من تجارب الحياة لي وقفه مع هذه القصيده
بودي ان تشاركوني قراءة ابياتها

يقولون ما للعبد بد عن المقســــــــــــــــــــــــــــوم
وأنا أقول صح ويقنع العبد مقسومـــــــــه

عسى الله يعين اللي توافد عليه إهمـــــــــــــــــوم
هموم تخلي طبلة الراس منجومـــــــــــــه

ترى والله انه مايكدر عليك النــــــــــــــــــــــــــوم
سوى كلمة من بعض الاصحاب مسمومه

إليا جت من الغالين وإلا الرخوم رخـــــــــــــــوم
ولا أمحق من الغالي إليا شانت علومـــه

ضعاف الروابع تبتلش والقروم تشـــــــــــــــــوم
ولاهي بلا شيمة ٍ من الشيم مليومــــــــــــه

ولا أزين من القاع الخلى والوجيه سلـــــــــــوم
ولا رفقة بعد طول الايام ملغومـــــــــــــــه

ولا ألذ من عشرة شريف من أقصى القــــــوم
يبادلك فعل الطيب معناه وسلومـــــــــــــه

ولا شفت في جو الصداقه غبش وغيــــــــــــوم
عطيت الدروب اللي مع الارض مرسومـه

ولا مثل عز النفس لو مامعك مطعـــــــــــــــوم
وعن أهل الشماته خل الاسرار مكتومــه

معي لو سمحت شوي عقب عداك اللـــــــــــوم
أبعطيك عن بعض الرجاجيل معلومـــــــه

ترى اللاش لو وقف معك في حياته يـــــــــــوم
تشوف الردى متبين فيه من يومـــــــــــه

وأنا أقول لو إن في وجيه الرخوم وســـــــــوم
عرفنا نميز قيمة النذل بوسومــــــــــــــه

علشان نجلس مع رجال الوفى و نقــــــــــــوم
ونبعد من اللي عند الاجواد مذمومـــــــــه

وأنا أسمع مع أهل التجربة في الحياة علوم
بعضها صحيح وبعض الاخبار موهومـه

يقولون وكر الحر ما يعتليه البــــــــــــــــــوم
وأنا شوف عيني وكر حر تحت بومــــه

__________________
ذيبان