قاطعوا الدينمارك ( كلاكيت عاشر مرة ) بقلم محمد سنجر

[محمد سنجر]

حتى المقاطعة أبسط أسلحة الدمار الشامل ، لا نتقنها ؟
الغريب أن المقاطعة بمفهومها العربي هي أقل ما يمكن أن يفعله أي إنسان كسول ( برطه ) ،
بمعنى أنني و أنا باتمشى في السوبر ماركت أبص على اللي رايحة و اللي جاية ،
بس بدل ما أشتري الجبن الدينماركي اللي بينتهي الكود بتاعه ب(57)
أمد إيدي شوية و آخد الجبن اللي على الرف أبعد منه بعشرة سنتيمتر فقط و هو الجبن الإسباني ،
و لما أسبانيا تنشر الرسوم ها أقاطعهم هما كمان و أمد إيدي عشرين سنتيمتر و آخد الجبن الألماني ،
و لو تجرأ الألمان و نشروا الرسوم سأقاطعهم أيضا و آخد الجبن اللي بعده ( الجبن الفرنسي ) ،
و لو المحروسة فرنسا نشرت الرسوم و منعت المحجبات المسلمات من لبس الحجاب ، برضه ها نقاطعهم و نتحمل عناء خطوة واحدة لقدام حوالي عشرة سنتيمترات أخرى في السوبر ماركت المكيف و نجرب المرة دي الجبن الإسرائيلي ،
و لما إسرائيل تعمل أي حركة نقص و تنزل ليل نهار تفجير و تقطيع في إخوانا الفلسطينيين أو ترجع تحفر النفق اللي تحت المسجد الأقصى ،
نبقى يا سيدي نقاطعهم و نقاطع جبنتهم عشان نعرفهم شغلهم و نقطعهم تقطيع و نروح ناخد الجبن الأمريكي ،
و برضه أمريكا لو قلت بأصلها (هي عادتها و إلا ها تشتريها ؟) و احتلت العراق و نزلت تقتيل و تفجير في أطفال و نساء العراق ، أو حتى فكرت و لو مجرد تفكير إنها تساند إسرائيل صدقني لنقاطعهم و نبهدلهم آخر بهدلة و نضرب إقتصادهم في مقتل ،
ماعدش هايبقى فيه حاجة إسمها أمريكا دي خالص على وجه الدنيا ،
و ها نجاهد و نمشي خطوة كمان زيادة في السوبر ماركت و ناخد الجبن الإنجليزي ،
و مش ها قولك بقى اللي ممكن نعمله في الانجليز ، آه دا إحنا ها ندبحهم دبح ،
و حياتك لنخليهم يقولوا حقي برقبتي ، بس خليهم كده يفكروا يقلوا بأصلهم معانا برضه زي أمريكا كده و احنا هانقاطعهم و ناخد المرة دي بقى الجبن الهولندي ،
و حتى هولندا هي كمان لو تقل بأصلها و تعرض الفيلم المسيء للإسلام صدقني ها نقاطعهم مقاطعة ما حصلتش قبل كده و لا ها تحصل ،
بس كل أنواع الجبن اللي على الرف كلها خلصت ،
عادي و الله لنرجع من تاني لأول الرف مرة تانية و نآخد الجبن الدينماركي بالعند في هولندا ،
بس مش معنى كده إن الدينمارك ترجع تنشر الرسوم مرة تانية ،
معقول بعد كل البهدلة اللي اتبهدلتوها ،
إنتم ما حرمتوش ؟؟؟؟؟؟؟؟؟؟
طيب و الله لنبهدلكم مرة تانية و نقاطعهم تاني و نعلمهم الأدب و نقاطع جبنتهم تاني و ناخد الجبن الإسباني مرة تانية و هلما جرة ،
هما فاكرين الدنيا سايبة و الا إيه ؟؟؟؟؟؟؟
و حياتكم لنأدبكم بلد بلد ، هو العالم ما عدش له كبير و الا إيه ؟
صحيح اللي اختشوا ماتوا يا جدعان ،
و حياتكم لأنيمكم من المغرب يا أمم يا متحدة ،
هو انتم فاكرين العرب و المسلمين شوية في العالم ده و إلا إيه ؟؟؟؟؟؟؟؟؟

يا أمة ضحكت من جهلها الأمم ،
بالله عليكم لم تفكروا للحظة واحدة تعملوا جبنة ،
جبنـــــــــــــــــــــــــــة ، مجرد جبنة ،
أنا لا قلت لكم اعملوا طيارة شبح ، و لا صاروخ بلاستي ،
و لا قنبلة نووية و لا غيره ،
باقول لكم إعملو لكم شوية جبنة الأول ،
يعني بالبلدي كده تجيبوا شوية لبن و إوعوا توصلوا اللبن لدرجة الغليان لتبوظوه ،
بس تدفوهم شوية على النار ، و بعدين تحط عليه المنفحة اللي بتتاخد من معدة العجول ،
ملحوظة : في منها أقراص في الصيدلية إوعى تستسهل و تجيبها لأن واحدة من الدول اللي قاطعناها هي اللي عاملاها ،
بعد كده تسيبوهم شوية لما تتماسك و تتجبن ، و بعدين تقطعوها خرط
و بعدين ترشوا عليها شوية ملح ،
و ساعتها و الله العظيم لأقطع و أقاطع معاكم ، بس ها قاطع بجد ، مش كده و كده ،
هاقاطع الجبنة بس ، هاقاطع لإني فرحان إننا نجحنا و عملناها عندنا ،
و لما أشتري مش هاشتري غير جبنتنا العربية الإسلامية ،
لكم عليا أقاطع كل الجبن الدينماركي و النرويجي و الهولندي و الأمريكي و الإسرائيلي ،
ها قاطع كل الجبن لأني صنعت جبنة في بلدي ،

