الخيول

[عادل صابر]

تلاتين سنة وحسِّنا فى الشرع كـــــان عَـــــوْرة
كامشين فى بطن السكوت لاخروج ولا مناورة
إلا وصوت انطلق هــردم حيطان الخـــــوف
مالها ياخال البلد؟!..قالــولى دى الثــــورة!!
ـــــــ
أولاد كـــزهر الربيع صـــحّونــا م النــــومـــة
داسوا جدور العطن قام الوطن قــــــومــــة
ثورة جـــرَت فى الــدروب كما حِس جــنّيّة
خرمت ودان البلــد ولاهمــــها حكومــــة!!
ــــــ
تلاتين سنة والبلد حرمانـــــة على ناسهـــا
ترقد فى باط الغريب وتخـــون حُــرّاسهـــا
رغم انه سرق الحلق والطرحة والرغفــــان
شفتوشى جارية يانـــاس بتحـب نخّــاسها!!
ـــــ
ندّابة خرسا وليل اسـود وشعــب ضــريـــر
فارطين قلوع الخلاص راضيين بأى مصير
ضاقت علينا السكك رغــم اتساع الكـــون
وفجأة جابوا الـــولاد الفجر م التحريـــــر!!
ــــــ
آدى الفساد انكشف والمستخبى اهو بان
بقى عينى عينك على الشاشة وف الجورنان
فى الضُهر لحم البلد بيــفرّقوه على بعــــض
جالِك أوان الهـــدد ياعشّـــة الـغربـــــــــــان!!
ــــــ
لابد تاخدوا الجِزا من جـــنس أعمـــالكــم
لا الأرض دى أرضكم والمال مهوش مــالكم
آدى جياع البلد واقفين كــــحــد الـفـــــاس
قادوا الحطب بالغضب ورجعتوا بجمالكم!!
ـــــــ
وبنيت لى بيت فى الميدان وفتحت شباكى
صَبَح الميدان عزوتى وافراحى وعُـــراكى!!
واجمل شباب البلد طلعوا يدوسوا الظلم
ولا خدنا خمسين دولار ولا دُقـنا كنتــاكى
ــــــ
وان سِبْــنا جدر الفساد يسرح ويطرح غول
والندل لو يوم قتل فالحق ع المقتــــــول!!
غالى ياتمن الكلام جوا بــــــلاد الخُرْس
تحِيي الرميم م التراب وتحــرّك المشلول
ـــــ
كل المدن والقرى طلعت بشكل رهــــيب
حالفين يزيحوا الضلام ويحشّوا راس الديب
والديب عجوز من زمان خلَّف ولاد يامـــــا
متّاوى جوا القصب دايماً وقتــــــله صعيب
ــــــ
تلاتين سنــة تلهفوا واحـــنا اللى إتهــــــنّا
كـان اللومان عِشّنا فى ليل الشتـــا وكُــــنّا
ممنوع علينا الكلام ..حتى الصلا والصوم
ضيّعتوا ديــــن ربنــــــا والفـــــــرض والسُنّة
ــــــ
الشعب كرهك خلاص كُرْه الشجر للفاس
وانت اللى بارد قوى لاشعور ولا إحساس
كفياك بجـــاحة ولملم خِسّتك وامـــــــــشى
من خَد غضب ربنا طب كيف تحبه الناس!!
ـــــــ
واشمعنى يعنى النهاردة بقينـــــــا أولادك
ولا كنا يوم عزوتــك ولا زادنــــا من زادك
ياما اتنبح حِسِّنا واحــنا نقول لك حـــوش
ولا يوم سمعت الندا وفضلت ف عنــــادك
ــــــــ
تعند ماتعند ماحااقبــل سلطتـــك تـــــــانى
دا انا لسة شهقة أخويا ف ودنى خـــوتانى
لما اترمى فى الميدان وصرخ وقال يامصر
من يومها حالف ماديب يخط فى أوطانى
ــــــــ
إرحل ياأُس الفساد..غور انت ونظامـــك
ملّينا من منظرك وكــــــرهنـــــا أيــــــامـــك
كفايانا هم وجـفا وتوهة مالــيها حــــــدود
آن الأوان ياهُبَل ترحـــل بأصــنامــــــــك!!
ـــــــ
الطير لايمكن يطير لو سابته جناحاتـــــه
والغصن كيف ينتشى لو دبلوا ورداتـــــه
وانت اللى ماسك فى قَب الناس ومدقّر
دا الشعب لو يوم غِضب ماتفض ثوراتــــه
ـــــــ
آدى الشبــاب الجميل إتلَم فى ميدانـــــه
مجروح بسيف الوطن غرقان فى أحزانـــــه
ماشى يُـدُك الضلام عشمان فى حِــــتّة ضى
مستنّى يلمح طــــلوع الفــــجر وأدانـــــــــه
ــــــ
كدّاب ياضى النهار لوكان فى عِبّك ليـل
وياجُبن لا تنتصر لو حتى راكـــب خيــــــل
كل العيـــدان تنحنى لما تهّب الريـــــــــح
والنخل عالى الجبين واقف مايعرف ميـل
ــــــ
الليل قِــهِـر م النهار وجراءتـه وكـــلامــــه
إللى دبَــح عتمتــه وكسَــرلُـــه أوهــــامــــه
وزَّع جيوش الضلام على كل بقـــعة نــور
ونسى ان لون النهار لــه برضه أحكامــه!!
ـــــ
الشعب جوا الميدان يشبه لخيل جامح
قابضين على الحلم إللى فى قلبهم رامح
الشمس طلعت عليـــهم دفّت الإصـــــــرار
والصبح بربَش وصار له عيون وملامـــــح
ـــــــ
معروف فى كل الملل عمر الفساد مايدوم
والظلم مهما انتشر له برضه يوم محـــــتوم
بس انتوا ياأغــبيا خــــدعتكوا أوهامــــكم
وبلعتوا كل الثـــمر من شجــــرة الزقـــــوم
ــــــــ
طولان يايــوم الشقا عرق الغلابـــــة يـــــنّــز
والهم منشار لعين فى قلوبنـــا عمــا يجّـــــز
نحسِب ونقلِب فى هـــم الهــدمة واللقمـــة
وبلدنا خيرها كتير لكنــه لاحمــد عـــــز!!
ـــــــ
يابهيـــة منّك أنــا وســمـــارى من طينــــــك
ولا طُلْت حتى البصل والهِــــلف كَل تينــك
أنا اللى من قوت عيالى اشتريتـــلك شــــــال
أدهم أنا فى المحـــــبة وف الهوى ياسينــك
ـــــــ
إحنا الرجال فى الميدان والنخل ف نجوعِك
واحنا الأيادى اللى تمسح فى البلا دموعِك
لا سرقنــــا يوم ميّتِك ولا بعــــنا يوم غـــــــازِك
زى الديابة اللى لحم كتافها من جـــــوعِك!!
ـــــــ
وانت ياراس البلد ياوحش ســــاكن قصــــر
ضحكوا علينا الهمَــــج وقالولنا جــــاب النصر
ملّــــينا من قــصــــة اول ضـــــربـــــة جــــــوّيّة
معقول حليف اسرائيل ممكن يخاف على مصر؟!
ــــــــ
مين اللى خان الوطن مين للرعــاع باعـــــه؟!
ووزَّعــــــــه فى العــــــلَن لاهــــلـــــــه وأتـباعــــه
وانا اللى م الفجر صاحى عشان طابور العيش
محزون لبيع الــــوطن للغُرْب وضيــــاعــــــــه!!
ــــــــ
ياللى هجرتوا الوطـــــن وسرقتوا ملايـــــــينُه
من بعد عشق الوطن دلوقتى كارهيــــــــــــنُه
مصّيتوا دم الفقير ولحــستوا أحلامــــــــــــــــــه
آن الاوان للـــــــوطن يطــرد تــــــــــعابـــيــــنُه
ــــــ
صار الميدان البطل ولافيه بطل غيــــــــره
رويناه بنور دمنا فعطانا من خيـــــــــــــــــره
لو غبنا عنه نلاقيه مستنّى فى المواعيـــــد
واقف كبرج الحمام يــنده على طيـــــــــرُه

