مسجل خطر

[عادل حماد سليم]

مسـجـل خـطـر

---------------

فى كل شارع ديب
وف كل بركة حوت
ماعدش ينفع صبر
ولا عاد ينفع سكوت

ـــــــــــــــــــــــــــ

من موقف السرفيس
جايلك مسجل خطر
رافض نظام رمسيس
ده جامع الفتح
ولاَّ محطة الأتوبيس
باطل جوازك يا فؤاده
م الزعيم عتريس
**
عوف الأصيل
ع الرف في المتحف
مركون مع
الإنجيل والمصحف
واللى يقول الحق
يبقى فى البلد دى عميل
***
وشى شوارع
من بشل وكدوم
مضروب بسيف المعز
وم الدهب محروم
أيْوَه سوابق / بالمحبة مُدان
علشان عيونك أدخل الليمان
مايهمنيش قراقوش
ولا حاكم بأمر الروم
****
ضمينى ليكى ماتخافيش منى
شَكْلى جنايزى بس مش شرير
ماسك في إيدى روشتة التغيير
باحلم تكونى يا حبيبتى جنتى
تمسح جبينك م الشقا مهجتى
واحميكى م الخفافيش فى الننى
تطرح شفايفك للغنا عصافير

*************
جايلك بعضة جوع
كَرْشِة نَفَسْ فى الصدر
قفلت بيبان البوح
قدامى ألف كمين
وورايا ورث خضوع
مين اللى خلّى ضحكتك كحلى
على ورد خدك حط كوم مِلاَّل
أنا لسه فيكى للهموم شيال
ضهرى انحني ولكن
مرفوعه هامة الروح
******
كم مرة قلت أهج
أنفد بجلدى م الوبا والكرب
ورجعت ما قدرتش
خايف ليكى م الهبوب لو هب
================

ديسمبر : 2009م

---------------

شـعـر / عادل حمَّاد سليم

قــنـــا ــ المنيـرة الحـديـثـة

[ريمه الخاني]

السلام عليكم
اعتذر عن تاخري بالمرور بقصيدتك الجميلة
روحك الوطنية واضحة ومحبتك لبلدك
الف تحية وتثبيت

[كاظم الفضلي]

الشاعر عادل حماد سليم .. رائعة قبل التحول
والتغيير وجميلة بالتعبير والأبداع . سلمت
ودمت بولائك لوطنك وأمتك وأنتمائك .

كاظم الفضلي