على سفح قاسيون وفي احدى حارات الشيخ محي الدين العالية طرقت الصبية باب جدتها الخشبي بالسقاطة
مين؟
انا ستي
اهلين ياعمر ستك تكة وحدة
شلونك ستي
من الله بخير ياتيتة
بس الوحدة صعبة ما حدا بيزورني وصحتي ما عاد تسمحلي اطلع وانزل دراج
هاتي هالقهوة ستي والحقيني عالمشرقة
الله ياستي شو حلوة الشام من هون
شايفة يا ستي هالبيوت يلي راكبة على بعضها
بكل بيت قصة ورواية
هاد مثلا بيت الاستاذ عادل لساتها مرتو حردانة ولاحشتلو الولاد
وهاد بيت ام فوزي بنتها عم تتنفس عندها
وشكلو ابنها لجارتنا عفاف عم يعذبها كتير بتنضيفو
وهاي الغرفة اللي مستأجرها العرسان شكلهم اخر رواق
ستي!!
مو على اساس محدا بيزورك وما بتزوري حدا
منين جايبة هالأخبار
ياتيتة
بتعرفي التفاصيل من منشر الغسيل
شوفي جارنا الاستاذ عادل شلون ناشر الشيال
هاد لك تيتة بينتشر والشيال لتحت مو لفوق
والبناطرين بتنتشر من خصرها مو من رجلها والابيض ما بينتشر بلزق الملون.
وبنت فوزية عم تتنفس عندها باينة من من المتلتات والمطربيات والمشمعات والافرولات الزهر المنشورين
ربي يحفظلهم هالبنوتة
وابن عفاف باين عم يعذب امو بتنضيفو من الطراريح المسندحة كل يوم على حبال الغسيل
وجارنا العريس على ضب مناشف ونشر مناشف
لك تيتة قصص الناس مخباية بمنشر غسيلها
وخديها من ختيارة
تفكيرك بيبين من مناشريك
لاتنشري الوسخ ياتيتة
لاتنشري المكلكل يا تيتة
لا تنشري الداخليات يا تيتة
النشر ياعمري ادب وزوق واخلاق
لك تسلميلي يا ستي انتي وحكياتك شو كيوت
شو هي كيوت تقبريني؟
حلوين ستي
حلوين...
ولك اشتقنا والله لحكياتهم...
حتى حبال الغسيل عم نبكي عليها ...
المشكلة علمونا ماننشر غسيلنا الوسخ ..
لهيك ساكتين ..
بس والله عيونا بتفضحنا....