منتديات فرسان الثقافة - Powered by vBulletin

banner
النتائج 1 إلى 8 من 8
  1. #1

    ديوان الشاعر الشعبي الكبير كاظم الفضلي


    خيــرنـــي ...



    خيرني ...
    أتمنه أتخيرني وأختار
    وعلمني أشلون أتغير طبعك ..
    وأنه بطبعك زنجر بي أشكم مسمار
    وكرهني ..
    حته أختارك بين الميت باجر
    وبين إيمام أطلبه الناس بثار
    وبين ألكاك أمراد ...
    وبين أذبح حسراتي بسكته
    ولا تختار ..
    عيوني ..
    الوحشه ...
    وروحي .. وعوز الدنيه
    وأنه وأنت أنرد حفاي
    ازغار أوجوه الناس البينه أهموم
    أركض بيك بحيلي وحيلك
    أندك كل بيبان الوادم
    ومن أنام ... انام بجوع
    ونفس الصار العدكم عدنه الصار
    هذا الجان بزغري وزغرك
    لا تحتار ...
    ارجوك أرحم كل ظنوني وكل أحساسي
    أنه أتهدر صار أسنين بموكد نار
    خيرني ..
    بين أتحبني ..
    وبين الماشالتني بذهنك يوم أفكار
    خيرني ...
    أتمنه أتحيرني وأختار ..





    كاظم الفضلي

  2. #2

    رد: ديوان الشاعر الشعبي الكبير كاظم الفضلي


    عــــــذراً ...



    عذرا يامن يتلاشه الزيتون بطولك
    عذرا من تتحاشه عيوني اتشوف عيونك
    عذرا يالماشالت مكتبتي اوراقك
    ولاظلن بجفوفي اجفوفك
    بس اسرارك
    ماخلن ثوب اعله اسراري
    الغيره...
    الخيل المنك .. سقطت مملكتي واسواري
    وبس خليني أشلون بدونك؟؟
    اهدأ.. تذبحني عيون الناس وانه اضحك
    وأزهك.. من مانفعت انه اعذاري
    بيدي اتلمس وجهك غبشه
    وحسك يتنده اعله اكتاري
    جنت ابرد لو شفت الشارع خالي
    وجنت اتذكر انه الكاك اولايه
    وهسه اتعذر مامريت ابالي
    هنه اهوايه
    صدك اهوايه
    دموعي..
    جروحي .. حزني وحزنك
    بس ظليت انت بدارك وانه بداري
    عذرا...
    مامقسوم انظل احباب
    ولامكتوب انصير اصحاب
    غلطه وانزع كل اذنوبي وحيلي اوياهه
    والكه بوجهك كل أثاري
    ظل بنارك
    ظل بغيضك
    بس أتركني بناري
    عذرا...
    ماظليت استوعب عشكك
    ووعودك متيتمه بصدري
    اتعذر من ماعندي قرار
    يمكن بيه اكدر انساك
    وألغي قراري...
    ظل اشما أنت
    اشما أنت
    بس أتركني بناري



