نماذِج نماذِج نماذِج نماذِج
مفيش ف الفراق أي شيء يبقى ساذِج
حتّى الشتيمة اللي قاصدة الوداع
حتّى الإيدين اللي شاورِت فراغ
..
أخويا اللي سافِر يجيب الفلوس
من دولة تانية عشان الجواز
ف أي اتّصال دَوْلي بينه و بيني
يدوس ع الزراير .. أدوس ع الإزاز
مبسمعش صوته الحقيقي السليم
و لا هوّ فاهِم هِزاري القديم
و لا أمّي عرفت تبطّل بُكا
يا غربة يا دايرة ف قلب المَجاز
أخويا اللي سافِر و ساب المَرَاسي
و ساب السرير و الدولاب نَعْش فاضي
ريحته ف حيطان المكان و الكراسي
بيضحك يهزّر يرخِّم .. و عادي
و يثبت حضور الغياب ب امتياز
أخويا و صاحبي اللي حَب الخيانة
أخويا اللي سافر و سابني و فَلَت
سَرَق منّي حاجة .. و دليل الإدانة
بُكا ف البراندة و سجاير "ميريت"

أحمد الطحان






نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي