#المضحك_المبكي

#منقول

هذا ما حدث فعلاً مع عائلتي الإسبوع الماضي:

قررت عائلتي و بعد صراع مرير و ٣ حردات من امي ببيت اهلها، ان نذهب الى البحر لمدة ٣ ايام

فذهب ابي في الصباح الباكر لتعبئة السيارة من مادة البنزين ووقف على الطابور اكثر من ٦ ساعات و استطاع تعبئة ٣٠ ليتر

بعدين صف السيارة في شارع بيتنا دون تحريك، وانتظر ٤ ايام وراح مرة تانية الى الكازية و بقي ناطر حوالي ٧ ساعات حتى عباها ٣٠ ليتر تانية.

وصلنا الى طرطوس بعد ماكان ابي مقرر نكمل ع اللادقية بس قال لحالو في 90 كيلو فرق بين طرطوس واللادقية خلينا نوفرهم من شان البنزين.

دور ابي على شاليه بس كانت الشاليهات غالية كتير .. فقررنا استأجار بيت و تفاجأ ابي بالاسعار و بدأ يقارن الاسعار بأسعار فنادق مصر و تركيا ... وبعدين قرر إنو نبقى فقط يومان

الكهربا ما شفناها ابدا والعرق وصل لكعب رجلينا من الرطوبة العالية ع البحر و الانكة من هيك بالليل على قرص والناموس عم يغلي غلي ما حدا فينا قدر ينام كل الليل من الشوب والقرص

و بدأت الرحلة الجميلة في ربوع الوطن ، و كان قرار السفر يشمل غداء واحد فقط لإنو بدنا ٣ فراريج مشوية وحق الفروج الواحد كان ١٥ ألف ورقة من غير حباشاتو يعني بدنا بحدود ٥٠ ألف ورقة حق غدا و باقي اليوم قضيناه سندويش فلافل و فطاير ..

باليوم التاني قالتو إمي لابي: يلا خربانة وخربانة خلينا نفوت ع المطعم ناكول سمك .. يعني مو حلوة يقولو راحو ع البحر وما اكلو سمك.

فعلاً بعد جدال مع أبي فتنا ع المطعم . اكلنا سمك و مقبلات ولما خلصنا من الغدا طلب ابي الفاتورة وياريتو ما طلب الفاتوره

اجتنا فاتورة ملاّخية واتشردق ابي بالرقم يلي شافو على الورقة .. مع إنو أكل السمك بحسكو ما اتشردق فيه

طلعت الفاتورة ١٨٠٠٠٠ ألف
طبعا ابي مالو حامل هاد المبلغ
معو شغلة ١٠٠ ألف عطاهم للكرسون وحط موبايلو وموبايل إمي رهن لبين ما يجيب كمالة الفاتورة.

خلونا نطلع من المطعم و اخذ ابي معه علبة المحارم تبع الطاولة وحطها على تابلو السيارة ولما سألتو ليش هيك عمل ، قلي : من شان بس نرجع ع الشام الناس تعرف انو اكلنا بهالمطعم سمك !!!

اتصل ابي برفيقو وبعتلو مصاري حوالة عن طريق الهرم من شان يكمل مبلغ الفاتورة تبع مطعم السمك

انتهت العطلة و انقضوا اليومان و ابي مابقي معو مصاري غير سعر البنزين .. رحنا ع الكازية لنعبي بنزين لترجع ع الشام .. بس ما كانو يعبولنا .. قال لإنو نحنا معبيين بنزين من يومين ولازم ننتظر يومين لنقدر نرجع نعبي !! لانو البطاقة كل ٤ ايام ..😁

بقينا في السيارة متل المشردين ، و ابي صار يبربر و يسب بصوت عالي و سب ع السفرة و ع القرارات و ع البنزين و المازوت و على ها العيشة بها البلد ..

كان كتير شوب .. فقرر أبي إنو يصف السيارة جنب الكازية و نرجع بالباص ع الشام .. وبعدين هو بيرجع لياخود السيارة بعد يومين ..

و هيك وصلنا الى البيت و بعد يومين سافر ابي مرة تانية ليجيب السيارة ... راح ما لقاها محل ما صفها .. سأل جماعة الكازية قالولو إجت دورية أمن وشحطتها ... قال سيارة مشبوهة صرلها يومين واقفه ، مع إنو محل ما كانت صافة مو مخالفة.

ضل أُبي يوم كامل لعرف وين السيارة وأي جهة يلي شحطتها ولما راح ليفك أسرها دفع أكتر من فاتورة السمك.

أخيراً رجع أُبي بالسيارة بس حلف يمين عظيم إنو السفرة الجاي رح تكون ع البلكون مع كيلو فستق - سينالكو ليموناضة - ومسجلة سيدي فيها غنية قارئة الفنجان مقطع : لو كنت اعرف خاتمتي .. ماكنت سافرت ..
😱😢😃