شاورما عربية!!

[فتى الشام]

لقمان ديركي :
شاورما ....
المصدر لقمان ديركي
18 / 02 / 2007
كل ما بطلع بالميكرو وبفتح جريدتي مشان أقرا لي شي مقال بينط الأخ يلي قاعد جنبي وبيمد راسه وبيبلّش يقرا معي.. بعطيه الجريدة.. بيقوم بيقلبها وبيرجع لي إياها بدون ما يقرا شي.. وطبعاً بدون ما يقول شي.. يعني متل " شكراً "..برجع بفتح الجريدة وبقرا لي شي مقال تاني بيقوم بيرجع الأخ اللي بجنبي وبيمدّ راسه وبيقرا معي ، ومن هون بتبلش المشكلة.. ما حدا بيحب يعذّب حاله ويدوّر لحاله ويفكّر لحاله.. إذا فتح واحد محل شاورما ومشي حاله تاني يوم بيتعبّى الشارع تبعه محلات شاورما، وإذا جرب واحد يشتري ميكرو باص بيفيق الصبح وبيلاقي الحارة مليانة ميكروباصات صافة.. آخ.. الأفكار قليلة واللي عم بيقلدوا كتار....


إذا بتسأل شاب أو بنت بسوريا.. شو بتشتغلي أو بتشتغل حضرتك؟!.. بتقلك.." ديزاينر" نعم سيدي .. كل الشباب عنا ديزاينر..هيك الله خلقهم ، إذا سألت شاب مصري أو بنت مصرية شو بتشتغل حضرتك؟! ..حيقولك "بكالوريوس تجارة".. بتحس أنهم بمصر بيعطوا بكالوريوس التجارة مع شهادة الميلاد.. لأ لسه العراقيين.. شنوتشتغل حضرتك؟! بيقلك " شاعر.. كاتب.. ماجستير بالإخراج المسرحي من بلغاريا ".. اشتهيت شوف دكتور عراقي أو نجار عراقي أو لحام عراقي .. مشان هيك قال الشاعر: " يقولون ليلى في العراق مريضة ".. طبعاً بدها تمرض إذا ما في دكاترة.. وحواليها 35 مليون شاعر.. بيمرّضوا بلد ، وبالأردن كلهم مبرمجين كمبيوتر ، بتلاقي واحد عم يشتغل كرسون بقهوة أردني بترتاح بتقول لحالك هاه في واحد هون كرسون مو مبرمج كمبيوتر ، بتطلب منه فنجان قهوة بيقوم بيجيبلك اياها بدون نفس وهو قالب خلقته طبعاً ، بتسأله شوبك ليش زعلان ، بيقلك " يا أخي أنا مو شغلتي شاي وقهوة " بتسأله ليش شو شغلتك له كان؟ بيقلك " مبرمج كمبيوتر " !!

لذلك بنستورد وما بنصدّر غير اللي عاطينا اياه الله.. يعني بترول وقمح وقطن.. حتى البرامج التلفزيونية بنستوردها.. من سيربح المليون.. سوبر ستار.. ستار أكاديمي.. ناقص نستورد المتابعين والجمهور كمان.. ولسه بقطر صار يستوردوا لاعبين بالسباحة والجري مشان يلعبوا باسم قطر.. سبحان الله سباح قطري بس أشقر وعيونه زرق.. سبحانك يارب العالمين!!.. لو كان زين الدين زيدان مو ولدان بفرنسا يا حزركم شو كان عم يشتغل هلأ.. ديزاينر؟! إذا كان ستايل.. أو شاعر إذا كان مثقف ، أو مبرمج كمبيوتر إذا كان متعلم ، بس ع الأرجح.. لأ أكيد.. شايفه قدام عيني عم يشتغل ع سيخ الشاورما.. إي شاورما .. جاج .. لحمة .. ما بتفرق .. المهم شاورما .. بس بصراحة رح تكون لقمته طيبة ، أصلاً ما فيك تقله لقمتك مو طيبة .. أوعا دير بالك هادا ما معه لعب لأنو رح يترك كل شي من إيده وينطحك !!

جريدة بلدنا

[أبو فراس]

نص بليغ وبالعامية !!!
فنان-وهذا هو الواقع ...
شكرا للنقل الرائع مميز

[امير الليل]

مشكور اخلي لنقلك المميز

[فاطمه الصباغ]

كلام منطقي وواقعي

مشكور