    كاظم الفضلي

  3. #3

    رد: ديوان الشاعر الشعبي الكبير كاظم الفضلي

    وين ألكـــــاك ..؟


    وين الكاك ..؟
    تعبني السفر بعيونك من اسنين
    وتعبني النشد وعيوني تترجاك
    وين الكاك ..؟
    يالطعمك حلو وملكاك فرحة عيد
    وين اتريد ؟؟!
    ترسملي عله اجفوف الوكت تفاحة ذهب
    مجبور تحجيلي قصص وتكول عني الناس
    جاباهه وحظه برضواك
    وين الكاك ؟؟
    يالوجهك غسل ماي الفرات وبلل جفوني
    اخذني...
    يلن الغيض ماينفع ..
    ولاأكدر اشيلن اسمك من البال حته انساك
    شديت النظر بالرايح وبالجاي
    وأسال عنك بروحي
    وأعاتب سكته ياروحي
    الشوارع ... والشواطي
    وكل مجان امشيته أنه اوياك
    وين الكاك ؟؟
    فزيت بجرح ماشالته الكاع
    وحسيت بحزن ياكل خاطري ويذبحني طرواك
    ومللني السهر ..
    ملل اظنوني الشك
    لأن طولك غصن ريان
    خاف الريح تكسر غصنك ويشتد عليه اشتاك
    لأنك غزال ..
    ومن طبع الغزال يصوبه الصياد
    وتدري الناس تفاكه
    عله عيونك حبيبي وشعرك وممشاك
    وين الكاك ؟؟
    اتنطرك والشمس تلميذه حبيبي
    الصبح من تطلع تورد اخدود كل محبوب
    وتلم الصدور ازياكهه من الخوف
    بس صدرك يمر مجنون
    يتلاكه عله خيوط الشمس
    يتنهد ..
    وأنه بغيرك تمر اوجوه
    انشدهه وتكلي انساك
    وين الكاك ..؟
    ماظل الحلم يلكاني ليليه
    ولاعدي صبر يحجيلي خرافه
    اتعوذ الشيطان
    نام ...
    نام ...
    أنت بليل كله اهموم
    ماظلك وكت نام ؟؟
    أمشي عليك حبي ودمعتي وايمام
    بلجي اتنام ..
    وما انام .
    واحطن روحي اعله الباب
    بلجن جفك ايدكه وأكلك جاك
    هسه الكاك ..
    مو كوه حبيبي اتريدني انساك
    شيغير النهر مجراه؟!
    وشيبدل النهار بصوف مامغزول ؟
    حته اتكول !؟
    كلشي ايصير ..
    صدكني اعيش اوياك
    اموت اوياك
    لابد يوم تلكاني
    وانه الكاك



    كاظم الفضلي

  4. #4

    رد: ديوان الشاعر الشعبي الكبير كاظم الفضلي

    لطفاً ..

    قد مسموح الفرح بوجهي
    بس مامسموح الحزن بوجهك
    وقد نتسابك أنه وروحي الشوفك
    بس ماتتشابهه كل اوصاف الناس بوصفك
    لطفا ً..
    اتحايل من ظرفي الوكتي
    حته اعثر يمك واتعذر
    من الكه اخدودي وجفي وصبري بجفك
    حلوه ولاكت بيك الدنيه اهوايه
    ومرسومه الغبشه اعله اشفافك
    وكوه يمكن اكدر اشتم عطر انفاسك
    والكه ابمشية طولك
    روح اذوب
    اوشدهة بال
    وغيره التكتل لو صاحولك بسمك
    لطفاً ...
    خل نكتب لحظة هالملكه
    وأنت الاول وانت الاخر
    بيش احلفلك ؟؟


    كاظم الفضلي
    __________________

  5. #5

    رد: ديوان الشاعر الشعبي الكبير كاظم الفضلي


    بانوراما /

    سلاماً ياعراق ..

    الأم :
    ماظل بعد للخوف بيه وأرتجي الموت
    ولا رجفن أظلوعي ويختنك بيه أنه صوت
    الحيل شفت الحيل ينخاني أرد أكَوم
    من شفت راية هلي .. أذكرت دمعات أمي
    وجرح أخوي
    وجارنه الجابوه أمس معدوم

    الأب :
    لاتبجين كل أحنه جسد واحد شبع طكَات
    حته الكَاع بينه مجرحه وتنزف معانات
    أجينه أنشيل همج نمسح الراح
    يابت العراق وأم ..
    يامحاه الصبر والتقوه والزينات

    الأبن :
    ياأم الصدرهه الكَاع يامسجد صلاه وصوم
    يالصبرج صبر كل النخل والماي من طبته العدوان والكَوم
    للاتبجين ..
    عدنه أحنه الجرح نيشان
    وعدنه البلفراش إيموت ذل
    مو مثل اليموت بساحة الميدان
    لجلج والأيام أطوال
    من سعف النخيل أنضمد الملجوم
    حته أنكَوم ..

    الأم :
    أظن بيه جرح يابو الجرح ماشالته الناس
    وأستحت مني الحياطين ..
    وتعذرت أعكَال أبوي المايشيله الراس
    أنه البيه بجي بس ماتكًدرله العيون
    لأن بصطال الغراة إيدوس كَاعي ومايظل أحساس
    ولأن باك المعالم والحضاره ..
    وأمتدت عله الحيطان إيده ودنس الجامع
    وأنقصفت كنائس كي لا تقرع الأجراس
    أشلون أسكت وأنت أبو الناموس ؟؟
    واقدام الغزاة أتشوفهه أدوس !!

