فيلم سوري يعرض في الغرب

[فتى الشام]

لقمان ديركي : فيلم سوري يعرض في الغرب
المصدر لقمان ديركي
07 / 04 / 2007
ما عم تعجق.. لأنو هنن بالغرب بيحبونا وقت اللي بتعجق عنا.. بس ما عم تعجق..

إذا ما عجقت ما راح يقبلوا الفيلم.. لك حاج تتطلع بالكاميرا ما عم صوركن ما عم صوركن .. اعجقوها..

وهي الصحف وهي المجلات راح ينفلجوا فيها،.. وهي الباعة المتجولين ما هيك بدكن .. المجتمع التحتي.. شوفلي ما أحلاه هالمجتمع التحتي .. شوفلي هدول ما ألذهن بياخدوا العقل.. بدي أعجقها حتى يقبلوني.. بس يا الله ما عم تعجق .. ما عم تعجق .. لك اديش فاضي الشارع.. بس هدول أنتو .. كلكن .. لا بأس بمشهد نهرجاف..





بتحبوا هيك شي عشوائي .. شوفوا.. هي شغله غريبة شاب عمره 15 سنة مفقود .. وهادا الطاووس وهادا يلي قاعد مندهش من الكاميرا تبعي .. وهدول واقفين باستعداد بس لأنو عم اصّور.. ليك الكتب .. ليك الثقافة ... راح ينفلجو فيني.. وهي حيالله غرض بخمس ليرات.. هي الشام.. الشام هيك.. أي غرض بخمس ليرات.. يا لطيف.. بس ما راح تعجق.. هي السينما مسكره.. وهي أقدم سينما بالشام.. لك شوف العناكب.. والحمام يلي عامل عش.. معناتو راح يحبوه للفيلم.. حتى السينما مهجورة..

هاه في عنا جسور، معناها مالنا جايين من ورا البقر.... بس هيك بيتضايقوا.. خلينا نصورلهم الزبالة.. بس الغريب أنو زبالتنا كلها ورق.. خلينا نفرجيهم شغله عن الشام .. ليكها الشام كلها تكاسي.. مكرويات.. هوندايات.. ما في ناس عاديين.. راح آخدلن لقطة للحجاز.. العمى بس ما عم تعجق ما عم تعجق.. وهي سينما تانيه .. سينما المراهقين ويلي جايين يناموا ويلي جايين خميس وجمعة ع الشام..والميزان عطلان.. آخ الميزان عطلان... المسجلة بلا صوت.. والولاد عم يحششوا.. ليش أنا شو؟؟!.. أنا متلي متلن أصلاً أنا أحد أسباب مشكلتن.. هيك صار لازم تعجق.. أي بدها تعجق..



إيه عجقت .. الله يعين العالم.. يا الله يا الله .. على ها الفستان.. لك شو حلوة ها البنت .. بتاخد العقل.. صغيرة صغيرة.. ولي ما أصغرها هالبنت .. أصغر من الشام.. وشوف بيتهوفن بقى.. بدو يبيع البيانو مدري الأورغ.. العالم تعبانه والناس ماشية.. تعبانة.. بس ماشية.. عم تفتّح بواب.. عم تفتّح بواب.. لك بدها تفتح..ع الكل بدها تفتح.. بس مشان الله خليها تعجق.. لك مشاني.. خليها تعجق..



بس فاضية.. فاضية.. لا صوت ولا همس.. وبعيدة.. لك انشا الله عمرها ما تعجق.. عجبهن عجبهن ما عجبهن..انشا لله عمرهن.. لك هادا نحنا بعجرنا وبجرنا .. ما عجبهن .. ما عجبهن.. هادا نحنا وهي الشام حنونة وقاسية حلوة وبشعة... بس مو بشعة... بحياتها ما كانت بشعة، شو فيني قول شغلة عكس حلوة بس ما تكون بشعة.. شوفيني قول.. ولك هي الشام ضيقة ضيقة بس كتيرواسعة.. سعيدة سعيدة وكتيرحزينة.. معجوقة .. معجوقة.. معجوقة.. بس فاضية.. فاضية.. فاضية..



ليش أنا رايح أعمل سينما أنا أصلاً بحياتي ما فكرت بالسينما ...بس حسيتك يا شام سينما .. وما في حدا يصورك .. وما في حدا يحكي عنك .. ولك أنت سينما يا شام.. أنا رايح لأدرس سينما مشان أرجع وافوت ع السينما لأنو إذا بدك تفوت ع السينما لازم تدفع شي .. وأنا رايح أدفع ست سنين من عمري مشان ارجعلك وفوتلك .... وأنا حابب فوت ع السينما حابب فوتلك يا شام وأنا بعرف وأنت بتعرفي .. وأنا بعرف وأنتي بتعرفي أنو يلي بدو يفوت ع الشام .. لازم يدفع.. بس آخ .. آخ .. والله العظيم ما عم تعجق ..ما عم تعجق.. مع أنو عجقة بس ليش ما عم تعجق .

[امير الليل]

شئ جميل
شكرا يا فتي الشام لنقل الخبر

[رغد قصاب]

هههههههههه
مافهمت ولاشي

[فاطمه الصباغ]

مشكور تسجيل مرور