قصيدة(عريس رفح) رسالة أم لابنها..هشام فتحي

[هاشم فتحي]

قصيدة (عريس رفح) رسالة من أم لابنها.....هشام فتحي
جهزت كحك العيد
وبسكوت الفرح
ودفعت لك تمن الجهاز
فاضل يادوب فرش الفرح
انا قلبي ملفوف النهارده
من يومين باب القلق
ماله اتفتح
دانا نادره ازور البيت
يوم ما اشوفك يا عريس
لابس يا واد بدلة فرح
واختك وفاء
بتجهز الفستان
ورقصتها على صوت القدح
زرعي اللي ضميته بحنان
وتعبت فيه
ودفنت فيه تعب السنين
بالحب غذيته وطرح
دلوقت لابس بدلته
صايم وماسك سبحته
تشهد عليه ارض العريش
تلة رفح
مش عارفه ليه
بعد الفطار
طليت على صورتك يا واد
قلبي انجرح
دقيت عليك
(مغلق)
وانا قلبي انفطر
يمكن يا واد
اللحظة دي لحظة خطر
ما انا قلت لك
ساعة الفطار
لازم تطمن قلبي وتهز الوتر
رنيت عليك
واختك وفاء
مش عارفه ليه
بتضم ألبوم الصور
رن الجرس
وجريت على صوت الجرس
شيخ الخفر
والدمعه نازله من عنيه
وفهمت ليه
غاب القمر
جهزت ليه يا قلبي
بسكوت الفرح!!!
وانت اللي موعود بالعذاب
جهزت ليه!!!!!
حددت ليه كتب الكتاب
جهزت ليه!!!!
متعوده الاحزان تاخدني
من هنا
من باب لباب
فستان وفاء
معناته إيه
بعد اللي راح
زين الشباب

أبوخلاد هشام فتحي

[فراس الحكيم]

يبدو اننا في الهم سواء..رحم الله امواتنا واموات المسلمين.
تحيتي لك

[كاظم الفضلي]

قصيدة رائعة تجسد لنا هموم أمة
ومعاناة شعب .. شكراً لشاعرنا
المبدع هشام فتحي و( تثبيت )

كاظم الفضلي

[ريمه الخاني]

سلمت يداك شاعرنا العزيزابيات تقطر وجدانا ووطنية

[رهام فتوش]

أزال الله كربتنا , وفرج همنا , ونصرنا على أعدائنا يا رب يا رب العالمين , سلمت يداك يا شاعرنا , مشكور