ابوذيات الشاعر حسين الساعدي

[الحمداني]

ابوذيات الشاعر حسين الساعدي


مالَك

مالك يازمن وياي مالَك!
قسيت اوياي جَني اسرقت مالك
اَنه ابدنياي بس الحزن مالِك
وانتَ اترادف البلوه عليه


----------------


بشرهه
الدنيا اشكال ومخلط بشرهه
الفرح بيها فرح والهَم بَشرهه
تعال الروحي بوصالك بَشِرهه
وخلي الدنيا حلوه اتصير اليه


---------------


هديت
طعنات العده إمن الألم هدِت
بقت بس طعنتك يل عَلي هَديت
الك صرخات من الكَلب هديت
ازامط بيك وانتَ اتهد عليه

وساده
عليهم حَشمت يِمهَ وَساده
الحرير العدهم املون وساده
وحصيره اَملك وجاكيتي وِساده
لفوني وفرهدوهن من اديه



---------------
وَنهَ شاب

زماني حَضَر اَسهامه وَنَشاب
إوغزاني الشيب يايمه وَنهَ شاب
وقهرني اليضحك ابناري وَنهَ شاب
لا يسكت ولا ايلَحك عليه


------

ردنه
حسين الساعدي
قطعه امن الكَُمر لو شال ردنه
وما نفترك ساعه ابيوم ردنه
يربي ازغار اَنهَ اوياه ردنه
حتى ابلا حرج نكعد سويه



-----------
وفالي

خَلص عمري ولا صاحب وفالي
وزماني صلف مو طيب وفالي
اريد اسأل المهاجر وفالي
عسه يدعولي ابهاي القضيه



كَبرنه
بعدنا ازغار بس الهَم كَبَرنه
ولا متوالم اويانه كُبُرنه
اشلون ابغربة لو حفروا كَبُرنه
كَبُر ضايع غَريب وماله جيه



------------


نصبت
روحي عَزاء ابنص الليل نصبت
لأن روحك عداوة اوياي نصبت
ابتوت الكَلب بادت بقى نص بت
الصبح ما ظنتي اتلحك عليه

---------


دَكت

ابوجه اعداك روحي ازماط دَكَت
يل روحك نَذاله اوياي دكَت
ليش ابطيحتي طَبلتك دَكَت
طحت لأجلك شجاك اشمتت بيه

الشاعر حسين الساعدي
منقوول

[فايز كرم]

استمتعت جدا بماقرات..هلا ومرحب اخي الحمداني.

[الحمداني]

المهندس الشاعر فايز كرم أهلا وسهلا بكم أسعدني حضوركم وكلماتكم الطيبه بأذن الله يتجدد اللقاء