سلامة مرارتك يا ريّس

[أبو يحيى]

للشاعر: أبوزيد بيومي

سلامة مرارتك
يا فاقع مرارة مرات الفقير
فلا جوزها جايب
ولا الفقر تايب
ولا حتي سايب

مَيَّة في قُلة

ولا كوز في زير

سلامة مرارتك

سلامة مرارتك

مرارة العُـزاز
وإيه يعني إحنا

ما نِوْلع بجاز
إنتَ الحقيقة وإحنا المجاز
تفضلْ وييجي بدالنا البديل
شوية خباثة
وعوامل وراثة
نصبح بهايم ... ونصبح بديل
فتقدر ساعتها تنام مَلو عينك
ويعلى الشخير

سلامة مرارتك

سلامة مرارتك
سلامة المرارة
يا واقع علينا بسعر الخسارة
فلا فيه صناعة
ولا فيه تجارة
ولا فيه مدير
ولا فيه إدارة
ولا فيه وزارة تسيب الوزير

سلامة مرارتك

سلامة مرارتك
فداها المواطن
أبو قلب راطن كلام الهموم
فلا نفس راضية
ولا جتة فاضية
بلاوي وسموم
ولا علاج مداوي
مفيش غير حكاوي
بتاخد بإيدنا لآخر المصير

سلامة مرارتك

سلامة مرارتك
وألفين سلامة
يا سايب في كل المنازل علامة
مجاعة ... أنين ... كآبة ... ندامة
جهل وبطالة وعوالة وعيا
وفنون رخيصة وقِلِّة حيا
وهموم بتكتر ... وهموم تزيد
إنت في زيادة همومنا خبير

سلامة مرارتك

سلامة مرارتك يا ابو القد فارع
يا مالي عنينا بزبالة الشوارع
أمال بندفع ضرايب لمين
شمالك بتاخد ...
وواخدة اليمين
شكلك بتحلف علينا اليمين
ما تجعل في جيبنا قليل أو كتير

سلامة مرارتك

سلامة مرارتك
دي واخدة الحصانة
بنشقى وتاكل علينا شقانا
لا خلِّيت أمامنا ولا فيه ورانا
ضرايب ... عوايد ... فاتورة ... رسوم
ننام بالفاتورة
وبيها نقوم
على البصَّة ندفع فاتورة لعِنينا
ولو نعمى ندفع فاتورة ضرير

سلامة مرارتك

سلامة مرارتك يا صاحب الهمم
بخطبة بنطلع لأعلى قمم
وننزل على جدورنا بين الرمم
على الوهم ياما وياما بنينا
أوامر تجيبنا
أوامر تجينا
على خطوة واحدة في محلك نسير

سلامة مرارتك

سلامة مرارتك
إحنا فداها
تفرقع مرارتك
نفرقع وراها
حالنا بدونك عمره ما ماشي
إحنا بدونك شوية مواشي
من غير راعيها ... ومن غير كبير
سلامة مرارتك

ودمتم سـالمين

N.A.N

[نورا كريدي]

وسلامتنا الف سلامة
قصيدة روعة
شكرا
نورا

[أبوزيد بيومي]

السادة مشرفو المنتدى
قصيدة سلامة مرارتك نقلت على أنها لأحمد فؤاد نجم وفي الواقع هي قصيدتي والتي قمت بنشرها على عدد من المواقع منها أبناء طيبة ودنيا الوطن وأزهار البدر ، كما نشرت في (جبهة إنقاذ مصر ) ، ( منتديات الجولان ) ، (قاسيون)، (أخبار العرب _ كندا ) ، ( أهل القرآن ) ، وغيرها من المواقع ، ولكن من الواضح أن هناك من نسبها عن عمد لأحمد فؤاد نجم . ذلك لأني حرصت هذه المرة على كتابة اسمي تحت عنوان القصيدة ، ولم أكتف بالاسم الذي يسجله الموقع جانبا _فإذا قام البعض بنقل للقصيدة يكون الاسم جزءا من النص المنقول ، حتى لا يتكرر الخطأ الذي حدث من قبل مع قصيدتي ( طاطي راسك ) والتي نسبت إلى أحمد فؤاد نجم أيضا ، والتي أنكر الشاعر نفسه نسبتها إليه في أحد أعداد جريدة أخبار الأدب المصرية .... أرجو تصويب الخطأ حفاظا على حقوق الملكية الفكرية .

