الدبكه ؟!
انهبلت الزوجه .. وبغى يطير عقلها .. مهوب عشان ذا البنت اللي متعلقة في عضد زوجها .. لا ..!

بس ما كانت تدري ان زوجها يضبط الدبكه زي كذا ؟!!

قالت مهيب مشكلة نجرب الخطة (ب) ..!!

وترسل فاكس لجريدة يوميه وتنشر اعلان ان زوجها مريض نفسي وخرج ولم يعد .. وقالت في الاعلان .. انه طلع من البيت في الصبح ومعه علاقة خبز .. وكان يلبس قميص نوم ابيض مخطط بلون أسود تسنّه حمار وحش .. وكان ذيك الحزّه متقمص شخصية "سنو وايت " ويحتري ذئب يطلع له وياكله ؟!


وكتبت في اخر الاعلان .. هناك مكافأة غالية جداً .. لمن يعثر عليه ويعيده الي داره سالما ..؟!

بعد ثلاث شهور ... راجعت المحكمة تبي تفك عمرها من ذا الرجال اللي ما عاد تدري عنه ..؟!
وصار لها اللي تبي وافتكت من عصمة حمار الوحش ..!
وبعد فترة بسيطة وقبل لا تروح لأول موعد في مشغل الصيانة العامه لما قبل الزواج من جديد ..!
جاها خبر من السفارة السورية بالرياض ... يقول تعالي خذي زوجك المفقود .. وترى المواطن السوري اللي لقاه .. يقول انه لقاه منسدح تحت طاولة في مرقص ورابصن في طراشه !! وانه أضطر يجيبه في خيشة ..! عشان ما يوصخ مراتب الكابرس حقه !!

والحين الرجال قاعد يحتري المكافأة ..؟!
راحت الزوجة المكلومه .. للسفارة يوم شافت زوجها في وسط الخيشة .. وكان عبارة عن ( قفش آدمي ) << يعني معصقل ولاعبتن فيه الدنيا ..؟!!

ولا ياخذ علم ولا يعطي علم ..!
قالت للسوري اللي جابه ... تراه لك ؟! عطيتن ما وراها جزيّه ..!
قال السوري : شو بدي أعمل بذا الكمخه ؟ ( صوت سوري متربي في سدير )!

قالت : بدك والا ما بدك .. هذا هو جائزتك الغالية جدا ..! والله انه منوّل أغلى ما عندي .. والحين خذه وتقلّع لأهلك لا ابوك لا ابو "بنت عمك" ذا اللي خذته رجال ملي هدومه .. ولفظته تسنّه قشمة فصفص!

ثم قالت بصوت عالي هز اركان السفارة .. ما صدقنا على الله نفتك من تعليق كاس العالم وصجة عدنان حمد ... تبينا ننشب في تعليق ذا الشين مرتن أخرى ؟!


مايستفاد من السالفة :

1- البلوتوث .. كرهنا في جلسة البست .. ولا عاد صرنا نعرف نركز في الرقص والدبكه ؟!
2- التعليق مهبو زين في كاس العالم (طرّاه التعليق وما التعليق)
3- بنات الديره .. وهــ منهن بس ..؟!
4- فيه حريم معلقّات ومستاانساات على التعليق (صورة قالب ثلج)..؟ وفيه حريم متعلقات ومحرومات من الونااسه(صورة تنوّر خبز) ؟!
5- ما تلاحظون ان البلاغات عن ناس متغيبين كثرت شوي ؟!
6- احيانا نتحمس ونشرط مكافأة .. ثم اذا بردنا ندري انها حركة مالها سنع وان ذا اللي ندور عليه ما يسوى ملي اذنه رماد ؟؟!!
رفقا بالقواااااااااااااارير
رفقا بالقواااااااااارير
رفقا بالقوااااااااااارير