هانت عليكم مصر ونساء مصر هانت عليكم المرأه المصريه

بعتوا مصر بكام ؟ بفلوس مش كده؟ ياخساره وألف خساره

ياشويه جهله ومرتزقه عارفين المرأه المصريه دى تبقى مين

لالالالالالالالالالالا بالتأكيد ماتعرفوش لآنكم لو عرفتوا مش ممكن أبدا كنتم تبيعوا

حوار حر ومناقشه جميله ومواضيع وقوانين وكلام فارغ وفى الآخر قرار وأتفاقية

الاتفاقية بتنص على تصدير نساء مصر لآحدى الدول العربيه الآسلاميه للعمل كخادمات معقوله؟

أه معقوله والاتفاقيه مصدق عليها من وزارة القوى العامله ومن أحدى بنود الاتفاقيه أن تكون الخادمه حاصله على مؤهل عالى أى خريجه أحدى الجامعات المصريه وتحمل لغه ثانيه أساسيه يعنى يكون معاها دوره أو كورس

يعنى واحده أهلها علموها فى أعرق الجامعات العربيه وهى جامعه القاهره وحاصله على ليسانس أداب ولغه أنجليزيه كمان وتذهب للعمل خادمه لآنسانه مابتعرفش تفك الخط جاهله هو دا حال العرب بيشتروا الناس بفلوسهم

بس لا مش هيقدروا يشتروا التاريخ التاريخ اللى بيقول فين التكيه المصريه فاكرينها؟ والا أفكركم بيها

المرأه المصريه لازم تثور على مجرد التفكير فى الاتفاقيه عارفين مين المرأه المصريه

أنا شخصيا ماأعرفهاش بس التاريخ عارفها كويس وكاتب حروف كل أسم كل واحده فيهم بحروف من نور حروف من دهب تعالوا نستعرض شويه المصريين اللى ذكرهم التاريخ

عارفين حوتب دى بقى أم الفرعون اللى بنى الهرم الاكبر دى حكمت مصر لغايه أبنها مايكبر ويقدر يحكم وبعدين سلمته الحكم

عارفين حتشبسوت الست اللى حكمت مصر عشرين سنه تخيلوا واحده ست حكمت مصر عشرين سنه

عارفين نفرتيتى زوجه أخناتون عارفين كليوباترا طبعا عارفينها بطله الروايات والافلام دا الوجهه اللى أنتوا عارفينه بس

تعرفوا واحده أسمها نبت دى كانت حماه الملك بابى من الاسره السادسه دى كانت قاضيه

تعرفوا هدى شعراوى اللى أشتركت فى أول وفد عربى فى المؤتمر الثانى الدولى بروما سنه 1923

عارفين هند نوفل دى بقى عملت أول مجله مصريه أسمها الفتاه سنه 1892

عارفين جميله حافظ عملت مجله نسائيه أسمها الريحانه

طبعا عارفين روز اليوسف

عارفين السيده فاطمه نعمت راشد سنه 1942 أسست أول حزب نسائى وطنى ودريه شفيق أسست حزب بنت النيل سنه 1949

عارفين تهانى الجبالى أول قاضيه فى مصر وفين ؟ فى المحكمه الدستوريه العليا

عارفين صفيه زغلول زوجه الزعيم سعد زغلول أم المصريين

أنا هفتكر مين والا مين عارفين صفيه زغلول كانت بتربى مين على أمين ومصطفى أمين بتوع أخبار اليوم

عارفين الدكتوره حكمت أبو زيد أول وزيره للشئون الاجتماعيه فى مصر 1962 أكتوبر

عارفين الست الغلبانه قوى اللى أسمها شاهنده مقلد الفلاحه اللى زوجها أستشهد فى معركه ضد الاقطاع وعملت ثوره وقادتها فى كمشيش محافظه المنوفيه

عارفين أنجى أفلاطون

بصراحه دماغى لفت أوى أوى من كتر الاسماء اللامعه اللى أنا ماأفتكرتش منهم ألا 2% بس

هى دى المرأه المصريه المرأه اللى أتحدت العالم كله وأتحدت الزمن والظروف

هى دى كمان الام المصريه اللى قهرت الزمن

دى المصريه اللى رفضت الخضوع والمزله اللى فضلت تحارب علشان تتعلم وفى الاخر عايزين نبيعها فى سوق النخاسه

بعد الزمن ده والجهد ده بنبيع المرأه المصريه تشتغل فى سوق النخاسه

تعالى شوفى ياصفيه يازغلول ياأم المصريين بيرموا هدومك فى الوحل

بيلغوا تاريخك بيلغوا المقاومه بيلغوا ثورتك

اللى يعادى أهله وناســــــه يبقى جبان من ساســــــه لراسه

اقفلوا المزاد ستات مصر مش للبيع

تعالوا شوفوا قصص مصريه صامده قويه وقفة فى وش الزمن بتحاربه تعالوا شوفوا المرأه المصريه

الاسماء كتير قوى وبيحضرنى هنا قصه إيناس أقوى أمرأه مصريه عصريه ألاسم وهمى بس الحكايه حقيقيه

الست اللى رفضت الزواج بعد طلاقها علشان تربى أولادها وتعلمهم وتحميهم من غدر الزمن الست اللى فضلت تنام فى حضن أولادها بالليل أحسن ماتنام فى حضن راجل يبعدها عن ضناها

عارفين الضنا

لو تعرفوه ماكنتوش بعتم أولادكم للكلاب تنهش فيهم

عارفين الاتفاقيه بتقول أيه؟

تصدير مائه وعشرين ألف سيده جامعيه مثقفه للعمل كخادمه وبالتأكيد هيقبضوا العموله