حرية وعداله

[عادل الباجوري]

حريه وعداله
صوتي مش ليكوا وبأمانة ....
صوتي مش طالع للأمانه ،،،
صوتي جوايا مدفون ،،
علموني كده من سنين ،، ،،
صوتي مع صوت ....
أم مكلومة ،
وزوجه محرومة ،،
وطفل يتيم ،،،
صوتي مع صوت من بعيد بينادي ،
أبني فين ،
وزوجي كان معايا من يومين ،،
وأبويا راح فدا بلادي ،،،
صوتي مع صوت السواقي بيئن ....
مع صوت الحمار اللي داير ،،،
بس ع الفاضي ،،،
وبرضوا راضي...
وغصب عن أبويا وأمي اللي ربوني وعودوني أكون راضي ...
وأمش جنب الحيط ،
وم المدرسة للبيت ،،
والصلاة في مواعيدها ،،،
وإيد الكبير تتباس ،
وجزمة الصغير عالراس ،،
متعودتش أرفع صوتي إلا بالتكبير ،
لأن اللي سامعه كبير ،،
بيستجيب ف الحال ،،،
لكن صوتي ليكوا شئ ..... محال .....
فاكركوا طالبين صوتي .... تسمعوه
مش تجمعوه ،،،،،،،،،،،،، وتطرحوه .
عايزين صوتي ليه ؟
دا صوتي صوت حمار ماشي في طريقة ....
لما يشوف حماره ماشيه ،،،
يعلي صوته ،،، عارفين ليه لأنه مش راضي...
ويرضي ليه...
إذا كان مركوب،
ومضروب ،،
وبالهم غصب عنه راضي ،،،
وبرضو ماشي وشايل حمول غيرو ،،،، وملجمينو ليعلي صوتو ،،،،،
لما يرفع راسه فوق ........ مش عزه .......
ولما ينزل بيها تحت ..... مش خوف ......
وأزيدكوا م الشعر بيت .....
إن صوت مراتي عورة ،،، وقاعده في البيت ،
وأبني لسه قاصر،،
وأمي صوتها مبحوح،،،
وأبويا من رجال ناصر،،،،
فاكرينو ولا الزمن داوا الجروح !!!!!
شوفوا وبإختصار !!!!!!!
لما يكون صوتي من راسي ،
واكون واقف فوق مداسي ،،
لما أعرف أسم جاري ،
لما داري تبقي داري ،،
ولما أعوز عيش آلاقي ،،، وماكنش ساكن بالأيجار .....
لما العدل يبقي ف حياتنا ..... عايشينوا ....
لما الميزان ينصف حياتنا ..... مش شعار ع الحيطة لازقينوا ،،،
لما العدل يكون أساس الملك ...... حاسينوا ....
لما الحكم يبقي للشعب ،،،،،
لما الشعب يقول يارب نسمع صدي صوته ....
لما الشعب يقول كلمته نقول تمام ،،،، وبسرعة نخلي الميدان ،،،،
لما نعرف إن مصر برعاية المولي محروسة ...
واللي يفكر في يوم يخون تبقي النهاية معروفه ......
لما يبقي ليا صوت ،
ومراتي ليها صوت ،،
لما يبقي صوتي مسموع ،
وراسي لفوق مرفوع .،،
لما أبني يقولي يابا ،،،
وأمي تقولي يابني .....
لما آجي أكلم خالتي متقولشي مين معايا ؟؟؟ !!!
لما ترجع مودة العيله ....
لما الكيلة تبقي كيلة .... ونلتف ع الطبلية ....
لما ستي تاخدني في حضنها ،،،،
وأرجع أنام علي صدرها ......
وتفليلي راسي .....
وتلبسني يوم العيد مداسي ....
وتديني قرشين وبشرط متقولش حتوديهم فين ،،،
ماهو لازم أبقي حر،،،
وقراري من راسي !
وإلا متبقاش عيدية ... دي تبقي معونه أمريكيه !
دي فاكراني لسه عيل ،،،،
دانا كبرت وليا عيل ،،،،
وسميتوا علي أسم أبويا ،،،، علشان تبقي مرضية ،،،
( ده د ى ي )
أنا حرضي مين ولا مين ،،،
أمي ولا أبويا ....
ولاأختي ولا أخويا....
وستي كمان ......
وصوت للأخوان ،،،،
دي واقعه سودا ومش معدية ،،،
دا الهم كبر ياناس وبقي فيه مسئوليه ،،،،
لما آلاقي نفسي ماسك الحاسبه ،،،
وخمسه ضرب سته ،،،
وأخماس في أسداس ،،،
وناس بتنداس ،،،
وعيون علينا مفنجله ،،،
وأجساد متقتله ،،،،
يارب رحمتك ....
وهي دي حكمتك ،،،،
لما أشوف بلدي وريدها بيتقطع ،،،،
وتنزف كل يوم خيرات ،،،
إشي شباب وإشي ذكريات ،،،
دا بيقولوا كتاب ( وصف مصر) .... بيتحرق .....
وشعب نايم في العسل .... بيتسرق ....
وصف إيه دا أنت حقك توصف من جديد ......
دا شعب مصر من جديد بيتولد........
طب إيه رأيكوا في صوت بيقول ؟
دا ماكنش حرامي ،،،،،
ولا أغتال السادات !!!
دي كلها إشعات ..... وإفهات....
بيرددها المحظورين ........
اللي في يوم وليله بقوا مسئولين .........
عن شعب محروم م الحنان ،،،
وأتحرم كمان م الفلول طب بالذمة إحنا فلول ؟
دا إحنا عبرنا ، وأنتصرنا ، وفي سينا عمرنا ،،،،