دكتورأبو زيد بيومي _ عضو اتحاد كتاب مصر

[ادارة المنتدى]

تم تصحيح الخطأ .
ونرجو الرجوع لأصل الامر ومن ارسلها عبر الايميلات اولا ...
ولاتثريب على الناقل بل ابحث عن الأصل...
نرجو إفراد موضوع خاص بذلك في قسم السرقات وتوضيح أصل الامر.وشكرا لكم
http://www.omferas.com/vb/forumdisplay.php?f=184
الادارة

[أبو يحيى]

نفسى فى صنف حشيش

ينمل الدماغ وينضف النخاشيش

علشان انسى طابور العيش

واخش فى الغيبوبه وانسى مشكلة الانبوبه


وانسى بلدنا المنهوبه


وانسى اللى بيجهزوه علشان يبقى رئيس للمخروبه

وابقى مسطول


وانسى اى مسئول


من اللى سابوا الناس فى السيول


وانسى ان نظيف اتجوز وبقى بيعول

وانسى مجلس الشعب وفتحى سرور


وانسى البرادعى وايمن نور


وانسى شوبير ومرتضى منصور


وانسى تعديل الدستور


وانسى اللى ساكنين فى القبور


وانسى انفلونزا الطيور

وانسى مشاريعنا الفاشله


فى توشكى وابو طرطور

واخش فى الاستهبال


وانسى علاء وجمال

وانسى التوريث


و النيل اللى نازلين فيه تلويث


وانسى ان منتخبنا كويس زى ماقال الريس

وانسى تصدير الغاز


واحناعندنا ازمة بوتاجاز

وانسى قطر العياط

وانسى قطر الصعيد

وانسى احمد عز واحتكار الحديد

وانسى زحمة المواصلات


وانسى الانتخابات


وانسى فتاوى الفضائيات


وانسى العشوائيات

وانسى فشل التعليم


وانسى هشام طلعت وسوزان تميم

وانسى الاهرام وانسى الاخبار


وانسى ثروة الريس ال40 مليار


اللى مش بالجنيه المعفن لا بالدولار


وانسى انه خلى بلدنا افقر من زنزبار

وانسى المعارضه وانسى الاحزاب


وانسى تامر حسنى وعمرو دياب


وانسى مشكلة النقاب

وانسى ارضاع الكبير وشرب بول البعير


وانسى انفلونزا الخنازير

وانسى اوربا وامريكا وانسى الصين


المتقدمين عننا بسنين


وانسى البيت بيتك و تامر امين


وانسى ان كيلو اللحمه بقى بتمانين


وانسى اننا فى الزباله غرقانين


وانسى الماده سته وسبعين


والماده سبعه وسبعين


وانسى فريق الساجدين

وانسى الزمالك والاهلى


وانسى اليسا وهيفاء وهبى

وانسى الفول والطعميه


وازهى عصور الديموقراطيه


وجامعة الدول العربيه


والجماهيريه الليبيه


والكفيل فى السعوديه


وانسى بطرس غالى و الضريبه العقاريه


وانسى الطلعه الاولى الجويه


والمصالحه الفلسطينيه

وانسى فتح وانسى حماس


وانسى هنيه ومحمود عباس

وانسى العراق وافغانستان


وانسى ايران و انسى باكستان


وانسى ماما سوزان


وانسى الاخوان


وانسى محمد ابراهيم سليمان


وانسى ان حد من 0900 يطلع كسبان


وانسى انى مديون

وانسى كل ممثله حيزبون

بتاخد فى المسلسل كام مليون

وانسى ايامنا السوده


واحضان طنطاوى والبابا شنوده

وانسى القذافى والبشير


وانسى كل ملك وكل امير

اللى حاكمين من سنين

من غير تغيير

وعلشان اعرف ان الصنف كويس


لازم ارشح نفسى وابقى الريس

( هل هي لكم ام لاحمد فؤاد نجم؟)