مربع الحب - للشاعر / محمد أبو زيد الاسيوطي

[محمد أبو زيد]

مربع الحب

للشاعر / محمد أبو زيد الأسيوطي

( هذه القصيدة واحدة من القصائد النادرة التي يجود بها الزمن , وهى نادرة حين تخرج من قلب شاعر أحب إخوانه ,فأراد أن يخلدهم في قصيدة ,, فالشخصية في الأدب تبقى وفى الواقع تزول وتفنى ,,, ومربع الحب كيان إنساني , جمع مجموعة من الرجال الذين تحابوا واختاروا الحب بديلا لعبث الحياة ,,,وكلما لجّ الدهر عليهم بأقداره اجتمعوا ليجددوا عهد الحب ,,,وتنسموا ربيع المحبة وهم:

عبد الحافظ بخيت متولي / نعيم الأسيوطي / محمود ثابت

ثروت عكاشة السنوسي / محمد أبو زيد الأسيوطي

1_ (القصيدة)

كل ما اغْرِف

م المحبة

ألقي لسه في قلبي حبّه

م المشاعر مدّارية،

كل ما أقطف مني زهرة

من جناين حبي ليهم

ألْتقيهم طرحوا فيّا

مهما أقابل مش هلاقي زيّهم

أربعه زرعوا ف كياني

ألف مَعْني لحبهم

وشَمُوا فوق صدري الحزين

فَرْح عمري وابتسامي

و الأسامى في المعاني

والمعاني في بطن شاعر

ييجي تُخْن صلاح جاهين

أو يزيد

(( أبو زيد ))

مش هخبي

إن قلبي ف المربع

فيه مِضَبّع ما حييت

أصْلي

(( حافظ ))

للجميل ما نسيت

يا بخيت

المولي شاهد

ع اللي حاطه

في قلبي ليك

من مشاعر

كنت ناقد ولا شاعر

برْضُه في الآخر..

حبيب ،

والغريب

إنْ رب الكون حَبَاك

نعمة مش ممكن تزول

خِفْة الدم وقبول

لما تتبسم شفايفك

زي شمس بتضوي نور

والحضور

أجمل سماتك

تعليماتك لينا دستور

في الحياة

يا ملاك العشق وزّع

المحبة

وأوعي تبخل ع المربع

بأي حبه

دا إحنا بإدينا ..

حملناك ع الكتاف

والهتاف دايما باسمك

يا فنار بحر المودة

في أي شِدة ..

أنت أبّ

بين إيديك العطر ندّي

واللي شاف

طيبتك ورسمك مش هَيهدَي

إلاّ لمّا فيك يِهيم

(( يا نعيم ))

إياك تغيب

شمس نورك

وابتسامتك العريضة

أصبحت شرع وفريضة

كل يوم

تضحكها خمسة زى نسمة

في قلب صيف

بددّت غيمة الخريف

كنت محتاجلك تضيف

ليّا حاجة

تُبْدر الخير والسعادة

في كل يَمّه

ليك في دفتر إحساساتي

ألف بصمة

لو مقولتش أي كلمة

بفهمك في حروف سُكاتك

إحساساتك

زى طفل برئ صُغير

بس قلبه حنون بِيّدي

ضحكتك

أنشودة تِضْوي

نجمة صافية

في ليل جميل

نهري نيل عمال بيجري

للعطاشي سلسبيل

كنت من غيرك عليل

وسط درب الشعر

تاه

وأنت مديت له

الدليل

تاني ووهبته الحياة

والحياة

دي سلف ودِيَن

اسرحي يا سواقي

فكري واطرحي

ينابيع غرام

للهيمانين

اروي قاص ومسرحي

مبدأُه الالتزام

وده من سنين

مهما أقول

مش هيوفيك الكلام

أنت بحر مالوش نهاية

انتَ مرسايا وشطوطي

آه وأقولها بعلو صوتي

أنت يا أسيوطي

صاحب فضل دايما

ع الجميع

جوا قلبك ميت ربيع

أما لو حسيت بحزن

ولا بسمتي عني غابت

والقي بُوزي

ضربلي بوز

ارمي روحي

ف حضن

(( ثابت ))