[فادي شعار]

يسعدني مرروي في مشاركتك الأولى ...
أيها الفارس الشاعر
المنبثق من ميدان التحرير
ترى هل النور كان يقطر من دماء الشهداء الذين سقطوا في هذا الميدان أم الدماء التي ارتقت في سماء الميدان فجّرت فجر ربيع جديد
أهلا بك مع تحية للشعب العظيم...
شعب مصر العروبة
الممزوج بروح الصمود و روح الدعابة في أحلك الظروف!!!

[ريمه الخاني]

هه صورة روعة...
واهلا باولى مشاركاتك أديبنا العزيز عادل وتثبيت

[عادل صابر]

الاديب الكبير /فادى شعار ملك الادب الساخر
تعليقك ياسيدى فى حد ذاته قصيدة اخرى اضفت على قصيدتى جمالا ووقارا وخاصة انه جاء من اديب كبير مثلك ...شكراً لمرورك البهى الذى اضاء قصيدتى.

[عادل صابر]

الاديبة الرائعة/ريمة الخانى..
مرورك بستان من التين حط على صحراء قصيدتى فجعلها خضراء يانعة ...شكرا ً لتثبيتك قصيدتى ثبت الله اقدامك ياسيدتى.

[محمد الشلقامى]

أمتعتنا أخى عادل بأحلى الكلام وقصيدتك رائعه وسعدنا بفارس جديد

[عادل صابر]

أمتعتنا أخى عادل بأحلى الكلام وقصيدتك رائعه وسعدنا بفارس جديد

الشاعر القدير/محمد الشلقامى
مرورك البهى اسعدنى وشكراً على حفاوة الترحيب ...دمت مبدعاً رائعاً

[ظميان غدير]

الاستاذ عادل صابر
قصيدة رائعة ملآنة بالحس الوطني المتقد
ومليئة بالشاعرية والجمال والمعاني العذبة المؤثرة

لك تحيتي واهلا بك في الفرسان

[كاظم الفضلي]

الأخ عادل صابر .. حضرت فكنت فارساً وقرأت لك
فوجدتك مبدعاً .. رائعة بين الحس الوطني والفعل
الثوري والتركيب الصوري لبناء قصيدة رائعة ..
اسعدتنا بفنك الجميل .. مباركة عليكم الثورة وحناء
ميدان التحرير دماء الشهداء الأكرم منا جميعاً ..
تحيتي لك .

كاظم الفضلي

[عادل صابر]

الاستاذ عادل صابر
قصيدة رائعة ملآنة بالحس الوطني المتقد
ومليئة بالشاعرية والجمال والمعاني العذبة المؤثرة

لك تحيتي واهلا بك في الفرسان

الشاعر الكبير/ظميان غدير
لإنك وطنى ايضاً ايها الرائع فقد احسست بالقصيدة اشكر مرورك البهى واهتمامك بقصيدتى ..دمت مبدعاً ودام قلمك لنا.