كنا سوا يا بلاد:
كنا سوى يابلاد نتراشق هـَنـَا ..
والأوف تجمعنا وعتابا وميجنا
كل ما سألت الولف : بدّك نلتقي؟!
كان الورد بيجن كلـُّو وينسقي
وتتعربش وراق الخضر عالباب
والشمس تتنقوز كأنَّا ملبَّكي
وتتخصوَر الأغصان تستـّنَّى
والزهر يتمرجح ع زندي ويتـِّكي
والزيت يطفح من خوابينا
ويتبارك من عياد فينا مشـَبَّكي
والزيزفون يطوف عالطرقات
والعين ماتعرف غصَصْنا ولا البكي
هاجس مَرَق محروق عم يرتاح
كل ما بطولو يغرب وينزاح
والبيت نازف لاهيام يوقفو
وعنقود حصرم ..والنبيذ بلا حكي.
_والآه تعباني بصدري مْجَرَّحَة
وعقدةِ على جبين الدهر ما بتنمحا
وشبَّاك عالمنتور شالح نهدتو
كل يوم يتقصَّى أنين حكايتو
بيعَدْعِدْ مشاوير للنجمات
وقمار مْرْميِّة عالسطيحات
والسَّعد سابقني..وأنا خلفو تـْعبـِتْ.
_ اركض لعندو والرمل جبار
ووِجهي شـَحَبْ من دورة الإعصار
والقلب بيجرجر على طول الطريق
وفستان يسألني وسؤالو مِش بريء
وجسمي بقلبو..يخجل يقلو دِبـْتْ
ويتنـَتـْوَروا الأشواك والحصوات
والحلم تالف ضيَّع الخطوات
صرلو عمر عا بيتنا مافات !!!!!
وينك يابكراااااااااا:
وليش عن إيدي غـِبـِتْ
جبلي معَكْ البلاد هديانةِ
زهقت وقـَدَرْنا نـَوَّع التعتير
وتعطـَلت فيي المَيازةِ كتير !
جبلي السما والأرض مصطلحين
وُضَيِّعْ شو باقي بالدِّني بـْراكين
جبلي البحر مع كل أفلاكو
ومَدّ وجَزْرْ من دون هولاكو
بركي ع إيدي بترجع الموجات
تعمِلْ شواطي وشوف عنواني
واحمل غيوم الحب بسناني !
يااااااااااااااااااااا أخطبوط مْعَلـَّق ْ بقلبي :
لغيرك مابدي يا وطن اشتاق
(ولك ما قـْدِرِتْ اعمِلْ وطن تاني )!!!!!!!!!!!!!!!!!!!

دمشق :الشاعرة فردوس النجار