من صغرك علّموك ..

[عبد الرحمن سليمان]

الكلام ده حقيقى جدااا.

من صغرك علّموك ..
انك لازم تجيب لها هدية فى عيد الأم
بس نسيوا يقولوا لك
انك هتجيب هدية لواحدة ..
اتعودت تكدب عليك طول عمرها
انا عارف انه كلام صعب
بس الحقيقة دايماً مرّة
تحب تعرف هى كدبت عليك فى ايه؟؟؟
فاكر لما سألتها عينيكى بتدمع ليه يا ماما ..
هو انتى بتعيطى؟
قالت لك لأ .. دانا بس عينيا اتطرفت ..
كانت بتكدب عليك ..
هى اصلا كان بتتألم
بس مارضيتش تضايقك ..
لما شافتك مخضوض عليها
فاكر لما كنت قاعد تاكل ..
ولقيتها بتحط لك من طبقها عشان تشبع
وانت سألتها .. وانتى مش هتاكلى؟
قالت لك لأ .. اصلى فطرت متأخر
كانت بتكدب عليك ..
هى اصلا نسيت تاكل من ساعة ما صحيت
فاكر لما قلت لها ..
انك عازم اصحابك يوم الجمعة فى البيت ..
وفضلت طول اليوم تجهز البيت والاكل
جات بالليل .. ماكانتش قادرة تقوم من على الكرسى
وانت قلت لها .. انتى اكيد تعبتى انهاردة
قالت لك .. على ايه يعنى .. هو انا عملت ايه زيادة
كانت بتكدب عليك ..
هى اصلاً كان نفسها ترتاح يوم اجازتها من الشغل
بس ما رضيتش ترفض طلبك
فاكر لما قالت لك ..
ماتنساش تجيب لى الدوا بتاعى ..
قبل ما ترجع بيتك .. وانت نسيت
ولما روحت البيت مراتك قالت لك ..
ماما سألت عليك ..
انت ساعتها كلمتها وسألتها ..
انزل اجيبهولك ولا تستنى لبكرة
قالت لك .. لأ ارتاح انت .. انا لسة عندى حبايتين
كانت بتكدب عليك ..
الدوا خلصان اصلاً بقاله يومين
وهى مش قادرة تنزل تجيبه من تعبها ..
بس مارضيتش تتعبك
فاكر لما كنت عايز تخرج انت ومراتك تتفسحوا ..
وكلمتها عشان توديلها ابنك الصغير ..
لقيت صوتها تعبان ..
قالت لك ولا تعبانة ولاحاجة
دانا عشان لسة صاحية من النوم ..
هاتهولى واخرجوا انتوا ..
كانت بتكدب عليك ..
هى اساساً جات على نفسها ..
عشان انت تنبسط ..
فاكر لما جه عيد الأم وسألتها نفسك فى ايه ..
قالت لك .. اوعى تجيب حاجة .. انا مافيش حاجة ناقصانى
كانت بتكدب عليك ..
هى اصلاً نفسها حد ياخدها من ايديها ويروح بيها محل لبس
ويقول لها ..
قيسى دى كدة .. هتبقى تحفة عليكى
نفسها اول ما تلبسها وتخرج من البروفة ..
تلاقى اللى يقول لها
الله يا ست الكل .. هتاكل منك حتة .. ولا كأنك اميرة
اقول لك على كلمة فى سرك ..
لو الكدب اللى فى العالم كله ..
زى كدب الأمهات
كان زمان الكدب ..
بقى الفضيلة الاولى فى كل الديانات
والكلام ده حقيقى جدااا ...
أمير تادرس

[شذى ميداني]

جميل والله جميل
سلم النقل الذواق

[شآم الخاني]

ههه لو كذب العالم مثل كذب الام لكان الكون غير شكل.
واظن مكانها في الشعبيز