الراجل ده حتة سكَّرة
جنة ورود متنطورة
يشع نوره ع الخلايق
تلاقى الدنيا منوَّرة
يخطِّي دايماً للأمام
وعمره ما بيرجع ورا.

حظه مع الستات قليل
رغم إنه "طير" جميل
مرة يدوسه باص مشخلع
ومرة غزالة برجل فيل
ومرة ساطور ف أخره كيس
ومرة حبل يا ناس طويل.

وارجع أأقول جابه لنفسه
نقول يا شر، يمشي بعكسه
قلبه رهيِّف وصبـره ياما،
دايما عواطفه وكل همسُه
كلام حنيِّن دليل متاعبه،
ما أحلى روحه! ما أوطى حسه!

أما النسا يا عيني ظالمة
وكل كلمة يا خويا أزمة
يقول "أحبك"، تقول "في داهية"
يشيل في نفسه وتبقي كتمة
وان قال ف مرة هاشوف لي شوفة
يقع في غيرها وتبقى صدمة.