حوار زجلي بين الشاعر محمد محمد (النعومة) و شاعر القلمون (الخشونة)..
كنت معهم بالسهرة عالفيس بوك .. و حبيت انقلها للجميع ....
الحقيقة أنا رتبت السهرة... و جهزت العلقة.. و اخترت الموضوع حتى.. و الشعراء لبونا وما قصروا
مدة الحوار كلو كانت ساعة و نص .......
محمد محمد:
يلي إنت بالشعر عم تعمل ملك
جاية أنا بهاليوم بدي إسألك
بدك ليونة بملبسك وبمأكلك
ولا بخشونة تحب إني عاملك
خلي حرير الشعر ياشاعر إلي
وخلي خيش أفكارك الليلة إلك
.
شاعر القلمون:
شو جاب هالقرقور عا وكر الدياب
يقارن فهد بلان... مع عمرو ديااب
ياناعم الوج بخيارك لا تهاب
الا خشونة سبع بيركع الغاب
وهي عادتك متعود على خشونتي
طرحت السؤال وانت رديت الجواب
.
محمد محمد:
ليونة لقا ولا خشونة بالهجر
بتحب قلي بدون مابلش زجر
بعمل عاسبع الغاب ياشاعر حجر
ورح بسألك ياشب تا تكسب أجر
خشونة صوت بلان حبيتا إنت
ولا ليونة صوت آذان الفجر
.
شاعر القلمون:
عودت قلبي عاخشونة تعلقو
قيام الليالي والسهر مابيقلقو
حتى الصلا من النار بكرة تعتقو
بس النعومة والقسى ما بيلتقو
قلبك غرق بالنوم عاشرشف حرير
بدو خشونة مدفعين تفيقو
.
محمد محمد:
لما إله الكون للدنيا حشر
يوم القيامة وللصحف كلا نشر
لين الخلق بين البشر هو انتشر
وطبعك خشن ياشاعر لوجهك قشر
بلين الخلق عمنام مرتاح الضمير
وبخشونتك ياجلف طفشت البشر
.
شاعر القلمون:
لو ما الحجر يطلع خشــن من مقلعي
ما كسـّـرت راس ال بـْيقرب موقعي
حـْروب الشعر بدها خشونة، ومطمعي
بـْشي عنتر يـفش الخلق او أصمعي
لكن بــعصر النطوطة ع الفيس بوك
بيــْـطلّ أنعم شب..... يتبارز معي
.
محمد محمد:
نادي جماهير المعنا بكل حفل
تاعالخشونة يركبو باب وقفل
ليني عطيتك فرض رجعتو نفل
وحطيت جانب نرجسي خشونة دفل
وبنعومة الأزهار عم بنسى الهموم
وإسمي نسيتو مقابل نعومة طفل
.
شاعر القلمون:
نادي جماهير المعنـّى تودّعك
يا طفل لملم زهرك والله معك
مع خصم قاسي ما منقدر نقشعك
ولا نلمس نعومة الزهر وْ نسمعك
بدنا خصم مدعوك بالشعر وْ إنـِت
شفناك يا نعـّـوم.. مش خرج الدعك
.
محمد محمد:
كلما الأنوثة والنعومة شملتك
بترجع بسوقي تا تزور عملتك
نسيت الأمومة وصرت تكتب جملتك
ونسيت تسع شهور لما حملتك
نعومة حنان الأم صاحبة الفضل
هيي اللي شاعر حد مني عملتك
.
شاعر القلمون:
يا مزوّر الكلمات حاجة بهورة
وْ تستعطف الأمّ بْمعاني زغيّـرة
لو ما خشونة بيّ قـدام الورى
يحرم نفس كرمال عيلة مقدّرة
يا خيبتو طول العمر لو خشـّـنك
وبالعكس شافك حامل نعومة مَرة
.
محمد محمد:
حامل حنان الأم في قلبي أنا
ومن هالخشونة الناس مابتقطف جنى
وبيي اللي قضى كتير كرمال الضنى
بعد التعب تيشوف من إبنو الهنا
بنعومة البر وبكلمة طيبة
رح عاملو تاشيل عن قلبو العنا
.
شاعر القلمون:
بيك تعب و بقسوتو الدنيا رعب
قلك مابدي تلين قدام الشعب
يابني العمر هم وقسى كلو صعب
ولك فز .. قوم تلحلح و عيف اللعب
شو تعبت حتى شوف عبسة حاجبيك
كرمال الله بس .. نسيني التعب
.
محمد محمد:
بدك حواجب عابسة ومقطبة
شوهالطلب منو استحت هالموهبة
خشونة وعبسة تصير عيشة مرعبة
وإسمع ياعابس بس لوصايا النبي
لين الخلق للناس صدقة بتنحسب
شوبتنحسب لوكان ليني مع أبي
.
شاعر القلمون:
البيّ اللي قلبو بنار مرجلتو غلي
بيحب متلو الابن يطلع بوعلي
لكن انت يا ناعم بهالمرحلة
لولا عدوّك دكّ أرضك بالبلي
اوقف ع جبهة و هز بالخصر الحلو
وغنيلهم ياهويدلك ياهويدلي
...................
محمد محمد:- قصيد ختام...
تعا ياشعر قدملي التحية
لإني رفعتك لرتبة علية
بنعومة غصنك الزاهي المزهر
زرعتك تاتزهر عا يديي
ولحتى ياشعر هاليوم تكبر
الخشونة عيفها والعنجهية
النعومة واللطافة بكل محضر
بتعطيها العالم أولوية
وإنت يابوحرب سيفك تكسر
على عتابي وصفيت الضحية
بهز الخصر مش معقول إظهر
أنا بهز الورود المستحية
وسريرك هون هزيتو ياأسمر
وغفيتك عانغمة شاعرية
ولأنك خشن فيك الكاس مرمر
ولحتى نوضح بسرعة القضية
إنت صوب الخشونة رحت تسكر
وطرقت الكاس عاصخرة شقية
وأنا صوب النعومة رحت إسهر
وحاكي هالزهور الليلكية
وياأنصار الشعر في هيك منبر
الحقيقة صارت الليلة جلية
النعومة بتظهر الشاعر الأشعر
الخشونة بتعكس الاجرام حتى
انتة صرت سيد البلطجية
...............
شاعر القلمون: قصيد ختام...
تعا يالابس التوب الحريري
قبل ماتوقع العالم بحيرة(ي)
النعومة مجالها بالشعر أوسع
وانت مسكين ماعندك ذخيرة(ي)!!
أنا بخشونة العبد الي رقع
تيابو، وعشت زاهد في مسيري
و تفيق على صلاتي بكل موقع
وين مابنام.. خشنت الحصيرة(ي)
انت نعومة الغصن المفرع
بترجف من خشونة زمهريري
و اذا الفلاح منك راح يجمع
ثمار بموسم الغلة الوفيرة(ي)
القساوة بالثمر معيار انفع
الطراوة بالعفن قصة خطيرة(ي)
انت نعومة الشب المصرصع
بترجف من صدى صوتي و زئيري
وانا قسوة فدائي الخصر درع
الشهيد بجنة المولى سفيري
واذا بتحمل طراوة عرق نعنع
و بقيت تميل من نسمة زغيرة(ي)
خشونة حربنا بتضل تقطع
الحجر وتزت كل شقفة بديرة(ي)
نصيحة من قسى الايام اشبع..
و بعد ما تبدل السن الحليبي
بيجي شي يوم و بحطك وزيري