ونوعدكوا إن إحنا ،،، راجعين من جديد ،،،
ياناس ركزوا دا المولي واحد ،،،
ووحدناكم تحت حزب واحد ،،،،، ووطني كمان ،،،،
مش جاي من بعيد ،،،،،
وديني لتشوفوا العذاب ألوان ،،،،
دا شعب مصر ،،،،
بقي نصه سلفي ... والمتصدرين إخوان ،،،،
وحيلبسوكوا ع الموضة ( الجلابية والقفطان) ،،،،
وحتروحوا الجهاديه ،
واللي ينطق بكلمة حيقطعولوا لسانه .....
(ماهي دي الحرية ، وقابلني بالعداله . )
مش تقولوا
(حرية وعداله )
مايهمنيش القواله .....
مش هي دي الحكاية
إحنا عايزين ( ميزان )
لما نبيع ونشتري تبقي حلال ،
لما البركة تنزل ع العيال ،
لما أملك بيت في بلدي ،
لما بلدي تبقي بلدي ،
لما أدوس ع الأرض آلاقي حيلي مرفوع ،
وأبني قدامي ،،،
ولسان الفلول مقطوع ،،،
لما البركة ترجع البيت ،،،
لما مراتي تعجن وتخبز بالمطرحة ،،،
لما أبني يجي ( يطلع )
.... أبقي عارف ....
ولما (يرجع)
.....أبقي صاحي ....
لما أفوت ع الصحرا آلاقي ،،، أرض بتتروي ،،،
لما أفوت ع الأرض آلاقي ،،، قطن بيتجني ،،،،
مش آلاقي عمارات ، وعلب كبريت بتتبني ....
وزيطة وزمبليطة وتيت تيت ،،،،
موتوسيكلات وعربيات ،وحرس جمهوري ،
لما الفرح ينفض والكل يلزم داروا...
والعروسة تصحي من بدري مع ( صوت الأذان .... )
وللعيله تعجن وتخبز وتحشي ...
وعريسها يشم ريحة المحشي....
يقوم مخروع ،،،، ماهو واد مفجوع .....
ويشوف الفرن بيتقدح ....
والفرخة قدام عينه بتندبح ....
ويروح يصلي الفجر ويرجع يملي كرشه ...
ويشيل فاسو علي كتفه ...
ويعزق الأرض تطلع خير ،،،،
ويطلب مراتو ع المحمول ف البيت ....
معايا خمس تنفار والغدا دليفري ....
مع أي واحد سارح ،،،
أصل الحمار مش فاضي .....
أتنين مشلتت وفرخة محمرة ....
وفحلين بصل وحتة جبنة قريش ...
وأوعي تقولي مفيش ....
أحسن أخلي واقعة أبوكي سوده ،،،
وغلفيهم بالمنديل ،،،
وقلة ميه ولو ماكنش الترعة ورانا موجوده .
لما الصلاح يجي من ضهره بالولد ....
ولما ترعوا معاه حتة الولد ،،،
وتبقي شريعته في حياته الخير للبلد ،،،
لما الولد يتربي ع الجود والكرم ،،،
وتبقي الفضيله تاج علي راسه ،،،
والرزيله تحت جزمته منداسه ،،،
لما القرآن يبقي دستوره ،،، ونبراسه ،،،
لما يعرف إن حبه لمصر عباده ،،،،
لما النيل يجري جوانا في عروقنا ،،،
لما ترجع لينا مره تاينه كرامتنا ،،،
لما نسمع أسم مصر بيدق جوانا في قلوبنا ،،،
........ساعتها بس .....................
حتاخدوا أحسن صوت ،،،، م الراجل ده والولد ،،،
وأمراته بنت أبوصفيحة ......
وخمس تنفار سريحه ،،،،
و صوتي حيكون ليكوا ،
مع صوت أم مكلومة ،
وزوجة محرومه ،
وطفل يتيم ،،،،،
وصوت مراتي والعيال ،،،
وأمي كمان ،،،
اللي دايماً بتدعي وبقلب راضي ،،
يجعلكوا منصورين ،
مش محظورين ،،
ومصر تعمر بين إيديكوا ،،،
والناشفة تبقي خضرا،،،،
والصفرا تبقي خضرا ،،،،،
والسودا تبقي سودا ،،،،،،
قادر ياكريم ،
ولو أنتوا مش فاهمين المولي عالم قصدي

مع حبي وأمتناني لكل ثوار مصر ، أخوكم (عادل الباجوري)

[ريمه الخاني]

عجبي ياشعب ياامير سرقوك ولسا بيسرقوا بروحك..
************
واهلا باول نص جميل من قلمك الندي
محبتي وتقديري

[كاظم الفضلي]

الفارس عادل الباجوري .. نص جميل
ومشاركة رائعة .. أهلاً بعطائك وجميلك
سنقرأ لك أكثر . دمت بخير

كاظم الفضلي

[محمد محروس أحمد]

ما شاء الله
مبروك علينا هذه القصيده الجميله جدا
اجمل ما فيها انها واقعيه جدا فهى تعبر عن مشاعر الغالبيه العظمى من الشعب المصرى الان
واعتقد انها تجربه شعريه شخصيه تاثرت بها فانسابت الكلمات من عقلك
وهذا واضح من حجم القصيده
انها حقا ممتعه اشكرك عليها جدا وساعمل على نشرها وتوزيها على الثوار يوم 20 ابرايل القادم فى الميدان
لك منى الف تحيه

[بنان دركل]

يبقى هذا هو الشعار الذي نبحث لكننا نبحث اكثر عن كيفية تطبيقة فنفاجأ!!
لك التحية والتقدير