    الأب :
    أدوس بيجح وأنه أظل ساكت !!؟
    ماأظن الشهامه البيه ترضه بهاي
    وأنتي وياي من أول حرف أتعلمه الأنسان
    من شاف الفرات العوز
    وأعيال الحسين أتحشمه أعله الماي
    من داست حوافر خيل جيش الكفر والأنجاس
    ماأظن شيمتي أتموت لأن شفت الجفوف مبتره
    والكَوم دارت ..
    ومو هينه تطيح وتنسلب راية العباس

    الأبن :
    ماطاحت لحد الأن هي أترفرف بعالي
    نجاة ألنه وشفاعه وبالحشر والي
    فلاتبجين ..
    كلهه أتهون بس أحجاب راسج ماتذبه أجفوف
    ولأن أنتي الحقيقه والوطن ينباك
    أذا ماربيتي لوليتي وعديتي النشامه ألحاك
    أمس جانت مضغتي البارود
    ورخصّت النفس حته بوطنه أنذود

    الأم :
    وأمس كلكم أحشم بيكم أعله الصار
    من شفت الغزاة أتبوك حته أثار
    رادوا مايضل قانون ..
    ومسلة حامورابي أتبيعهه التجار

    الأب :
    وأمس كَلبوا موازين الحياة وفرهدو داري
    لأن كَلت الوطن غالي .. والدستور دستوري
    ولأن كَلت العنف مرعب ..
    وبحضرة أمير المؤمنين إيفجر الأرهاب
    لامذهب يلمه ولاشرع لاخايف من الباري
    عندي أخوان راحو بالزياره العام
    وبهاي الزياره أنكَتل بن جاري

    الأبن :
    اصبري ..
    تدرين الصبر طيب وأنتي أعله الصبر ربيتي خواني
    أبد مايبقه الوطن مهموم لاكَاع التلم عدوانج وعدواني

    الأم :
    البخت كل ابخت لهل الوطن عالي
    وتذل أركَاب وأحنه الننتصر تالي

    الاب:
    سلاماً ياعراق
    الأبن :
    سلاماً ياعراق
    الأم :
    سلاماً ياعراقي
    المجموعة :
    ياأجمل وطن رغماً على الأرهاب باقي



    كاظم الفضلي

  6. #6

    رد: ديوان الشاعر الشعبي الكبير كاظم الفضلي


    مــــامعقـول ...

    مامعقول أنسه أسمي ومحبتي وكل كياني
    ابعثر بالسنين واعشك أحزاني
    مامعقول ..

    * * *
    خلصت العمر أتأمل أرضيك
    أغصب بالكَلب بعيوني ادريك
    وأنت وياي ..
    نار وماي ..
    لا انت التوج ولا تطفه نيراني
    * * *
    مامعقول نتكَابل قريبه عيونه ونسكت
    تراودني الظنون وبس دمعتي أتكت
    أشغل بالي بيك ..
    وماأكَدر أحاجيك ..
    وأكَول يصير دربي وهو عنواني
    * * *
    من نسج الخيال وصدفه صادفتك
    صرت أنت بحياتي وماعرفتك
    غريبه أطباعك أهواي ..
    مامشيتني براي ..
    أظل وياك وين أتروح تلكَاني

    كاظم الفضلي

  7. #7

    رد: ديوان الشاعر الشعبي الكبير كاظم الفضلي


    أتريد تبعد !!
    كَلي روح
    وأنه صدكَني أرد أعوف
    أتريد تزعل !!؟
    كَلي وارضه
    وادري من تقسه الظروف
    ادري عشرتنه انتهت بيدك يتيمه
    والشماته تعجن بروحي وتدوف
    كَلي كلشي ..
    بيه حيل أهمومي ألمهه وعالجروح اكَعد وروف
    وبيّ ..
    بيّ ..
    بيّ حته ادموعي اضمهه ولايجي غيرك يشوف
    أتريد تبعد ؟؟
    صدك أرضه ..
    وانسه كل ذيج السوالف وتنضد فوك الرفوف
    وانسه حته مناطري وجياتي ليك
    وبي .. بي
    ارسومك أمسحهه وتروح وماأجيك
    كَول كلشي أتريد كَول
    كَلبي توبته وجزع ومايرف أبدن عليك
    أنت جنت أتريدني كلش سهل
    وهذا هم ماصح بديك
    وجنت أنت أتريد تامر ..
    وأنت تنهي وتشتريني وأشتريك
    روح صدك أنه راضي وماأكَلك ..
    ولايجي يوم أعتنيك
    ولاتظن أندم وأردلك
    وماكو مثلك ...
    خاف كَالو أنت أضوه من التريك
    أتريد تبعد ؟؟
    روح صدك ماأجيك .....

