قـالـوا فـي الـسـتــات

[دكتور أحمد الليثي]

الإخوة والأخوات
اسمحوا لي ... نقلب الموازين، ونقول بعد بسم الله:

يالّلا يا أهل الملتقى يالّلا
نتجمع والفرحة آهي هالّة
باركوا لي ما انا ليلة امبارح
خدت التانية غيظاً ف العلة.

والصبح لقيتها كمان جايبة لي
إفطار ملكي كمان م الغالي
وقالت لي اتفضل يا حياتي
وبقت قاعدة كده وباصة لي

قلت لها ما تمدي إيديكي
بسم الله ، وما شالله عليكي
قالت تسلم ... عايزة اتملى
في جمالك، قلتلها افديكي.

وبعد ما جيت يا جماعة من برة
جَرْي لقيتها بتسحب جـرة
فيها مية والملح فْ إيديها
ورجولي ارتاحت بالمـرة.

ولقيت حلة محشي يا ناس
ولا أجمل من كده إحساس
واللحمة توابلها عواطف
تسلم لي إيديها وتنباس.

وقعدت اتسـاير ويَّاهـا
كلمتها دي سكر ما احلاها
نسِّتني الدنيـا ومشاكلهـا
والضحكة عرفت انا معناها.

كل الهم خلاص انزاح
والدنيا قدامي براح
فاتحة لي بالشوق دراعاتها
والقلب مزقزق وارتاح.

==========

وامَّا فتحت انا تاني عيوني
شفت انا توب أخضر ف زتوني
جواه أم عيالي، وفجأة
دابت كل همومي وظنوني

وعرفت ان العشرة تهـون
على واحد مسطول مجنون
دا الراجل بحقيق والمجدع
ما يفرط، والعشرة يصون.

سامحيني بقى يا ام عيالي
-يا مخلصة على كل اموالي-
ياللا، ما هو كله حلالك
زي ما برضه ده كله حلالي.

مهما عملنا وبينَّا خنـاق
ما بنرضى يكون بينَّا فراق
وان مرة اتقلبت موازيننا
نعدلها، وقلبنـا مشتـاق.

[دكتور أحمد الليثي]

عاشق الورد ينصحني أن امسك عصاية غليّة وفيها منديا أبيض واقول حرمت يا مدام؟
أهو ده اللي مش ممكن أبداً. خد عندك، دا انت جنيت على المدام:
========

نصيحة من واحد مضروب
محدوف مِيةْ زلطة وبالطوب
بيقول لي خفِّ يا دكتـور
ع النسوة، وهو المطلـوب.

يا أخينا أنا عايش ف ذهول
ازاي ترضى تكون مذلول
للمحشي وطاجن من كفتة
وكمان طرشي وقدرة فول؟

دا الرب براك تبقى عزيز
وادَّاك عقل كده وتمييـز
ازاي تستبـدل شنباتك
وتحابي كده نوق ومعيز؟

لا يهمنا سواطير مسنونة
ولا شركة أكياس مجنونة
ولا زوجة بتفرك ف إيديها
العمر ده واحد يا أخـونا.

على كلٍ أنا عندي حصـانة
من الغدر ومعمول لي ضمانة
هاعمل في البيت كده عندي
بدروم باقفـال لامُّ بهـانة.

هاحبسهـا لما آجي أنـام
وأسوِّد وشَّهـا بسخـام
واكلبش إيدها ومفاصلها
أيه رأيك؟ مش برضه كلام؟

يعني يا سيدي جنيت على حوَّا
خلِّي "المنديل" يعطيك قـوة
وهاكسر فوق راسها مقارع
ونشوف مين هو اللي فتـوة.

[دكتور أحمد الليثي]

وصلتني رسالة من "أم العيال" تسأل "ليه اتجوزت عليَّا يا منيِّل" فقلت:

اتجوزت عليكِ لإني
شايف إنك غيرانة مني
عاملة لي راجل طول اليوم
واللي يشوفك يلبسه جني.

قلت أشوف واحدة تسايرني
تفرح قلبي يا ناس، تسعدني
وافرش لها قلبي وعمري
والسواطير تمشي بعيد عني.

ربنا تاب م الغلب عليَّا
ولقيت واحدة تبوس رجليا
كل أملها رضاي يا ناس
ينصر دينها، دي أحلى هدية.

بس أنا طبعاً فاهم الفولة
أول شهر قصيدة معسولة
والتاني يعني كده شوية
والتالت تعمل مسطولة.

