نقرأ في مواقع التواصل ، أو الوسائل الأخرى كالواتس وغيره نصوصا طريفة، أو إنسانية عميقة، كتبها احدهم باللغة الدارجة، أو الفصحى غير المنقحة، بل محشوة بالأخطاء أحايين كثيرة،لكنها تلفت النظر لمافيها من أفكار، يمكن تهذيبها لتصبح أفضل، ولكننا لانعرف كاتبها، فماذا نقول في هذا المقام؟
هل هو نص جديد فعلا؟ أم نص منقح؟، لأننا استعرنا الفكرة.
إليكم نموذجا منه والتغيير والإضافة :
- ماما ... شو هاد البيت الكبير ؟

بالطريق عالمدرسة .. ماسك ايد امو .. و صارع راسا اسئلة كالعادة
بدو يعرف اي شي بيشوفو .. و شو بيعمل و كيف و ليش
ولد صغير بعمر الاسئلة يلي مالها نهاية

- هاد بيت بلاستيكي .. للزرع و النباتات ..
- ليش النباتات إلهون بيت ؟؟ مو بس بدون تراب و شمس ؟
- حبيبي .. في نباتات ما بصير تتعرض للبرد ولا بتموت ... و بالشتوية هالبيوت بتكون مدافية منيح .. و في واحد بيعتني فيون و بيحطلون ادوية و سماد ..
- اها ... متل بابا من زمان .. قبل ما يسافر ...طيب ليش ما منسكون مع النباتات و منتدفى ؟؟ مو احسن من بيتنا يلي شبابيكو مخلوعة ؟
- ما بصير حبيبي .. هاد البيت بس للورود و الزرعات

استغرب ..
كملو مشوار .. و كمل مراقبة و اسئلة ..

- شو هدول الولاد على واجهات المحلات ؟؟ يلي لابسين تياب سميكة و جاكيتات ؟
- هدول مو ولاد .. هدول تماثيل .. لعرض التياب .. مشان الناس تشوفون و تشوف كيف موديل الجاكيت عاللبس ، قبل ما تشتري
- ما بقدر انا البسون ؟؟
- لا .. نحن ما معنا حق هيك جاكيت .
- مو نشتري .. بس بلبسون و بضل واقف عالواجهة .. متل هالتمثال .. و هيك الناس بتشوف شكل الجاكيت .. و انا بدفى لبين ما يسكر المحل ..
- ما بصير .. انت رح تتحرك .. هدول لازم يكونو تماثيل .. جامدة يعني

استغرب .. ضم جاكيتو القديم محل السحّاب المنزوع ..
كملو مشي .. و كمل مراقبة

اشر على دعاية قدام عيادة و صاح
- ماما شو يعني معاينة تصريح سفر ؟؟
- يعني ورقة ممكن تدخل فيا لغير بلد ..
- تعي ناخد ورقتين و نسافر عند بابا !
غصّت و جاوبت
- حبيبي .. هاي عيادة بيطرية .. بيفحصو الحيوانات .. و بيعطو ورقة انو الحيوان ما فيو ولا مرض .. مشان يدخل على غير بلاد
- طيب مناخد ورقة من دكتور الانسان .. شو رايك ؟؟ .. طبعا مو هلق .. غدي .. بس ما يكون فيني ولا مرض .. و منسافر .
- حبيبي البني ادم ما بيكفيو هالورقة .. ما بتقدر تسافر .. الا اذا عندك مصاري كتير .. بيستقبلونا وقتا كم بلد
- بس الحيوانات ممكن تسافر لاي بلد و بيستقبلوا الكل ؟؟

استغرب
مسح انفو الشارر من اول الشتوية .. ضم جاكيتو محل السحّاب المنزوع مشان ما يدخل الهوا البارد
و كمل مشي ..

قعد بمقعدو .. جنب بقية الطلاب
و صار يسمع المعلمة عمتحكي و تشرح امور غريبة عن عالم غريب و خيالي
امور بدائية .. خرج يفهموا الصغار و يستوعبوا الاطفال
عن الحياة و المخلوقات ..
عن الارض .. كيف فيا نبات .. حيوان .. و جماد
و طبعا الانسان .. يلي هو اعلى و ارقى كائن و اهم شي من كل هدول

مع انو الحكي بسيط
بس هو ما فهم .. و لا استوعب .. و ما صرلو قلب يسأل
سرح بخيالو ..
عجب اذا كان عندو خيار .. شو كان اختار يكون ؟؟
نبات عندو بيت ؟
جماد لابس جاكيت و دفيان ؟
ولا حيوان مع ورقة ممكن يسافر و اي بلد بيستقبلو ؟

والله شي بيحيّر ..
**********
التغيير:
عجيب..


إذا كان عندو خيار رح يعلمهم كيف بيدفا من جواته... من دفا الايمان الي علمتنه ياه أمه العظيمة...
**********
مارأي النقاد هنا ؟وهل يمكن لنص كهذا بعد إعادة صياغته بالفصحى وتهذ يبه، أن نقول عنه نص كتب بالعامية وجرى إعادة صياغته بالفصحى؟
أم مع النهاية الجديدة بات نصا جديدا؟.
مارأيكم دام فضلكم؟