طرائف تحكي بعض الحقيقة بقالب ظريف:
ضمائر الزوج:
**كاف المخاطب يلي مالها عازة: ١- تدخل على الأفعال، وتستخدم لما زوجك يجيب غراض البيت. مثال: جبتلك بندورة، جبتلك لحمة، جبتلك مسحوق غسيل. وكأن هدول هدية شخصية، مو مشان الطبخ والنفخ. وأحياناً بيستخدمها الزوج لما يشتري غرض لحالو، وهاد أكتر استخدام بيضرب عالعصب. مثال: جبتلك شو قميص، بيفلج. وطبعاً بينسى يستخدمها بجمل متل جبتلك الضغط، جبتلك السكري، جبتلك الجلطة...
٢-وتدخل كاف المخاطب على الأسماء، خاصة لما الولاد فجأة، سبحان الله، يصيروا ولادِك إلك وحدك. مثال: بنتك كسرت الصحن، ابنك عم يرسم عالحيط...
**نا الجماعة وإلها استخدامين: الأول لما الزوجة تشتغل والزوج يحكي بصيغة الجمع. مثال: مبارح طالعنا السجاد، اليوم ضبينا الشتوي... وطبعاً هو ما بيكون عامل شي.
والثاني لما الزوج ينسى شي كان لازم يساويه. مثال: دخلِك قفلنا الباب؟ طفينا المكيف؟ جبنا الولاد من المدرسة؟
** الميم والنون للدلالة على مهام جديدة للزوجة. مثال: تعي قعدي بعدين منفك البرادي، بكرا منكب الزبالة...
**اذا نسيت شي ذكروني...