الواثقين بالله المخلصين لله

[رغد قصاب]

صباح الخير احبائي المبتسمين
الواثقين بالله
المخلصين لله ان شاء الله
اشكر بدئا كل اصدقائي اللي راسلوني المتابعين للبرنامج و طلب مني كتير منهم ان اورد لهم من القصص التي تمر معي في عملي
و رغم اني لم اخصص هذه الحلقات لروايه الحواديت بس لقيت انو بعض القصص احيانا ممكن تخدم غرضي في مخطط الايجابيه
لا سيما بالنسبه لخطوه الاخلاص اللي هي من السهوله بمكانها الممتنع
تحتاج الى عده حلقات لتختمر
خطرت ببالي اليوم قصه صارت معي من 3 سنين اثرت فيني كتير
حتى نحنا الله بيبعتلنا اصغر خلقو ليعطينا دروس بالحياه
قبل 3 سنين نزحت عائله من احدى المناطق المنكوبه و سكنت مواجهه محلي
4 عائلات في بيت واحد كل عيله عندها 4 اولاد
هالولاد حبيباتي صاروا يجو لعندي يتعلموا شويه كرافت مقابل حفظ القران
منهم بنوته عمرها 10 او 9 سنوات لبست الحجاب
من فرحتي فيها رحت اشتريت لها حجاب مورد و نزلت عليه فراشات و نجوم وورود لتلبسوا و تتشاوف فيه و تحس حالها ملكه بحجابها
اجوني رفقاتها التنتين اختين واحده عمرها 7 سنوات و التانيه 9 و قالولي
انسه انتي بتبيعي حجابات متل اللي عطيتيه لشيماء
قلتلون حبيباتي هادا الحجاب خص نص لشيماء لانو تحجبت
بكرا انتو بس تتحجبوا رح اهديكون متلو
تطلعت البنتين ببعضون و قالولي ...........انسه .......بس نحنا محجبين......
ضحكت ...........ههههههه..........اي طبعا حبيباتي محجبين .........صارلي شهرين بشوفكون بها الشعرات الحلوين
قالتلي الكبيره منون
انسه نحنا لما هربنا من بيتنا تحت القصف هربنا من الفرشه بالبجامات هي اللي لابسينها حوافى ما لحقنا نلبس حجاباتنا..........!!!!!!!!!!!
انا اصابني الخرس.......
تذكرت انون لما بيجو لعندي بيركدوا ركد من باب البنايه لعندي و هنن عم يتلفتوا فزعانين ليشوفون حدا
و انون بيسالوني انو يجو ياخدوا الدرس بغير وقت بكون عندي فيه طلاب صبيان ولو انون كلون بنفس العمر اطفال.......و انون من يوم ما تعرفت عليهم ما غيروا بجاماتون و لا مره!!!!!!!
بهاذا العمر الذي لم يكتب عليهن التكليف بعد.......
و بهذا الاخلاص.......
احمر وجهي خجلا من نفسي و من حجابي و من كل ما ادعيه من ورع و تقى و كادت ن تفر دموعي من مقلي
طالباتي اللي ما فقست عنون البيضه عم يعطوني انا الانسه ام 3 شهادات جامعيه اكبر و اهم درس بالحياه...........
الصدق و الاخلاص..........
طبعا اكيد تاني يوم كنت متل التوتو نزلت جبتلون احلى و اغلى حجابين و زينتون احلى زينه و هديتون ياهن
و طبعا من يوميتها ما شفت شعراتون .........على الرغم انون هلق و بعد مرور 3 سنوات لم يبلغن بعد مبلغ التكليف
نيالون ..............الله يثبتون ...........
و اعود و اقول يا ربي دخيلك ..........هل ما اقوم به من عمل ابتغاء وجك الكريم خالص لوجهك..............ام انه رياء سيصفع فه وجهي يوم القيامه...........!!!!!!!!!!!!!!!!!
يا رب ارزقني الصدق و الاخلاص
انا و كل من قال امين
شيرين الشامي.

[ريم اليافي]

آمين يارب...
حقا هذا الموضوع شائك ومخيف جدا
هل تستطيع أن تتخيل أن أمر بسيط كالنية يمكنه إما أن يقلب العمل على صاحبه وإما أن يكون سندا لأعماله يوم القيامة...
نحن في كل ليلة نحتاج لمحاسبة أنفسنا على أعمالنا ونياتنا ..
بل عندما نقدم على فعل أي شيء يجب أن نسأل أنفسنا ما هي نيتنا في هذا العمل لعلنا نكون من الناجين يوم الدين..

"اللهم اجعلنا من عبادك المخلصين وارزقنا الإخلاص في أقوالنا وأفعالنا"​