منتديات فرسان الثقافة - Powered by vBulletin

banner
النتائج 1 إلى 8 من 8

الموضوع: خبز يابس

العرض المتطور

  1. #1

    خبز يابس


    خبز يابس
    ======
    ( صفحه أولى ) شاكر الخباز
    العراق
    أشتهيتچ ....
    مشتهاة الفارگ الدنيه أبسلامه
    يللي بيني أو بينچ .. أو بين الوصل
    يوم القيا مه
    أو گلبچ .... أشها بعده عني
    وانه گلبي .... گلبي هذا
    أمسودن أسويدت صگر...
    لو يخطي من يچهب حمامه
    ونتي – يزليخة – زمانچ .. ماني يوسف
    چا غصب كلتيلي خذني
    ♦♦♦
    گلبي من اتمعضد... أبمعصم أديچ....
    وبصليب السيد المصلوب
    يتلولح أبصدرچ
    چان عقلي...أمهجـــّر أمن الشوملي.. الجرف الصخر..أوچانت
    أضنوني بحر
    أو روحي بس أتلوغد أبعگد النصارى
    والبقيه الباقيه ..
    أستوله عليها الاحتلال
    أوصرت من 9/ 4
    أبلايه طعم .. لالون .. لاريحه أو معاني
    أفصــّل أويه المنتفـــــچ ...
    تلحگني چيلات الحواســـــــــم
    أحتمي أبسد الكنيسه ...
    أيشيلني امن أثنين أباطي...
    المخبر السري أبشفل.. للحارثيه
    أطلب الحق بالتقاعد.. عن عمر جيلين بالجيش العراقي
    أو عاب حلگه الينكر أمجاده أبميادين القتال
    أطلع آنه أمسيــّس ..أو أرهابي قح..؟
    والغلط بحساب مطره ... أيصير صح..!
    أفلت أمن السيطره أبباب الزبير...
    أتكضني شرطة سيطرة.. مسجد الكوفه
    أعطش اشرب
    - باللأمام الأعظم – أمن الكوزماي ...
    أنشطب من ركضة أطويريج وزيارة صفر
    أغبش – المسطر جميله –
    أبجيبي نسخه أمن الشهاده
    أمصدّقه امن الجامعه
    بلكت الگالي – مقاول –
    ينطي حق -0 خــــرّ يج – ماكلته الحكومه

    - الگه قنـّطــرچيه ... لنگا ت العلاوي
    أحسن البيهم .. يعـــّـد للاربعه
    ♦♦♦♦♦♦
    أوگالو أنتي أمشرغده... أبنص عين كا وه .....!
    يجدح أبذهني گبل... حچي الأذاعـــــــه
    ( هربجي.. كرد أوعرب.. رمز النضال )
    الصدكت بيها .. مثل ماصــدّكت ...
    نهج البلاغه
    أو أشحن الحيل ابجگاير.....
    بس أثر دخانها أيثعول وراي..!
    أطلع أمن الاعظميه...
    أمحزم أبخرجيه .. من تعب الدياحه
    أبين حي العامل... أوحي الجهاد
    أشتري امن ابيوتهم بس -0 خبز يابس –
    وللي تالي ايصيرشعريه...
    أو حلاوه.... أو معكرونه
    بالمعامل وبدكاكين البلاد..!
    عندي جنسية مواطن..
    صادره امن الداخليه
    أموقعه أوبيها ختم ..... فسفوري أصلي !
    أوبيها صوره أملونه
    أو مكتوب أسمي...
    أو أسم أبوي أو أسم جــــــدّي
    أوحته أسم أمي أو أبوها أو أسم جدها....!
    أوكاتبين أوصافي كلها..
    لوني .. أســــــمر
    شعري.... أســـود
    حته لون العين ...بــنّي
    أو طولي من طول العراق
    أو عرضي من عرض العراق
    أوحته تاريخ الولاده،، أو مسقط الراس
    أبقضــــاء الناصــريه
    أيكضني واحد – بيشمركه –
    ايكلي جيب الن كفيل....
    أو اربط الجنسيه وي كشف الدلاله..!
    كتله چا.. والهربجي..!
    گال... شنهو الهربجي...! هاي انته وين...!
    روح دّورها أبخرايب ... تيل تاوه
    أو.. أخذ من عندي نصيحه
    والله لايحسبها وحده أمن الذنوب
    تره كل هاي الكتل بالبرلمان..
    .وانه ما أستثني كردستان كلش
    وللي من عدها الحكومه..
    لو هي ... موقوذه ..أو أكل منها السبع
    لو هي مترديه أو نطيحه...؟
    ورجع أبنفس الطريق المـنـــّه جيت ...
    أو روح هربچ بالجنـــــــــــوب..!
    ♦♦♦♦♦♦♦
    خبـــــــز يابس
    ثاني صفحه
    ♦♦♦♦♦♦♦♦♦♦♦♦♦♦♦
    متى تعــّلن ..ألك بالصــّافات أجناح..
    وبحبلك السري الماي... لو عطــّشن !
    متى أبسيف العراقي.. أو تشطر النه اليـــّم
    حته المرسلات أخيولها أيعبــّرن..!
    هلك.. فخر النجود.. أوشيمة الصحراء
    والجود.. أوسنى النيران من يــــدّ ون
    تظل عصاة موسى .. أو عصب چف داوود
    من كل الرماح ..أو سمـّهن أمــّحــصّن
    تظل فـــزّعة هلي..وزماط كاع الفاو
    وتراب العراضـــه .. أوتفگ لو طكـــّــن
    متى تفضح عشكنه..أوناس تخبر ناس
    واتخلي الرياح الصافنه أيثكبـــــــّــــــن.!
    ∞∞∞∞∞
    متى نكتب قصيدة نار... مو نـــــوّ ار....
    من حــرّها الكراسي البارده أيثكبــــــــــــن..
    متى نعثر أبشاعر حرفه حد السيف
    وبكاتب أغاني أيـــّوزنه نتســــــــــــــــــودن..!
    متى أنهــــــــــــوّس
    بأنا الطالبون أذا انتقمنا
    وانا الضاربون أذا ابتلينا
    وانا المانعون أذا أردنا
    وأنا العاطفون أذا دعينا
    وأنا النازلون بكل ثغر
    يخاف النازلون به المنونا
    ألا ..لايجلهن أحد علينا
    فنجهل فوق جهل الجاهلينا
    متى تفرز.. هذني أو ذيچ...
    عن ذنيـــــّچ
    أو عن هذا ... أو هذاك –
    أو ذوله .. عن ذولاك
    وتخلي الــرّحي ..
    البس ناعم أيطحنن..!

