احزان

[محمد المخزنجي]

من فوق شواشى الشجر
مستنى بصة ضى
والضى لابد فى الغيوم
والعتمه ساكنه الحى
والحى والميت سوا
الفرق بينهم مش كبير
يا ميت خسارة
على خلق مترصصه .. مسامير
ومترشقه ... عيونها فى صدر البنات
والبنات .. تحلم بدبلة وغويشه وسرير
وعريس أمير .. وواد وبت
والست حبلى بالأمان
والأمان بعد الشهور
التسعة .. لساه ما اتولد
قوم يا ولد
فكك خيوط الشرنقه
وأخرج بقى
وأرفض مسالك تهلكك
وأملى الشوارع والسكك
واختار لنفسك جار
وابنى لحبيبتك دار
وأفرد ساعات النهار
الليل يبات مقهور
والنور يبارك خطوتك
قوم يا ولد
ورى الأماكن قوتك
ما كنت عارف سكتك
وكلمتك عكاز عجوز
ويجوز تكون ساقية
وشادوف
إيه سكتك
أيه اللى
موت ضحكتك
رد الولد
بسؤال طويل
هميت أجاوب بالرحيل
كان مستحيل
صرخ الولد.. يا عم قول
قول الحقايق
بالبراهن والدليل
من غير ما تشرح
ف الظروف
من غير
ما تتلكك
بحجة أو ألوف
جاوب يا عم
م الهم ضاع
منى الكلام
واتسرسبت
منى الحروف
شدتها من
حلقى على
طرف اللسان
رجع الكلام
للجوف بخوف
أتارى يا خلق
الكلام
من الحزن
كان
مكسوف

[ريمه الخاني]

امر من هنا واقول لك:
عودا حميدا
تحيتي لك ولحرفك الندي

[محمد المخزنجي]

الاخت الفاضله ريمه الخامي

اعتزر عن التغيب والانقطاع عن المنتدي

واشكر مرورك الكريم

[ظميان غدير]

محمد المخزنجي

قصيدة عذبة لك الشكر والتقدير

ظميان غدير

[الشربينى خطاب]

مع إن كلمتك الخايفة
طالع حرفها ملهوف
و دقة الحب ف قلبك
علي مدد الشوف
زرعت ورود الخجل
وشوقي علي خد المدي
لكني شايف ضحكتك
المنورة خد السما
رسمت خيالك بالندي
علي الحيطان مكسوف

[محمد المخزنجي]

الاخ القاضل ظميان غدير

ولك كل شكري علي المرور

الذي شرفني

[محمد المخزنجي]

مع إن كلمتك الخايفة
طالع حرفها ملهوف
و دقة الحب ف قلبك
علي مدد الشوف
زرعت ورود الخجل
وشوقي علي خد المدي
لكني شايف ضحكتك
المنورة خد السما
رسمت خيالك بالندي
علي الحيطان مكسوف

شاعرنا الكبير الشربيني خطاب

ودائما يشرفني حضورك الكريم

وتفاعلك مع النص الذي ذاد متصفحي نورا

كل الشكر لك اخي الشعر الجميل

ادامك الله ودام ابداعك

اخوك

محمد المخزنجي