ما أكل أحد طعاما قط خيرا من أن يأكل من عمل يده ،
من يملك قوته يملك كلمته ،

هكذا تكون المقاطعة ،
أقاطع شيء واحد و أجرب ، أنا عندي البديل و الا باضحك على نفسي ؟
على فكرة افتكرت حاجة غريبة جدا ،
إن المقاطعة ليست من سنه محمد بن عبد الله ( صلوات ربي و سلامه عليه )
فما أعرفه عن سنتة ( صلوات ربي و سلامه عليه ) أنه عندما كان يؤذى من قبل جاره اليهودي ،
فكان هذا الجار يضع له القاذورات و الزجاج المكسور و الشوك على باب بيته ( صلى الله عليه و سلم ) ليلا ،
فإذا خرج لصلاة الفجر ، داس بقدمه الشريفة على كل هذا و تأذى كثيرا ،
و برغم كل هذا عندما لم يفعل هذا اليهودي ما اعتاد عليه يوما ، ذهب إليه رسول الله ( صلى الله عليه و سلم ) لزيارته و الاطمئنان عليه ،
و عندما بحثت عن أصل للمقاطعة وجدتها فكرة الكفار عندما قاطعوا بني هاشم في شعب أبي طالب ،
و كان ذلك لأنهم منعوهم من إيذاء رسول الله ( صلى الله عليه و سلم ) ، هل تذكرون هذه المقاطعة ،
سبحان الله ،
الكفار نجحوا في توحيد كلمتهم و قاطعوا بني هاشم بالفعل ،
أما نحن فلم نفلح حتى في تقليد الكفار ،
و المقاطعة أيضا فكرة (غاندية) هندية غير مسلمة ،
نجح في قيادة شعبه لمقاطعة انجلترا و كل ما تصنعه انجلترا ، و لم ننجح نحن بتقليد غاندي الغير مسلم ،

فلقد عادت الدينمارك و نشرت الرسوم ،
كلاكيت تاني مرة ،

بالله عليكم ماذا فعلت المقاطعة ؟؟؟؟؟؟؟؟؟؟؟؟؟
ها تعملوا إيه بقى دلوقتي ؟؟
أقولكم فكرة جميلة ؟؟؟
اشتروا كل منتجاتهم بهبل عشان يحرموا ينشروا الرسوم مرة تالتة ،

أما حاجة غريبة يا عالم ،
لا حول و لا قوة إلا بالله العلي العظيم ،
يا عالم يا هوووووووووووووووووه ،

الغريب أن بعض إخواني المسلمين عندما كلمتهم على نشر الرسوم مرة تانية و عدم جدوى هذه المقاطعة المزعومة ،
رد بسلامته بكل كبرياء ،
ـ لأ ما هو إنت مش فاهم ، هما نشروها تاني ليه ؟
ـ ليه يا ناصح ؟
ـ عشان خسروا ملايين الملايين من مقاطعتنا لهم ،
و من غيظهم و حقدهم علينا لأننا خسرناهم هذه المليارات ، قاموا ناشرين الرسوم تاني عشان نحرم نقاطعهم ،
قلت له : يا سلااااااااااااااااااااااااااااااااااااااااااااااام ؟ بتتكلم جد ؟
تخيل أنا ماكانتش فاهم الموضوع بهذا الشكل ، نورتني الله يعمر بيتك ،
وريني طيب العصير اللي في إيدك ده ،
الله الله الله ،
الله على المقاطعة ، عصير دينماركي كمان ؟
رد بكل براءة ( آآآآآآآآآه ، معلش نسيت ، جل من لا يسهو يا أخي معلش ،
أموت من الجوع يعني عشان ترتاح يا سيدي ، و آدي العصير
( تجرع آخر ما في العلبة من العصير ثم ألقاها فارغة و داسها بحذائه )
و بعدين مش لاقي حاجة أحلى منه بالسوق الصراحة ،
يعني هيا جت على العلبة اللي أنا هاطفحها بالسم الهاري ،
يعني ما تجيش غير على الغلبان اللي بيبر نفسه بعلبة عصير ؟
حاجة غريبة و الله ،
ما تروح يا أخي تكلم الحكومة اللي مدخلاها كراتين كراتين ،
و إلا إنت ما تقدرش غير على البردعة ، أما حاجة غريبة و الله )

[ريمه الخاني]

نعم صدقت لو فعل الجميع مثلك ربما افلحنا ولكن هل هناك من يسمع؟ وهل باتت عمليه عمليه؟
لي عودة وجزاك الله خيرا