أنا .. وياك


اذا أشتاقيتلك اتحسس جروحي

لأن بيّ الجروح اثخان بس منك

وأذا احتاجيت صوره وردت أشوفنك

مخيلتي وحياتي وذهني كله انت

وبدمع العيون اسنين أرسمنك

عمر وأنت بطباع الذيب تتحايل

ماچن الطباع العندي فادنك ..

غمضت العيون ورحت أمشي وياك

علمتك ثقه أشلون المحبه أتصير

بس انت الأوصاف البيك غرنك ..

حلو أي صح حلو تبهر عيون الناس

والأجمل دلالك زايد بحسنك

حلو بس معاشرك مر ..

ومااظن الخلط بين هذا وذاك فادنك

اطيتك وهبتك دنيتي وروحي

اخذ باقي العمر والجاي كله وياك

تعبني الصبر بس حلمي أريدنك

بخت .. يمكن بخت

لو سر حياتك ماأعرفنك

ألك وحدك اسولف وأنذر أنذور

كون أتصير يمي وماأعوفنك

صرت أنه وهويتك ذللت روحي

ومتوقع غلط والصار مو منك

اتباها وازامط بيك من أحچي

واسهب بالحديث وأحچي بس عنك

لأن أول محبتي قدر وأتصير أنت وياي

ضحيت بحياتي وكَلت اكسبنك

مامعقول تطلع سيف لو منشار

أي سيف تذبحني واموت أرتاح ..

بس منشار من يقطع جذع نخله

ياكل بالجذع من يصعد وينزل

ونشارة خشب سويتني بفنك

أرجوك ..

مر بيّ ولو غاية ثواب جروحي يردنك

لازالت فرص تجمعني أنه وياك متأكد

بس ياريت تتبدل طباعك وأنا أطبعنك



 كاظم الفضلي