صرخه فى حجر ( الشاعر مدحت عطية )

[مدحت عطية حسن]

صرخه فى حجر

من يومى
لا وطن .. ولا أرض
لا أمل
ولا كلمة .. ولا عرض
حتى الجبين
مكتوب عليه .. طاطى
متهان
والأهانه فرض

يا أما
الآه هنا فى جنابى
مُش هقولها
ولا هبوح بيها لأحبابى
هحط الآه على الآه
وهشيل من الحزن منابى
مُش هعتب على بكره
هسكت
يمكن صوت السكات
أقوى من عتابى
يمكن الفرح يبكى
يمكن يحسوا بغيابى

ياحيطان بيتنا
يالحضنتى .. لمتنا
فكرك اللمة هتعود
ولا بدينا فى غربتنا

كل طفل له لعبة
فين لعبتنا
كل شعب له حته
فين حتتنا

قوم
إمسك حجر
إصرخ من جنابك
إيه ممكن يصيبك
أكتر من إلـ صابك

قول كلمتك
إرميها فى حجارة
عينى عليك
يا رامى الشبك
من ولد .. إرادته سنارة

يبقى أشكى مين .. لمين
إلـ إنسرق مُش دار
ولا ولد
مين قال إنى حزين
ده إلـ إنسرق .. بلد

[ريمه الخاني]

تشكي لمين؟
فيه رب غفور...وقلب عطوف..يملا الدنيا
لك التحية وقصيدة جميلة

[كاظم الفضلي]

قصيدة جميلة بصورها وعذبة رغم
المرارة والألم .. رغم الضياع والمؤامرة
على وطننا وتمزيقه والعبث بأمنه وأستقراره
وتوجيه أعلام مضلل لمسخ هويته وأثارة
الفوضى .. كلها ساهمت أخي في سرقة
أمة ووطن وتأريخ . شكراً لهذا الأبداع
وتثبيت .

كاظم الفضلي