يا ليلة العيد ....

[الهام بدوي]

الليلة ليلة العيد

والكل فيها فرحان وسعيد

قلت الحمد لله أهو لسة فيه فرحة وناس بتفرح من جديد
مع انو في ثورات وفوضى واخبار سياسية بتفرح ولا بتزعل
ولا بتحير حتى اللي قلبي حديد
وعقلو مفتح وفاهمان ودارس وقاري كتب ومجلات
وبيتابع الجزيرة والعربية وكل محترم من الفضائيات
قاعد في امان الله متحير من أخبار القذافي وسوريا واليمن
واحبابنا وقرايبنا في الفيسبوكات

قالتلي مراتي ياراجل قوم بقى جيبلنا شوية مكسرات

على شوية شوكلاته

وماتنساش الحلويات

وجيب معاك كمان دقيق وتمر عجوة وفستق حلبي

وطبعا عين الجمل وزبدة ودقيق وسمنة بلدي

ويانسون ومحلب وشمر وسمسم وسكر عشان الشربات

بكرة العيد ولازم نعمل شوية حلويات

قلتلها هو احنا مش عشان العيد جبنا لبس جديد

وجزم وفانلات وقمصان وفساتين وبنطلونات

ونجدنا طقم الكنب بتاع الصالة عشان الزوار والاهل والصاحبات

والجمعية ختها عشان شهر رمضان والعزومات

وجمعية عشان هدوم العيد والغيارات

خلاص بقى يا حبيبتي

كفاية لحد دلوقت صرف وبعزقة جنيهات

ضحكت وقالتلي يعني يهون عليك يجي عيد

من غير كعك العيد

يا راجل قوم بلاش بخل وتعقيدات

قلت يارب حتى في الفرح مكتوبلي الشقى و الحزن والغرامات

ضحكت تاني ورنة ضحكتها يا اخواني

بدوخني وبتاخدني لعالم تاني

قلت المرة دي لازم اعمل راجل حمش

انا اللي أصدر الأوامر والفرامانات

بتقولوا قلتلها ايه؟؟

قمت كدة وانا مكشر وزعلان

وعامل غضبان وقرفان

قلتلها لأ لأ لأ لأ

يا ست الستات

مش لازم ابدا نعمل كعك العيد وشوية الخربيطات

بصتلي كدة بصة قال يعني زعلانة

وزمت عيونها الجميلة النعسانة

قلتلها بكل رجولة

طبعا لأ وستين لأ يا ست الستات

مفيش داعي للتعب دة كله

وحلينا نجيب الكعك جاهز من افخر المحلات

ويا ستي خلين اروح في ستين داهية

أقصد خليني آخد قرض عشان شوية كعكات

قصدي عشان فرح العيد وزوارنا وجيرانا

وصحابنا وكل عيالنا وعشانك يا ست الستات

وقمت من فرحي قصدي غيظي وجرحي غنيت

يا ليلة العيد أنستينا أنستي يا ليلة العيد !!

يوم الأحد 29 رمضان 1432هـ / 2011م

[ريمه الخاني]

اي عيد يالغالية؟ومعك حق
كل عام ونحن بخير..
ينقل لقسم الشعبي