متل الموسيقا

[فردوس النجار]

متل الموسيقا
متل الموسيقا تـْغـَلغِلْ بحلمي
وتضيع فيِّي تـْهَدهِد عضامي
متل الكأني من الخلد جايي
عم دوب فيك وإلحق اوهامي
بمسِك إيديك ولـَفلفـُن فيي
صير النـُوى ..وإنت التمر حاني
تـْسَكـِّرْ عليي من الفضا كلـُّو.. وأقعد بقلبَك نخل وغناني
وتـروي السحابةِ الْـْنشفت دَمَّا..مِنـَّك لَ ألله شْـقـَد عطشانةِ
وبتغيب؟!
معقول إبقى لـَونـَك وبتغيب؟!
معقول إبقى صوتـَك وبتغيب؟!
لك إسمك حبيبي .. ووشمَك بقلبي..لو بقدر بشيلو
صرت الزمان اللي وقف سكران.يشحشط بمنديلو
وَبعرف بانك للدهر مرجان ..وجيلك متل جيلو
يا ريت فيي أشطب النسيان..شـُوْ كـْرِهت تأجيلو
وتضل فيي تـْشَبِّك الخيطان..والعشق نصغيلو
وتمطر بقلبي من الفرح ألوان ..وطيورنا يميلو
والحب يـِتـْمَـدْمَدْ على الحيطان..وتـْكـْتـَر تآويلو !!!!!!
دمشق : الشاعرة فردوس النجار

[كاظم الفضلي]

قصيدة جميلة .. ممتعة بصورها الشعرية
تحيتي لكِ شاعرتنا المبدعة فردوس النجار