على كلٍ أهو كده بنجرب
والمأذون منه ما فيه أقرب
والستات عِد ف ليمون
وانا حالف تاني ما راح أتعب.

[دكتور أحمد الليثي]

بعد أن نزعنا من قلوبنا الخوف من السواطير، نقول


لعلط يا ساطور لعلط لعلط
مش ممكن أبداً راح تخبط
ده وجودي وإسمي يا خوانّا
في فضاء النت حاجة تلخبط.

حتى الست جنابها مراتي
والمأزون وفكيكة حماتي
والواد إبني وأخته عزيزة
تايهين في حياتي ومماتي.

ارفعي ياللا قضية نفقـة
أو ابعتي شرطة لو حدقة
ما هيعرفوا أصلاً أراضيَّا
واللي هييجي دا لُه علقة.

يبقى يجيلي ساطورها منين
اللي بتشرب كوز بنزين
ع الريق ودماغها كده عايزة
جلسات كهربا مخ تخين.

[دكتور أحمد الليثي]

دكتور احمد

مين قالك ححتاج لساطور
ولا أبواب السجن حا زور
بشوية كيد ويا المكر
راح تلبد عند الدكتور ...
لو عديت من ضغط وسكر
خسيت واللبس بقى مهرهر
ودقنك طلعت بره وجوه
راح تلغي العقل ولا تفكر
بشوية كيد ويا غرور
حلبسك أجمل طرطور
راح تجري ف قلب الشارع
فاكر نفسك بتاع المرور
والعيال راح تحدف طوب
وحتجري من غير مركوب
عقلك راح يرجع ليك
لما ارضى عنك وتتوب

شوية وراجعة

ههههههههههههههه
وترجعي ليه؟ حالف عليكي تخليكي هناك. اتأخري يا ستي على راحتك. طب اشربي "خزان" شاي على حسابي.
على كل حال ما في حل لكيد النسـا غير اللجوء إلى الله. ولذلك خدي عندك:


هو ده برضـه اللي مخوِّفني
أصـل الست تخصص زار
هتجيب أسيـادها تجننـي
ياخدوني من الدار للنـار.

يا ما قلت لها يا ست حرام
دا انا راجل شقيان تعبـان
بطَّلي تعاويذك، ده كـلام؟
تزغر لي، وتزيدها جنـان.

لما طفشت يا ناس م البيت
م الحتـة، ومن كل الجيرة
راح مني شبابي وخسّيت
م التفكير وكمان م الحيرة.

مش ممكن واحـد يخطفهـا
ويريَّحنـا يا ناس م الآخـر
وتغـور مع شلة أسيـادها
حابس واشتـوت وسنـافر.

آديكو عرفتوا انا ليه مفارقها
أصلها ست عليهـا عفاريت
ربنا قـادر يبطـل كيـدها
قبل ما أصبـح كده فتـافيت.

[دكتور أحمد الليثي]

بعد اتحاد النسا، ودعاهن على الزوج الغلبان:

بقى يا وليّـة
بتدعي عليَّـا؟
اتلمي بقى يا مصدية!
ههههههههههههه

جن يلخبط حالها وحالك
ونهار يومك يقلبه حالك
ويخلص على كل اموالك

ضمِّي سيادها على أسيادك
قربي ياللا كـده بدماغك
وانا اولَّع فيكم ... بعيالك.

أنا هاقـرا عليكم قـرآن
وراح ادعي مع كـل أدان
تتبطُّـوا انتـم والجـان

دا انا لولا إني أصيل حبُّوب
كنت اجري وراكم بالطوب
ولا ينفعكوا بخـور وهروب.

أنا رايح اشوف عم "رفـاعي"
تعـازيمه لتعـابين وأفـاعي
راح تنهـي عليكم بصبـاعي.

أشتـاتاً أشتـات أشتـوت
انصرفـوا لاجيبلكو نبُّـوت
واللي يعدِّي أكيـد هيمـوت.

تفّ يمين ، تفّ شمال
يقلبلكو معدول الحال
تتلموا وجِنّكـو في شوال.

[ريمه الخاني]

حرام عليك حتتعبك رجليك ولاتوصل
هو مافيش غير النسا؟ يارب مايجيلك عرق نسا وتروح في البايباي

[دكتور أحمد الليثي]

حرام عليك حتتعبك رجليك ولاتوصل
هو مافيش غير النسا؟ يارب مايجيلك عرق نسا وتروح في البايباي

ههههههههههههههههه
اللهم آمين، احنا والحاضرين.