صـــــبـراً ...

الى السيدة التي مزقت هوية الجنسية العراقية العائده لها اثناء تظاهرة كبيرة احتجاجاً على الأوضاع المعاشية في العراق .



صبراً ياعراق ..

ياحضرة زمنه وعتبة الأديان

صبراً يابلاد العز

صبراً ياعراقيه ..

الرضع كل الوطن من صدرج النهران

صبراً وأنتي رايه وشيلة الراس

ألجم جرحج نزف جرحه

وأوكَفتي وأنتي نشميه

ولا مثلج لكَينه أبمحنته أنسان

ضميتي الوطن بعيونج من أسنين

تدفينه بحرارة دمعتج أذا حسيتي بردان

ولكَيتج والوكت قاسي ..

صبراً ينشميه أذا مر العراق بضيج

وأنتي بعازة الفستان

من خيوط الشمس ننسجلج القمصان

من رمش الجفون وبدلة الشجعان

ياأم الشهيد أمحزمه أبارود

وأيد أدير آلة التصنيع

وأيد وي النشامه أتعيد كل بنيان

ياعز الشرف يالماجده التاريخ يشهد

ولا مثلج لكَينه بدنيه نسوان

فزعتي وليل ياخذ ليل

ومن جرحج رويتي الكًاع

من شفتي الوطن عطشان

ياتاج الشهامه وغيرة الناموس

يانخل العراق وبيتنه العامر

لو كبّر مؤذن والحقيقه أوذان

جنسيتج هويتج وانتمائج سيف

لو حز الركَاب أطيح نسوان ..

العماله ..

الفساد .. والخانو وطن

والتاجرو بالدين

جنسيتج يقين ..

وتعني معروفين ..

ويعني أنا أنتمي لأم أنحنت تحت أقدامها الجنه

وأنجبت كل الشرف لأهل الشرف شجعان

جنسيتج هويتي واعتباري

وقيمتي وشخصية الأنسان

من أرفض ظلم لو جور أستأذن أجيج وأدري ماخسران

موعجبه أذا تتمزق الأوراق

أنا ابنج ألف جنسه أصيرلج وألف عنوان

صبراً والفرح بيبان

ماظل للظلم وإيطيح والذل ياكل العدوان

رايتنه أعله جف حسين

ومن دونه ولا صرنه

ولا صار العراق اليوم عنوان







كاظم الفضلي