[


منصور عبد الغفار


موضوع: رسالة إلى الوالى قبل الثورة

يا أيها الوالى اللى شايف همنا

ومفرح القلب اللى شايل حزننا

وتملى تسعى ع اليتامى وضعفنا

وعيلنا تلعب الأوله وننسى غلبنا

من كتر ما حبينا حكمك كلنا

والعز غرقنا ف يومنا وأمسنا

ولأننا مش مرتحين مع بعضنا

وانت الوحيد اللى تجمع شملنا

وانت اللى بعت اليوم وأمس وحلمنا

وانت اللى ملكت الأجانب عمرنا

نستأذنك تمشى وتنسى أمرنا

وخد معاك اللى نهبته وسيب لنا

لقمتنا حاف من غير غموس على ملحنا

هانكلها يمكن تتهضم وبدمنا

هانغذى نبت الأرض شوقنا وحبنا

أخرج كفاية عشان جمالك مش لنا

ولا أى نبته من بزورك زينا

ولا أى منزوع الكرامة يهمنا

زورتنا زيفت أوراق التاريخ

دنستنا
وبنيت على الأنقاض قصورك والغنى

حتى التراب بيتمنوه ومقسمينه بالهنا

مالناش عزيز وعنيه بتبكى عننا

أخرج عشان المستحيل مش عندنا

الباب يفوت ميت جمل

عبى الجواهر والمصاير والأمل

ما تشلش هم المطحونين

دول كلهم حبة رعاع متطرفين

وانت الوحيد المعتدل

وانت اللى ف إدبك الأمل

شيل الخزاين ع الجمل

خليه يوصل ما حمل

اخرج بحزب الكذابين من وسطنا

والكل قال

عاش اللى سايق ف الدلال

يا أصل الكرب والبلوى وإيه ينقال

ياأنة حزينة سقيانى مرار موال

خلاص ماشى ياريت تمشى وكل م ليك

بلاش تخرج كده وحدك تسيب بلاويك

م هيش ناقصة تأنسنا كمان ثلاثين

ولا الشعب اللى ذاق مرك وكسر العين

يعيش بعدك ف طحونة تدور عمرين

ولو تخرج بلاش نعرف تروح على فين

دى حتى الأرض مش طايقاك

واخد بلدى ورايح فين

واخد بلدى ورايح فين



[/color][/SIZE][/FONT]