حوار الطرش

[د.مهندس عبد الحميد مظهر]

حوار الطرش-1

فى إحدى الأمسيات الرمضانية ،وفى مقهى من المقاهى التى تضم خليطا من الناس، ولا تعرف منهم المثقف من المفكر من العامى ، وأختلطت اللغة العربية بالعامية ، جرى الحوار الأتى :

قال أحد المجتمعين : هل يسركم ما نحن فيه؟
فرد أخر قائلاّ : ولكن أمريكا هى السبب
وتدخل محاور فى الحوار فقال : ولكن ما قام به السادات كن نقلة نوعية
وسئل الأول : ولماذا إذن الهجوم على جمال عبد الناصر
ورد الثانى :لقد شهدنا فى عهده ثوره فى الثقافة والفن وخصوصاّ فى فترة الستينيات من القرن الماضى

- ولكنه لم يحل القضية الفلسطينية ومات تاركاّ حملا ثقيلا
- ده عبد الحكيم عامر هو السبب
- ولا يمكن برلنتى عبد الحميد
- اذكروا محاسن أول رئيس مصرى حقيقى
- لقد خلصنا من الإحتلال الإجليزى
- وقبله الإحتلال التركى
- و هل نسيت الإحتلال العربى!!!!

- يا اخونا الكلام فى الإحتلال التركى والعربى ده غيرمضبوط ، ده كلام لا يقول به إلا قلة لا تعرف إلا مفاهيم قطرية ضيقة

- لا يا عم إحنا مصريين أولا وأخيرا ، إحنا فراعنه
- هى حكاية الفراعنه دى مدح ولا ذم ؟
- ياعم إحنا اللى بنينا الأهرامات
- ده كان زمان ، ودلوقتى سايبيين الصهاينة يموتوا إخوننا فى غزة
- وإحنا ما لنا ....ما هم سبب المشاكل، واللى يقرب من الحدود هنكسر رجله.

- انت بتقول كلام غريب ، التاريخ بيقول ان احنا أمة واحدة ، ودى مصالحنا كلنا.

ودخل محاور جديد قائلاّ : هلا قمنا لشرب الشاى ومعه نكمل حوارنا

وعلق أحدهم : تصوروا اننى لا اعرف من الذى اكتشف الشاى. وحقيقه لا ادرى كيف يمكننا ان نعيش من غيره!؟

- يا أخى ده ادمان وده مش كويس
- لقد فشلت أمريكا فى حربها على تجارة المخدرات، فهل نستطيع نحن ان نفعل شيئاّ؟

- ما هو السادات هو السبب.... بسبب سياسة الإنفتاح التى هيأت الجو لتجار الرأسمالية
- مش السادات ده هو اللى باع نفسه لأمريكا
- ما يصحش نقول كده على واحد ميت
- نحن شعب له قيم وعادات وتقاليد ومبادىء ولابد ان نحافظ عليها

- كل هذا كلام ، قل لى هل نستطيع ان نحافظ على قيمنا وانت ترى ما يحدث فى رمضان
- فى الحقيقة هناك تقدم فنى وابداعى جامد قوى وخصوصاّ فى المسلسلات
- انت تقصد إسهال المسلسلا ت ده؟ هو ده بقى جو رمضان وهى دى قيمنا الدينية؟
- يا اخى اختار الفاظك ، الملافظ سعد ...ايه كلمة إسهال دى؟
- لامؤخذه ان قصدى اعبر عن فكرة فى دماغى المتكلفة
- وايه فكرتك دى؟
- زى الإسهال علامة على مرض الجسم ، فاكثر المسلسلات علامة على اعتلال فى صحه الأمة

- يا عم دى افكار متخلفة !!! انت لا تقدر الفن ولا الابداع
- دى افكار الجماعات الإسلاميه المتخلفة ، ما هى سبب ما احنا فيه
- الله يرحمه السادات هو السبب فى ظهورهم
- علشان تعرفوا قيمة عبد الناصر
- ما هى امريكا مش ها تسيبنا فى حالنا
- يا ابنى احنا المصريين الفراعنه امريكا ايه دى
- ايوه ده حقد على اقدم واعرق حضارة عرفها التاريخ
- وهى دى حضارة اللى بتعبد الفراعنه وتنحت تماثيل ويتزوج الأخ اخته!!

- بس فى الحقيقة مش لاقى وقت علشان اشوف كل المسلسلات
- بس إيه حكاية الجواز العرفى دى المنتشرة
- ولا المخدرات والعصابات ، ولا العربيات الغالية

- قصدك سيارات مش عربيات ...إتكلم عربى!!

- أصل إحنا بنقلد أفلام هوليوود ذى القرود
- حد فيكم شاف ماتش الأهلى والزمالك الاخير
- هوالواحد عنده نفس يشوف حاجه واحنا شايفين اللى بيحصل للأمة العربيه

- ليه الناس بتهاجم الإسلام
- أصل القنوات الفضائية كثرت قوى ، ولوعايز أى فتوى شرعية تلاقيها على القناة المناسبة
- ما هى الجماعات الاسلاميه الرجعيه هى سبب ا لمشاكل
- هو كل حاجة تنسبوها للجماعات الإسلامية ، وفين تقصيرنا احنا
- ده سعر البترول زاد قوى و بعدين نزل ثانى
- يعنى ممكن إخوانا فى الخليج يشغلونا ، أنا مش لاقى شغل هنا
- أنا عايز حاجة أكلها ، حد عايز يشاركنى فى كم سندوتش؟
- يا راجل انت لسه فاطر أستنى السحور.


وانتظروا باقى الحوار بعد هذا الفاصل الإعلانى

[بنان دركل]

بانتظاره بفارغ الصبر ماشاء الله عليك دكتور

[د.مهندس عبد الحميد مظهر]

الطرش فى القنوات الفضائية - 2

أرسل لى أحد الأصدقاء هذه القصة ، وهى بالعامية المصرية ، ولا أعرف مصدرها

ظهر على إحدى الفضائيات فى نهار رمضان رجل عجوز يرتدى جلباب أزرق ، تستضيفه مذيعة ملونة الأطراف و يصاحبها مذيع غير معروف لمشاهدى البرامج الدينية . قعد الرجل وتبحبح وربع رجليه وكأنه يجلس فى مصطبة المتولى ، ثم قال:

الشيخ البحبحانى - أنا بعد بحث شديد فى أصول الدين ومراجعة الفقه والشريعة أكتشفت اكتشافا خطيرا...........

المذيع- خير يا مولانا ؟؟
الشيخ بحبحانى - تصوروا .. إن السجاير مش بتفطر فى رمضان
المذيعة - مش معقول؟
المذيع- والله العظيم بتتكلم جد ؟

البحبحانى - أيوه يا ولد ، أمال أنا جاى هنا أهزر .. السجاير لا تفطر لأنها ليست أكل أو شرب ولا تدخل المعده

أخذ المذيع يتحسس علبة سجائره بشغف

- يعنى أدخن يا مولانا وأكمل الصيام ؟؟
البحبحانى - عادى جدا .. ولا كأنك عملت حاجة!
المذيعة- طيب والشيشه يا سيدنا الشيخ ؟؟
- حلال... حلال... حلال... الشيشه لا تفطر ولا تفسد الصيام
- دا شىء بديع قوى .. يعنى أنا وصاحباتى ممكن نضرب حجرين قبل ما نيجى التليفزيون الصبح ؟؟
- أكيد، والأحسن لو تبعتى تجيبى لنا شيش هنا نشيش قدام السادة المشاهدين عشان يطمئنوا خالص
المذيع - ثوانى يا مولانا ...

أعزائى المشاهدين .. رمضان كريم .. فاصل إعلانى ثم نعود لنواصل مع العلامة البحبحانى.

نرى إعلانات مليئة بمزز الفضائيات ، وأعتقد انه كان يجب ان يسبقها تنويه بأنها إعلانات للكبار فقط أو من التصنيف 3 حسب رأى (الاوربت) وتحتوى على مشاهد قد لا تتناسب مع المحافظين والصائمين كذلك

انتهى الفاصل لنجد الديكور قد اختلف تماما حيث جلس كل منهم متربعا على كنبة وبيده ( لى ) شيشه معتبرة وأخذ يشيش فى إستمتاع

البحبحانى - شفتوا بقى يا ولاد .. سهلة خالص .. ولا تفطر ولا حاجة

المذيع - معاك حق يا مولانا .. أنا ضربت حجرين ونص لحد دلوقتى وبرضه حاسس بمعاناة الصيام .. وأكتر
البحبحانى - يبقى ثوابك أكتر إن شاء الله لأنك بتعانى أكتر
المذيعه- أنا اللى بعانى أكتر لأن الشيشه مكتومة والولعة نايمة
البحبحانى - ورينى كده

أخذ يشد من الشيشه حتى ملأ الاستوديو بالدخان الكثيف

البحبحانى - خدى يا قطه .. الولعه تمام بس شدى جامد
المذيع - يا سلام لو فنجان قهوه بقى مع الشيشه
البحبحانى - وماله يا بنى حد قال ان القهوه بتفطر
المذيع - أمال مش بتفطر ؟
البحبحانى - لأ طبعاًَ .. اللى بيفطر هو كل حاجه تدخل الجوف ، إنما القهوة بتطلع على الدماااااغ عدل .. أنا بشربها مظبوط
المذيعة - حالا يا مولانا طيب والشاى برضه على الدماغ ولا إيه ؟
البحبحانى - الشاى الساده فقط يا بنتى .. إنما الشاى باللبن يفطر وتخسرى صيامك والعياذ بالله

تحسس المذيع جيبه بتردد ثم سأل..

المذيع - بقولك إيه يا مولانا بما إن السجاير والشيشه مش بيفطروا .. كنت عايز اسأل عن الحشيش يعنى ..إيه نظامه معانا ؟

البحبحانى - أنتم قلتوا لى مالكوش قوى فى الدين .. صح ؟
المذيع والمذيعه فى نفس واحد- خااااااااااااالص
البحبحانى - حيث كده بقى أحب أقول إن الحشيش دا نبات .. والنبات من مخلوقات الله ..أتكل على الله يا بنى .. معاك تركى ولا أفغانى

المذيع يخرج ورقه سيلوفان ملفوف بها شىء ما

المذيع - تركى يا مولانا
البحبانى - لأ .. التركى مش حلو .. مش كميل .. يشحط فى الزور ، وبعدين الأتراك دول ناس علمانيين أكيد الحشيش بتاعهم بيفطر

يخرج المذيع قطعة أخرى

المذيع- معايا حته تانية ما بتفطرش أهى .. أفغانى
البحبحانى - أيوه كده فى السليم ...الأفغان تمام.... مش عايزين نخسر صيام يوم واحد

وهكذا مضى البحبحانى يحلل ما يطيب له من دخان ومشروبات وشيش وحشيش وطفح تلاته قهوه وقزازه كولا ، كل هذا وهو يقنع المذيعين المغيبين أصلا أنهم ما زالوا على صيامهم

وبدأ مفعول الحشيش

البحبحانى - أنتم عارفين يا ولاد أن الصيام مستحب فى رمضان ، خصوصا الاثنين والخميس

المذيعة - والله بحاول أواظب على اليومين دول على قد ما اقدر
المذيع - أنا بقى مش بفوت يوم منهم .. صيام الاتنين والخميس فى رمضان شىء مقدس بالنسبه لي

ثم طلع لنا الباشمهندس بفتوى أخرى وهى ان الحجاب ليس فرضا ( الحجاب وليس النقاب ) حتى أنه سيفتى بأن صلاة الظهر سنه مؤكده

[علي جاسم]

السلام عليكم

كل واحد من هؤلاء المتواجدين في المقهى يحمل من الهموم ما يكفي

وكل منهم لديه أسئلة يبحث لها عن إجابة

مرحباً بك أستاذي

نورتنا بعد غيبة

تقديري

[ريمه الخاني]

صدقت اخي علي ونتابع معك ان كان للعمل تتمة

[د.مهندس عبد الحميد مظهر]

صدقت اخي علي ونتابع معك ان كان للعمل تتمة

العزيزة الفاضلة ريمه

طبعا هناك الكثير من نماذج حوار الطرش ، ومن هنا الدعوة لكل الأعضاء بالمشاركة الإبداعية فى هذا الموضوع...

حوار الطرش

و لعلنا نقرأ المزيد من كل المشاركين

إنها دعوة للإبداع الأدبى

و تحياتى