دخل شاب على حجة يريد ان يخبرها وبوفاة ابنها ببلجيكا :
-كيفك ياحجة؟
- الحمد لله يا إبني..
-أنا جاي عشان خبرك خبر مش حلو..
-عارفة الخبر وحسيت فيه من لما دقيت عالباب..
-شو هوي ياحجة ؟
-إبنى يلي ببلجيكا مات صح ؟
-اه يا حجة .. الله يعطيكي الصحة والبقية بحياتك..
-تفضل فوت أعملك شاي..
-شاي شو ياحجة! عم قلك إبنك مات..
-بعرف يا إبني .. إبني ميت من زمان .. بس قلي هوي كيف مات هالمرة؟

-مات هالمرة !! خلص شغل بالليل وهو عم يسكر المحل هجموا عليه حرامية بدهم يسرقوه وقاومهم، قاموا طخوه 😞 ..
-كم ملعقة سكر يا إبني؟

-رح تجننيني يا حجة بس!! شو يعني، ميت من زمان، ما فهمتها؟ شو هالصبر يلي عندك وطولة البال؟
-يا إبني .. ما حدا بيهرب من قدره .. أنا عارفة إنو ابني رح يموت .. بس كنت حاول خلي جنبي أطول فترة ..
إبني مات من زمان لما تخرج من الجامعة وما لاقى شغل ..
ومات مرة تانية لما حب وحدة وكان بيحلم يتجوزها بس ما قدر يأمن قرض ليشتري شقة يعيشوا فيها لانه ما عندو واسطة..
ومات مرة لما اشتغل نادل بمطعم وإجت البنت يلي كان يحبها مع خطيبها إبن المسوؤل..
ومات كمان مرة لما أبو مرض وما قدر يشتريلو علاج .. وبعدها شال همي وهم مرضي وهوي ما كان معو حق فطوره ..
ومات مرة لما ضلهم يحبسوه عشان بصرخ من وجع هالعيشة ...
ومات مرة لما ...

-بس يا حجة يرضى عليكي..
-معك خبر يا إبني .. آخر مرة قبل ما يسافر لما ودعتو كنت حاسة انو رح يموت .. سألني شو مالك ، قلتلو ما في شي بس ما لحقت إشبع منك يا إبني، قلي عالعيد رح إنزل ونعيد سوا ...
نحنا الشعب بهالبلد يا إبني ما بنفرح بالعيد اكثر شي منروح الصبح عالمقبرة ونحسد يلي فيها لأنهم ارتاحوا من هالعيشة ... المواطن العادي يا إبني بيرتاح لما يموت، الحياة مش حلوة إلنا..

-والله مش عارف شو بدي قلك ياحجة .. عكل حال هذا #شيك ب ٥٠٠٠$ من صاحب الشركة يلي إبنك كان يشتغل عندو..
-خليهم معك، بتروح بتفتش عالشب يلي رح #يتغرب بدالو واعطيلو #اياهم وقلو ما تحرق قلب #امك مثل ما انحرق #قلبي😢
قصة واقعية وبتوجع القلب فعلاً