    كاظم الفضلي




    كلي / قل ليّ
    صدكني / صدق بيّ
    تدوف / الخطوة التالية بعد عملية العجن
    كلشي / كل شئ
    المهه / أجمعها
    أكعد / أجلس
    ذيج / تلك
    فوك / فوق
    مناطري / أنتظاري
    كول / قل
    كلبي / قلبي
    ابدن / أبداً
    جنت / كنت
    التريك / المصباح الأشد أنارة

  8. #8

    رد: ديوان الشاعر الشعبي الكبير كاظم الفضلي


    أتريد تبعد !!
    كَلي روح
    وأنه صدكَني أرد أعوف
    أتريد تزعل !!؟
    كَلي وارضه
    وادري من تقسه الظروف
    ادري عشرتنه انتهت بيدك يتيمه
    والشماته تعجن بروحي وتدوف
    كَلي كلشي ..
    بيه حيل أهمومي ألمهه وعالجروح اكَعد وروف
    وبيّ ..
    بيّ ..
    بيّ حته ادموعي اضمهه ولايجي غيرك يشوف
    أتريد تبعد ؟؟
    صدك أرضه ..
    وانسه كل ذيج السوالف وتنضد فوك الرفوف
    وانسه حته مناطري وجياتي ليك
    وبي .. بي
    ارسومك أمسحهه وتروح وماأجيك
    كَول كلشي أتريد كَول
    كَلبي توبته وجزع ومايرف أبدن عليك
    أنت جنت أتريدني كلش سهل
    وهذا هم ماصح بديك
    وجنت أنت أتريد تامر ..
    وأنت تنهي وتشتريني وأشتريك
    روح صدك أنه راضي وماأكَلك ..
    ولايجي يوم أعتنيك
    ولاتظن أندم وأردلك
    وماكو مثلك ...
    خاف كَالو أنت أضوه من التريك
    أتريد تبعد ؟؟
    روح صدك ماأجيك .....

    كاظم الفضلي




    كلي / قل ليّ
    صدكني / صدق بيّ
    تدوف / الخطوة التالية بعد عملية العجن
    كلشي / كل شئ
    المهه / أجمعها
    أكعد / أجلس
    ذيج / تلك
    فوك / فوق
    مناطري / أنتظاري
    كول / قل
    كلبي / قلبي
    ابدن / أبداً
    جنت / كنت
    التريك / المصباح الأشد أنارة

المواضيع المتشابهه

  1. رحيل الشاعر العراقي الكبير كاظم أسماعيل الكاطع
    بواسطة كاظم الفضلي في المنتدى فرسان الترحيب
    مشاركات: 7
    آخر مشاركة: 06-12-2013, 10:45 AM
  2. الشعر الشعبي العراقي .. أوزانه .. أنواعه .. تراكيبه الفنية./كاظم الفضلي
    بواسطة ريمه الخاني في المنتدى العرُوضِ الرَّقمِيِّ
    مشاركات: 0
    آخر مشاركة: 02-08-2012, 03:36 AM
  3. مبارك للشاعر كاظم الفضلي
    بواسطة ريمه الخاني في المنتدى فرسان الترحيب
    مشاركات: 8
    آخر مشاركة: 10-22-2011, 08:24 AM
  4. ديوان الشاعر الكبير/د. هزاع
    بواسطة ريمه الخاني في المنتدى ديوان شعراء الفرسان
    مشاركات: 3
    آخر مشاركة: 08-13-2010, 07:41 PM
  5. نرحب بالاستاذ/كاظم الفضلي
    بواسطة ريمه الخاني في المنتدى فرسان الترحيب
    مشاركات: 8
    آخر مشاركة: 11-05-2009, 07:08 AM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •