السورية والاردنية

[شذى سعد]

السورية والاردنية

السورية (الشامية) والاردنية

اذا وقع زوجها عن الدرج
السوريه: ولي على آمتي، سلامتك حبيبي إن شاء الله انا ولاانتا ابن عمي
ميته خوف عليه
الاردنية: شو مالك.. دخت؟ مهو الله ما برمي الناس بحجار، خطيتى... الله لا يردك يالبعيد
بتستناه يموت علشان تورث

اذا الزوج بدو يسافر:
السوريه: دير بالك على حالك ابن عمي، جهزتلك الشنته، والله يكتّر خيرك على الاغراض اللى اشتريتها، بيكفوا سنه الله لايحرمنا من دخلتك علينا، ان شاءالله تطلع على أبري، تروح وترجع بألف سلامه.
غصب عنه رح يرجع بالسلامة
الاردنية: اسبوع مبوزة قبل السفر، وكل شوي دموع، ومتى بدك تروح؟ ومع مين بدك تطلع هناك هآ؟ مش تتطلع عالبنات !! إحلف إنك مش رايح تروح على أماكن فيها بنات! ما تتأخر بلاش ينقصنا إشي وانت مسافر. وكل يوم بتتصل بالتلفون عشان تشوف وينك و تحكيلك إنه الولد سخن، وبنتك بدها تموت، كل المصايب بتقلك اياها بتلاحقك فيها وين ما تروح
هوايه النكد عندها تحولت للإحتراف

إذا الزوج تأخر بره فى شغل او مع صديق:
السورية : شو إبن عمي ! غلي ألبي عليك تؤبرني يا حءء وكثير شغلتلي بالي، تؤبرني ما تتأخر عليي كثير مره تانيه عشان بشتائلك أنا
والله يؤبرني دلع الشام
الاردنية: شرّفت؟!! وين لهسا؟ مهو أنا كاينه حيوانه في الدار، طول نهاري أكنس و أمسح !! مع مين من أصحابك الهمل كاين تتصرمح ؟ شو جبتلنا معك، ها ؟وللا جاي إيد من ورا وإيد من قدام، كويس إللي عرفتلك دار وانظبيت
لا تعليق

إذا طلبت شى منه :
السورية: إبن عمي تؤبرني تؤبر ألبي ( كله تؤبر) حبيب ألبي فيك تجيبلنا شي حلو من دياتك الحلوة وعلى زوئك شو بعشق زوئك أنا ياحياتي.
كله تؤبر
الاردنية: ولك إغلطلك مرة وجيبلك شغله حلوة معك، بقلاوة وللا كنافة يا زلمة، خليني أحلي ثمّي إللي مرّر من هالعيشة إللي بتقلعط!
هاي طخها حلال
إذا جابلها هدية
السورية: يسلّملي إياك ابن عمي حبيب ألبي، يااااااي شو بتجنن عنجد عنجد زوئك بيعئد، تؤبشني بتجنننننننننن، الله لايحرمنى منك يا عمري
والله اللي زيك بيعئد
الاردنية: إه، والله غاب وجاب، طلّو حبابنا طلّو! ولك من وين جايبها هاي؟ وقديش حقها؟ الله يقطع هيك ذوق، والله لو جبتلنا طبخة للدار أحسنلك
حسبي الله ونعم الوكيل
اذا بدك شي منها
السورية: من عيونى ابن عمى تؤبرنى بتؤمر أمر ابن عمى ولووو غالى والطلب رخيص، شو بحب سماك انا دخيلو انا شو بحبووو على راسى حبيب ألبي
بس ما بدي اشي
الاردنية : مهو حرام نستريح شوي، لازم حياتي تظل تعب ونكد، هو فش غيرك فى الدار؟ مش فاضية، وللا أقلك اطلع من الدار حل عني روح شوفلك شغله سويها، فقعت مرارتى من شغل البيت اففففف اففففف
عن جد ما بدي اشي
.لو طلبت منها فنجان قهوة
السورية: من عيونى ابن عمى، أحلا فنجان بن من دياتى يستاهل تمك، وبدياتى راح شربك كمان، تعبك راحة ابن عمي، ما في اغلا منك حبيب ألبي
تخيل فنجان القهوة بس
الاردنية :بدك قهوة؟ هي اخوانك مرميين فى الحوش روح اشرب معهم، وللا أقلك روح عند امك بتعملك، أترك شغلي وأعملك قهوة؟؟ هاظ اللى ناقص، ياااا رب موتني وخلصني من هالعيشة اللى بتقرف
كل هادا علشان فنجان قهوة ريتو سم ياشيخة


اذا حكالها (بدك شي؟) وهو طالع
السورية :- تسلملى حبيب ألبي ابن عمى، مابدي غير سلامتك مكفينى من كل شى مو ناقصنى شى تسلملى ياحءءءء بس حبيب ألبى ما تتأخر كثير بشتائلك انا ابن عمي، بدك اعملك شى لمن ترجع؟ (
بتكون غبى لو طلعت وتركتها
الاردنية: لأأأأ (مع تبويزه طولها شبرين)... بديش إشي، وين بدك تروح؟ ومع مين بدك تقعد؟ ان شالله بتطوّل وبتخلّيني لحالي زي الهبله، وللا أحكيلك، جيب معاك حفاظات للولد وإنت جاي.
بتكون غبى لو ما طلعت وتركتها
الذوق والتنويع فى الاكل:
السورية :سلطات، تبولة، فتوش، محاشى، شوربات، كبه بأنواعها، محمّر، مشمّر، يعني سفرة عامرة من كلّه، والله لو ماعندها بقدونس راح تعملك تبولة هههههههههه بيكفى انها راح تقعد جنبك وتفتح نفسك على الأكل، بتحكيلك عجبوك ابن عمى دوء هاي من ايدي، طيب كمان هاي دوءها واحكيلى شو رأيك، طيب هاي كمان وحياتي عندك لتاكلها من ايدي ابن عمى نفسك بشي وماعملته ؟ صحتين على ألبك ابن عمي
ما إلك نفس تشبع
الاردنية: لو عندها كل أنواع الخضار، والثلاجة مليانة اغراض ولحمه وسمك، هو هو فش غيره طبيخ مقلوبة أو ملوخية أو فريكه، وإذا غلبت حالها صينية بالفرن، هذا اذا كنت محظوظ و ما حكتلك فش بندوره و خيار روح اشتري، أو خلص الغاز في نص الطبخه، روح جيب غاز اذا بدك توكل. طبعا بوزها عالسفره شبرين، وبتبلش ضرب بالولد عشان كب الصحن، و حديثها بيكون كالتالي: اليوم إجت فواتير الكهربا والميه، متى بدك تدفعهم ؟ اليوم انكسرت إيد الحنفية وأنا بجلي، روح جيب المواسرجي يصلحها بس تخلص أكل، إبنك بدو عشرين ليره يشتري كندره. وأهم إشي: بس تخلّص أكل ودّيني عند اهلي، طلعت روحي طول اليوم فى المطبخ
يعني عاملة الغنايم ماشالله... خليها تروح يمكن تنفتح نفسك.
أحلى صباح!!
السورية: حبيبي، يسعدلي هالصباح، أووم حبيبي صارت الساعدة 6 يا بعدي... أهوتك جاهزة تشربها بالهنا
لا تقوم عشان تاخذ كمان جرعة من هالحكي
الاردنية:
يا زلمة أي قوم عاد قرفتني صارللي ساعة بصحي فيك، والله لونك متعشي حمار مش هيك!!
قوم عشان ما تاخذ كمان جرعة من هالحكي

حمام الهنا
السورية: أوم حبيبي عشان تتحمم. حمامك جاهز ودفيتلك اياه، (وبس يخلص الحمام)، إي تسلملي هالطلة يا تاج راسي، ريتو حمام الهنا والسعد، تؤول ملاك مقابلني... تطلع على قبري يا حءءءء
بتحس قلبك كمان اتحمم
الاردنية :يا زلمة قوم اتحمم عاد، بكفي، خنقتنا بريحتك، سخنتلك شوية مي إرميهن على بوزك. (وبس يخلص القلعاط)، خلصت؟ والله ماهو مبين على بوزك الحمام، وبعدين لويش كل هالوقت جوة! طيب لا تنسى تشطف المي من وراك
ريتني أموت اذا بتحمم مرة ثانية
تحياتي
بدون زعل هههه

[ظميان غدير]

يعني ايش
الشامية ارق من الاردنية؟؟

تحيتي

[ريمه الخاني]

والله يا شذى حتى نكون عادلين لنقولها بصراحة...
واعتذر من الجميع :
المرأة الأردنية معها بعض الحق فمعظم رجال الأردن ينظرون لنساء خارج المحيط العائلي..لذا تبقى غير آمنة منه..رغم جديتها ...وحزمها وو
أما المرأة الشامية ورغم ليونتها وكما يقال : درويشة ترضى بالحلوة والمرة وهذا واقع وهي امراة غير متطلبة عموما وتقدر الزوج وتحترمه وتطيعه...
لكن زوجها ورغم حزمه ...وشدته ..يحافظ بشكل عام على عائلته ويحميها بطريقته وقلما تجد من ينظر لنساء خارج المحيط العائلي لاكتفائه ورضاه ..لذا لاتحصل نزاعات حقيقية تكرس كل هذا الحوار الجاف.وتبقى هكذا امور تربوية بالدرجة الاولى.
ولك الشكر

[معاذ العُمري]

كثير من النسوان في الأردن
ما بعرفن الدلع
ولا عندهن : يامه ارحميني

المقارنة أضحكتني جدا
لانه كثير منها صحيح