عم محمود العجوز

اللي قلبه شباب تملّي

مستحيل نضبه

يشيخ

أصله أسطورة

وتاريخ

ياما علِّمنا السماحة

نادرا ما تشوف له

كلمة

بس لما يقول وينطق

قوم ودوّن

منه حكمة

أد إيه الدنيا ظالمة

لما بتجور ع المواهب

اللي واهب

روحة شمعه

واللي حضنه بلاد تسيع

واللي يمسح

بأيده دمعة

لما ريح أمشير تلخبط

كل أوراق الربيع

فوق ببان حضنه

نخبط

يجري يفتح للجميع

ينزع الهم اللي عشش

واللي كسّر في المفاصل

وابتسامته الحلوة

تفرش

خطوة رغم الريح

نواصل

تاني نخرج

من مراحل لانتكاسة

هوّ ده الأب اللي ربي

في المحبة

زى حافظ

مستحيل بينهم نفاضل

دول تراث لازم نحافظ

ع اللى فاضل

من عبير بستان

تاريخنا

ده اللي دوّخْنا

بجمالة كالفراشة

وإما تطلع شمسي تاني

وابتدي حالة انتعاشة

قبل ما ابلع حتى ريقي

مين يونسني

في طريقي

غير صديق عمري

ورفيقي

(( ثروت عكاشة ))

اللي في ملعب هواه

كل يوم الشوق

بيجري

حبنا

نازل هجوم

في الشِباك

عمال يشوط

هو واخدني امتلاك

أما انا فبحبه موت

والخطوط

ممسوحة بينّا

والدفاع رافض يصد

أصله وِدّ

ملوش حدود

والتسلل بين قلوب

العاشقين

ملوش قانون ولا له شروط

والحَكَمْ

ده مُحال يسفّر

متشنا متش الخلود

واما يحصل طرد يبقي

لكل حاقد أو حسود

ابتدي الماتش النهائي

والنهاية مش متاحة

يالله نتسابق يا صاحبي

بسرعة ده مفيش

استراحة

ياللي من رابع محال

إن بس تمر ساعة

إلا صوتك في اتصال

أي سُبله أو اختراعه

أو مكالمة تليفونية

تطفي نار الاشتياق

حبنا لغز وقضية

أصلنا داخلين

سِباق

مين يحب التاني اكتر

وفي ميدان الشوق يفوز

هوَ طبعا مش هـ يقدر

أما انا وارد يجوز

حتي لما اسرح

وافكر

يقري نفسي

وان قابلته مرة صدفة

يبقي لابس زي لبسي

أصل دمه لونه احمر

من فصيلتي ونفس دمي

زى ما نكون

شخص واحد

حتى أمه هيّ أمي

أما خارج المربع

لسه فيه

دايرة كبيرة

كلها حب ومودة

مش ها جيب لها

أي سيرة

القصيدة دي عشانا

لجل ما تبقى لنا

ذكره

لو نسينا وجه أجَلْنَا

القصيدة..

تبقي فاكرة

***

[ريمه الخاني]

الوفاء صفة نادرة لايتحلى بها إلا كل محب مخلص حقيقي
سررت جداجدا بهذه القصيدة الرائعة وكما قلت بنفس رائع واكثر فلاتحرمنا من جميلك
تحيتي وتثبيت

[أديبه نشاوي]

الشعر الشعبي المصري من اعذب الشعر والموسيقا
سررت بالمرور هنا شاعرنا الكبير
اديبة

[محمد المخزنجي]

شكرا ايها المبدع الرائع

علي هذا النص الراقي

الذي يحمل بين جنباته

الكثير والكثير من صدق

المشاعر الانسانيه والوفاء

في زمن قل فيه او ندر هذا

الحب الجميل بين البشر

مودتي واحترامي

محمد المخزنجي

[رغد قصاب]

سررت جدا بهذا الشعر الشعبي المصري العذب
كل تقديري ومودتي
رغد

[محمد أبو زيد]

رابط للقصيدة بالصوت والصورة علي اليوت يوب