مسمار أكيد في نعش الحب اسمه جـواز
يخرم كده راسك، ده غير حِجَار وإزاز
والدم سال للركب، وفضيحة في التلفاز
وابو عرّام يا عيني بقى عبرة للأجـواز.

أحلى الحب صدقني اللي من بعيد لبعيـد
لا حد ينكِّد عليك -والنكد ده برضه أكيد-
بس من غير فضايح ولا ضرب شوم وحديد
وان مرة زهقت تغيّر وتجيب مكـانه جديد

صحيح قلبك هيتحسَّر، ودمعك أكيد هيسيل
ونفسك تنكسر أكتر، وفرحك هيبقى قليل
وروحك م الألم تطلع، ويمكن تعوز تحاميـل
والكبت يقضي عليك، ببساطة بدون تهويل

لكن كل ده أهون من جواز بنات حوّا
قرصة واحدة تلاقى الدنيا كلها بتتلوَّى
وتبقى مخنوق وعايز تسيبها لاجل تتهوى
وهي مكلبشة في عقلك من بره ومن جُوَّا.