  2. #2
    قصيدة عذبة وجميلة
    وبلهجة اجمل

    اشكرك

  3. #3
    اقتباس المشاركة الأصلية كتبت بواسطة ظميان غدير مشاهدة المشاركة
    قصيدة عذبة وجميلة

    وبلهجة اجمل


    اشكرك
    سيدي ظميان ... اشكر مرورك وعذوبة كلماتك

  4. #4
    للهجة العراقية خصوصية فريدة تسعدنا
    مرور وتحية واهلاباولى نصوصك العذبة
    [align=center]

    نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي
    ( ليس عليك أن يقنع الناس برأيك ،، لكن عليك أن تقول للناس ما تعتقد أنه حق )
    [/align]

    يارب: إذا اعطيتني قوة فلاتأخذ عقلي
    وإذا أعطيتني مالا فلا تأخذ سعادتي
    وإذا أعطيتني جاها فلا تأخذ تواضعي
    *******
    لم يكن لقطعة الفأس أن تنال شيئا ً من جذع الشجرة ِ لولا أن غصنا ً منها تبرع أن يكون مقبضا ً للفأس .

  5. #5
    اقتباس المشاركة الأصلية كتبت بواسطة ريمه الخاني مشاهدة المشاركة
    للهجة العراقية خصوصية فريدة تسعدنا
    مرور وتحية واهلاباولى نصوصك العذبة
    سيدتي الفاضله ريمه الخاني... اشعر بانكم جميعا صنو مشاعري .. تقبلي وافر احترامي

  6. #6
    مشرف فرسان الشعر الشعبي إخباري محطة العالم
    تاريخ التسجيل
    Nov 2009
    الدولة
    العراق
    المشاركات
    1,379
    الشاعر القدير شاكر الخباز .. نورت وأبدعت
    بل تراقصت أجنحة الفراشات ابتهاجاً وأنشدت
    جوارحي سلاماً ياعراق ونقشت كلماتك على جدران
    المنتدى وحفرت في أعماقي كأنك تدفن أشلاء مبعثرة
    عبثت بها أيدي الغزاة .. ها أنت تركب صهوة جوادك
    وتزف موكب أبداعك برحلة ممتعة مع فرسان الثقافة
    والأبداع والعطاء .. ترحيبنا بك أولاً وبنشاطك المميز
    قصيدة رائعة وبانوراما لمراحل التكوين في زمن الخوف
    والتشرد والطغيان .. شعبية بعاميتها وعمومية بموضوعيتها
    ولازال قلمك معطاءاً ونشيدك لوطن الأنتماء أجمل ..
    شكراً أستاذنا وشاعرنا ( أبو شوقي ) شاكر الخباز
    وتحيتي لك صديقي الكريم على تواجدك وتواصلك معنا
    في منتديات الفرسان .

    كاظم الفضلي

  7. #7
    أبو آلاء الحبيب كاظم الفضلي .... أستمد الروعه من روعة روحك ونقائها.. ومن عذوبتك في العطاء ... اشكرك على هذا الأطراء .. تقديري العالي لكل مافيك

  8. #8
    شاعرة سورية اختصاص مناظرات
    تاريخ التسجيل
    Nov 2010
    المشاركات
    1,675
    الشاعر القدير ابو شوقي

    اهلاً ومرحباً بك وبحروفك الرائعة

    تحيتي وتقديري لك
    وإني لفي العلياء شمسُ أصائلٍ ***وبدر تمامٍ لا يماثلهُ بدرُأنا القمة الشمّاء لا يرتقي لها ***سوى صارمٍ في نصلهِ ولد النصرُ

المواضيع المتشابهه

  1. يلي عندو خبز يابس...بقلم آرا سوفاليان
    بواسطة arasouvalian في المنتدى فرسان المطبخ
    مشاركات: 1
    آخر مشاركة: 07-01-2013, 01:02 AM
  2. يا ميسُ ما خابَ الرجا/الشاعرة فردوس النجار
    بواسطة فردوس النجار في المنتدى الشعر العربي
    مشاركات: 3
    آخر مشاركة: 03-23-2011, 05:22 PM

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •